陶寶B最後廣華檢查 - DMSA Scan

陶寶B之前係80日大及3個月大既時候分別試過2次尿道炎感染, 而康復後都會安排做3個檢查, 包括係尿道造影,超聲波及DMSA Scan (腎臟素描).  尿道造影及超聲波檢查主要係確認吓小朋友有否先天性尿道短引起倒流問題, 而今次既DMSA Scan就係檢查腎臟有否因為之前尿道炎感染而出現疤痕.

其實陶寶B之前既尿道造影及超聲波檢查報告已經出咗, 感恩陶寶B沒有結構既先天性尿道短問題. 所以如果做埋呢個最後一次檢查, 結果OK就安樂晒啦.

今次既檢查係要打少量既同位素入BB體內, 之後就要禁飲禁食, 而係做檢查時BB要完全瞓著.今次既檢查同之前個2次有啲唔同, 尿道造影係之前要食在檢查前一日俾BB食顯影劑. 陶寶B既入院時間係10:00am, 而做檢查既時間係2:00pm, 咁即係陶寶B要禁食約4小時, 所以果朝早, 就係9:00am係屋企餵咗陶寶B食粥仔食(真係食早飯), 咁樣佢就多啲飽肚感覺, 唔駛太肚餓. 雖然咁早餵陶寶B食粥仔, 但係佢都好乖乖豬食晒.



之後就準時到達醫院兒科日間醫療中心. 同陶寶B磅完重及度高(8.71KG及75CM)後, 就同佢換咗醫院衫. 陶寶B仲眼望望, 眼仔精靈四圍碌.



之後見過醫生後就要種粒豆係手背用嚟注射同位素. 哎~~~~, 雖然今次唔係陶寶B第一次種豆, 但係在治療室門外聽到陶寶B突然大喊, 真係好心痛呢. 好彩陶寶B好叻仔, 莎拉一抱翻佢就唔再喊. 因為要固定粒豆係手背, 所以扎到隻手成支捧咁款. 之後就去放射部門打同位素啦.



因為有第一次做尿道造影檢查時既經驗, (同樣係要求BB瞓著做檢查), 果次陶寶B唔肯瞓又肚餓又扭計, 所以今次策略係檢查前唔可以俾陶寶B瞓覺, 等到差唔多2pm時會容易瞓著. 所以期間莎拉同婆婆不斷係咁同陶寶B玩, 不過到咗1PM倒, 陶寶B已經係眼瞓到佢既頂點, 真係玩玩吓都瞓著啦.


終於差唔多到2pm, 姑娘俾陶寶B食瞓覺藥, 不過呢啲瞓覺藥一定好難食, 因為莎拉見十個BB, 十個BB一食就大喊. 陶寶B一食, 真係唔駛一分鐘, 陶寶B塊面立即變到關公咁紅, 跟住就大喊. 不過好彩因為陶寶B已經眼瞓到極點, 所以唔駛5分鐘, 陶寶B已經進入了deep sleep mode啦.

整個檢查大約30分鐘, 陶寶B全程乖乖瞓覺, 抵錫呀! 做完檢查後就上返去兒科病房啦, 之後莎拉同婆婆就用盡一齊方法(包括濕毛巾抺面, 彈腳板, 換片片)去整醒陶寶B, 因為陶寶B唔醒唔走得架. 終於用咗10分鐘先整得醒陶寶B, 餵埋佢食翻支奶就可以走人啦. 可能食過瞓覺藥既關係, 陶寶B全日都好似有啲檬檬豬既狀態, 不過第二日就已經回復正常啦.