2012/06/27

陶寶B搶閘出世

心急既陶寶B突然搶閘出咗世啦!

我仲諗住寫下WK35既情況時,曳曳既陶寶B係WK36(6月24日)就出嚟同大家見面呢!

本來諗住順產既,到最後失敗了改為開刀呢! 遲啲再同大家share 過程!

整番張相俾大家見係呢位搶閘出世既曳曳陶寶B呢!


2012/06/21

與陶寶B一起的日子 - WK34 (第二階段清胎毒及私家產檢)

仲有個多月陶寶B就好快出嚟同大家見面, 所以莎拉都開始第二階段既清胎毒, 因為驚陶寶B會搶閘出世, 所以都係早少少開始2nd Stage既清胎毒.

莎拉就去藥材鋪買白蓮鬚, 之前見有啲blogger話好平, 但個日係藥材鋪, 個店員話加埋葡萄乾呢, 所以最後就執咗每包$20一份量既白蓮鬚加葡萄乾, 點解好似貴咁多, 唔通莎拉又俾人呃?!!!!
第一次煲呢個白蓮鬚葡萄乾, 見好多人都加隻蛋, 莎拉都試一試, 3碗水煲至1碗水, 最後加少少糖. 飲落唔係苦, 但係覺得好"鞋"口, 好"劫"呢, 絕對唔可以話好飲呢, 加埋隻蛋, 真係好飽呢, 下次都唔加蛋啦, 廢事食完頂住個胃呢!


2012/06/20

座月既準備 - 沖涼篇

差唔多係時候準備下座月既用品啦! 見好多mom-to-be都會買薑味既沐浴用品, 莎拉都唔敢輕視呢一part既準備!

薑味既沐浴產品好多牌子都有, 價錢有平有貴, 最後莎拉買咗彩豐行既呢隻檸薑味既洗頭水, 護髮素及沐浴露, 3支加埋都係$110, 好似好抵用, 聞落去仲好勁薑味呢! 希望到時加埋薑水沖身, 咁就夠晒"薑"啦!!!!

2012/06/19

泰想食 - 即食芒果糯米飯

星期日行開又一城既Taste超級市場, 見到有promoter推銷緊一款泰國入口既即食芒果糯米飯 (仲有另一款係榴槤糯米飯呀)! 試過好味呢, 買過返屋企嘆下先!
雖然莎拉唔係太應該食芒果, 但係實在忍唔住要食少少啦!
價錢就誠惠$34, 都唔算平, 不過放一盒係雪櫃, 心血來潮, "泰想食"既時候, 用微波爐一叮就有得食, 都幾好呢.

2012/06/17

美素佳兒產前講座

本來呢個美素佳兒既講座係4月份舉行, 但係當日天文台發出黃色暴雨(OR唔係係紅色), 總之就天氣惡劣啦, 所以美素佳兒就一早send SMS嚟通知Cancel咗當日既講座(好細心既安排, 唔使等一眾大肚婆惡劣天氣仲出街呢, 抵讚呀!), 改為5月份舉行.
今次都係莎拉第一次去奶粉生產商舉辦既產前講座呀, 內容都係產前/產後護理及營養, 同一啲初生BB既照顧, 因為之前已經上咗其他既產前講座, 所以內容都已經知道呢.
Haha, 莎拉最關心莫過於有啲咩free gift啦, 今次就係有一大罐既媽媽奶粉, 一本"愛心孕育小百科"既育兒書, 同一盒好靚既食譜!

2012/06/16

與陶寶B一起的日子 - WK33 (廣華產檢及產前講座)

又一個星期啦, 而家平均每3星期要返廣華覆診, 都係果句餐餐都要等成個半鍾先可以見醫生.

上次抽血既報告出咗, 依然都係有輕微貧血, 所以要繼續食鐵丸, 而其他就一切正常. 其實廣華既醫護人員俾莎拉既感覺真係唔錯, 雖然眼見佢地真係忙到甩轆,  但係佢地對patient都好好聲氣呢. 個日幫手量血壓既"姐姐", 仲會好親切咁只係叫莎拉個名, 而唔係叫全名, haha, 真係好耐無被人只叫個frist name!!!! 希望到時入院生bb時, 啲醫護人員一樣咁nice啦.

之前book得好辛苦既廣華產前講座, 星期六莎拉第一次出席, 今次既講座係有關餵哺母乳既好處及常見問題. 因為謝菲要返工, 所以今次就得莎拉一人單刀赴會. 出席既人真係好多, 所以早少少到就可以座個近啲既位置.

講番個講座先, 莎拉都係諗住餵母乳, 但係餵到幾耐就真係唔知, 不過莎拉相信餵2個月問題應該不大, 而世界衛生組織就建議應該餵至24個月, 相信能夠達成24個月既目標真係一啲都唔容易, 莎拉就自問不能夠啦. 而家最煩惱就係放完產假後, 莎拉能否堅持都已經係一個大問題(係公司真係好唔方便, 咩support都無), 所以而家都唔諗住啦, 到時先算呢, 見步行步.


2012/06/15

情迷Pasta - Carbonara spaghetti (卡邦拿意粉)

近排好懶呀, 雖然已經唔係需要自己晚晚煮飯, 但係可能體力上比起之前需要較大, 比較容易攰, 所以就算自己整晚餐都會盡量係"快, 靚, 正"既原則呀!

同謝菲前一排出街食飯既時候, 食咗個Carbonara spaghetti (卡邦拿意粉), 一直念念不忘, 不如莎拉都試一試整啦, 一來材料簡單, 二來又容易整, 三來又好味, 乎合晒"快, 靚, 正"既原則呢!

材料真係好簡單, 分分鍾係雪櫃都搵到既材料, 連街都唔使出就有得食呀!

煙肉+ 蛋黃 + 洋蔥 + Cream + 意粉就整到好味既Pasta, 雖然係第一次整, 味道都ok呢, 當然謝菲好捧場啦( 哈哈哈, 唔係下次邊有得食呀!) 好滿足既一餐呀!



2012/06/10

與陶寶B一起的曰子 - WK32 (凸肚臍之幸福)

莎拉而家個肚真係好大啦, 有成37"(未食嘢之前計) 真係好似抱住個西瓜咁, 所以可以幻想到行動越嚟越唔方便啦!

個肚頂住晒, 點樣剪腳甲呢? 呢個重任就交俾謝菲啦! 哈哈哈, 謝菲都係第一次幫莎拉剪腳甲, 如果唔係大肚都未必有咁既機會。

有時莎拉條腰覺得好累, 謝菲都會立即侍後, 按摩立即上!

晚上瞓瞓下突然抽筋, 莎拉會馬上推醒熟睡中既謝菲, 謝菲就會立即彈醒話"收到", 之後就會幫莎拉整番鬆條筋!

夜晚有時陶寶B係肚入面做體操, 𨍭嚟轉去, 踢到莎拉過肚彈嚟彈去, 係呢個時候謝菲就會出手放係莎拉個肚上叫陶寶B斯文啲呀!

雖然上述既都係一啲微不足道既小事, 但係謝菲就會回應一句 "你大住個肚咁辛苦, 自己都做唔到啲咩, 可以幫你既都會盡量幫你同就你!!!"
多謝你呀, 老公!!! 我相信呢啲就係凸肚臍之幸福!!!!




2012/06/09

BB會 / 媽媽會大雜會 (二)

繼續呢個BB會/媽媽會既晒泠先!!!!

(5) 雅培媽媽會
本來起初只係收到本會員優惠, 會員卡同啲媽媽奶粉Sample, 心諗呢啲禮物好似"流咗啲"呢, 點知隔咗一個之後, 就收到封信係去荷花度換領媽媽袋呢!!! 估唔到個媽媽袋都好大個, 唔好講個袋既樣先, 但係論實用情度, 又真係唔錯, 或者可以用嚟做袋中袋(成袋BB用品出街時, 可以放入手袋中), 所以都幾好呀!!!




(6) Pampers BB會
收到既迎新禮物就係一包NB既尿片, 不過就係要拎住封換領信去任何一間荷花嬰兒用品店換領, 係就係有啲麻煩, 不過起碼都係一口啲實用既BB嘢. 除咗有NB尿片, 仲有一張買尿片有優惠既Coupon, 不過就有expiry date, 所以要快快手睇住個日期前要用呀.
(7) 雪印媽媽會
呢間雪印, 真係一句講晒, 無迎新禮物, 得一本"幼兒常見疾病小知識"既書仔同張membership card, 都唔知用嚟做咩!
(8) Huggies BB會Huggies既迎新禮物都好多完化, 有NB及0碼既尿片及濕紙巾, 可以等Mom-to-be試吓不同既產品, 都唔錯呀!

2012/06/04

與陶寶B一起的日子 - WK31 (清胎毒)

就快進入8個月既階段啦, 莎拉都開始食啲清涼嘢慢慢清胎毒!
天氣熱熱地最正莫過於食西瓜啦, 好耐都無食西瓜啦, 一食落去真係好清涼呢, 爽呀!