三文魚他他三色頭盤 (附有食譜)

原來好耐都無分享過食譜啦, 對上一次已經係3月份既事呢!!! 其實莎拉平時都會整吓嘢食, 不過因為實在少時間去寫Blog, 所以遲遲都post唔到呢. 今次呢個又係專for莎拉呢啲懶人既, 因為材料可以預先整好, 都食之前先整靚佢, 個display仲好似出面啲高級餐廳咁, 都呃得吓人架, 所以大時大節有咩特別日子, 整呢一個頭盤, 食既人一定有驚喜架!!! 

呢個appertizer其實係三層不同既食物組成. 最頂既就係主角三文魚他他, 而中間果層就係牛油果, 最低既就係蕃茄, 三種顏色配搭起上嚟, 真係好吸引呀.

材料:
三文魚魚生 半磅
牛油果 1個
蕃茄仔 10-15粒

調味:
檸檬汁
橄欖油
意大行黑陳醋
蛋黃醬
糖
黑胡椒
意大利香草(italian mixed herb)

蕃茄陳醋沙律
1) 蕃茄仔洗乾淨, 然後切細粒 (如果沒有蕃茄仔, 可以用普通蕃茄代替)
2) 加入1湯匙陳醋, 橄欖油半湯匙橄欖油, 少計意大利香草, 少計糖, 撈混之後可以試一試味道 (試一試酸度是否合心意), 完成後放入雪櫃備用.

牛油果沙律
1) 牛油果切細粒
2) 加入1茶匙檸檬汁, 蛋黃醬2湯匙及少計黑胡椒, 同樣撈混之後可以試一試味道 , 完成後放入雪櫃備用.

三文魚他他
1) 三文魚切細粒
2) 加入1湯匙檸檬汁及少計意大利香草及少計黑胡椒, 撈混之後放入雪櫃備用.

最後準備一個圓型模, 放在碟上, 首先最底層鋪上1/3(圓型模高度)蕃茄陳醋沙律, 之後鋪上1/3牛油果沙律, 最後頂層鋪上三文魚他他, 用匙羹輕輕壓下, 以便固定形狀, 之後慢慢取走圓型模便成.