西米焗布甸 (附食譜)

近排天氣真係好凍, 一凍就凍足成個星期, 所以想食西式凍甜品既意欲都下降, 換轉就想食啲暖笠笠既甜品呀. 第一時間就想起西米焗布甸, 入口甜甜地又滑lulu, 真係好正. 嚟緊就快農曆新年, 如果在家煮團年飯, 可以預先一杯杯整好啲西米焗布甸, 到食晚飯時就放入焗爐焗, 到食完晚飯之制, 個布甸已經剛剛好焗成, 熱辣辣香口噴噴, 正呀! 食譜是來自基絲汀簡易食譜, 不過莎拉就改咗部份既份量及做法嚟迎合自己既喜好(因為莎拉鍾意食杰身啲既西米焗布甸).

材料:
西米75克
鮮奶100+150ml
吉士粉 2湯匙
雞蛋(打散成汁) 1隻
花奶 50毫升
砂糖 40克
無鹽牛油 20克
已煮熟紅豆粒及紅豆蓉適量

做法: 
1)西米用水浸泡20分鐘, 撈起備用, 煲一煲熱水, 水滾後倒入已浸水的西米進去, 熄火焗10分鐘. 焗至西米中心還有小白點便可撈起備用.
2) 100 ml鮮奶加入吉士粉拌勻之後再加入雞蛋攪拌
3)其餘150 ml鮮奶加入花奶, 砂糖和牛油, 用中小火煮至溶, 然後加入第2項的混合物, 邊煮邊拌至濃稠, 最後加煮好的西米.
4) 倒入布甸進杯內至半滿, 之後加入少量紅豆粒及紅豆蓉(可轉用蓮蓉), 最後再注入布甸至9成滿.
5) 倒半滿水在焗盤中, 之後放入布甸杯, 200度焗15-20分鐘, 或直至表面微黃, 即成.