4th month成長之路

體重及身長:

返健康院打針上磅, 原來已經有6.75kg (14.9磅)啦, 唔怪之得而家抱上手咁重啦, 真係抱10-15分鐘已經唔得掂呀! 而家陶寶B已經追到上去中碼BB既Size啦. (叻叻呀!) 近排襯換季所以順便執吓陶寶B啲衫仔, 嘩!!! 原來已經有成一大袋衫唔啱著啦, 有啲仲係只著過一二次咁大把呢. 上個月都仲係講緊陶寶B開始要著6M既衫, 今個月已經可以開始著9M啦, BB真係大得好快呀!

食量:陶寶B呢個月已經向5oz奶進發, 而夜晚臨瞓前個餐就會食6oz, 咁佢夜晚就可以瞓得"林"啲而成功戒夜奶!!! 不過陶寶B都仲係一個食得慢食得"魔" 既BB,  成日都係嘆奶或者食"迷魂奶", 點搞佢腳仔食仔都唔醒, 但一放落床仔就醒, 真係俾佢激c呀!

活動能力:

- 呢個月成功可以係協助下轉身, 不過手仔都未係好夠力成個身撐起. (健康院姑娘話始終陶寶B係36WK出世BB, 雖然佢而家係4Months, 但係實際佢只係3Months, 所以都要俾啲時間佢)
- 頸仔已好有力可以撐住頭仔, 唔會再好似之前唔夠力時, 個頭好似飲醉酒咁, 個頭"Fing fing"吓.
- 好多嘢講, 成日撩人同佢講嘢, 有時仲講嘢講到好大聲, 正一口水佬嚟架!
- 好鐘意睇電視, 出街飲茶見到有電視, 佢都會追住嚟望 (陶寶B, 小朋友唔可以成日睇電視架!!!)

作息時間:

陶寶B已成功戒夜奶啦!!!! (最開心莫過於莎拉媽媽, 終於都可以一覺瞓天光!) 不過近呢個星期陶寶B晚上臨瞓前會爆喊, 有時食食吓奶就扁咀, 之後就爆喊要抱吓"愛"吓先得, 莎拉媽媽覺得佢係太眼瞓, 又未瞓到, 所以喊, 唔知其他BB有無呢啲情況呢?! 各位靚媽媽有咩高見呀?!

健康:

感恩陶寶B沒有咩大問題, 而便便又So far so good, 每一至二日都會poo poo呀, 叻叻B呀!