10th month成長之路

10th month成長之路

體重及身高同陶寶B返醫院睇上次DMSN Scan個報告時磅過重及度高, 今期係9.5kg 75cm高, 即係話陶寶B重咗0.8kg, 莎拉自己用個生長chart去睇, 估計大約係75%既生長線. 用Hip-seat揹陶寶B出街, 揹短時間還可以, 但長時間真係有啲吃力啦 , 所以揹陶寶B呢個重任就交俾謝菲啦, 其實連謝菲都感吃力架, 不過無法啦, 莎拉怕揹得太重, 揹都個人都矮咗呢(明顯係Excuse). 而家同陶寶B出街見朋友, 好多都話陶寶B唔似10個月BB, 唔知係因為比較身長既原因, 定係佢既Outfit似大人仔, 所以有錯覺佢好大個呢. 不過點都好啦, 總之陶寶B生長係正常範圍內OK便可以.


食量
同上一個月差唔多維持3奶2粥, 每餐都係一大碗粥仔連菜連肉(分分鐘佢碗飯多過我個碗), 暫時總算食飯都好乖, 除咗有時太眼瞓先會食到喊晒口. 而呢個月就試咗食蛋王, 每次蛋王既配搭都係牛肉與蕃茄, 陶寶B每次都食得好滋味, 當然啦, 蕃茄牛肉蛋永遠都係小朋友既至愛, 莫講話小朋友, 大人都一樣鍾意呀. 而水果方面, 新既嘢就試過火龍果,榴槤及提子,  兩樣都ok. 而今個月都試過俾生果粒或生果條俾佢自己拎住食, 進度都可以, 不過就可能會食少咗, 所以最後都要餵佢食少少, 等陶寶B食足夠既水果.

活動能力
- 已經可以自己由坐係度扶住物件企起身
- 除咗可以自己扶住企之外, 近來最鍾意就係企係網床內跳跳跳, 好似跳彈床, 跳到自己攰就係坐返係度, 莎拉稱呢個action為放電活動.
- 常常發既音係"謝..謝..", 不過好奇怪, 全家人都唔係叫工人姐姐做姐姐, 所以真係唔知佢係邊度學返嚟. 不過好似開心時特別會發出"謝..謝..".
- 可以自己爬去目標(不過有啲慢).
- 自己可以攞住奶樽飲奶.
- 最愛遊戲排行榜:
第一位: 小明小明小小明 (每次一聽到小明小明, 未玩就已經會笑).
第二位: 拍拍手 (雖然未識自己主動拍手, 但係捉住佢隻手仔拍手時, 佢係好想自己拍拍手, 每次一捉住手仔拍手都會好開心).
第三位: hide and seek (相信大部份既小朋友都會好鐘意玩, 而家大個咗, 陶寶b仲會伸個頭出嚟去搵吓你係邊度呢)

作息時間
呢個月, 5晚內平均有2晚半夜時都會醒咗, 之前可以用奶咀已經可以安撫到佢, 但呢個月已經唔得啦, 試過用奶樽俾少少水佢飲, 但係唔得, 最後都要開3oz-5oz奶俾佢, 自己係床度揸住奶樽食, 食完就會乖乖瞓著, 哎~~~, 明明戒咗夜奶好耐架啦, 點會又好似返轉頭呢?!!!希望呢個間唔時食夜奶既行為係暫時性過渡啦.

健康
上次返廣華做既DMSA scan已有report, 總算沒有事, 一齊安好, 感恩!!!!