新春馬年四圍遊 (下)

年初三 

連續出街玩咗2天, 今日在家同家人食個Lunch, 之後就在家附近行吓就算啦, 今天休息一吓, 為明天既活動準備哦. 

年初四

今日既節目就係南丫島行山一天遊呀, 第一次揹住陶寶B去行山呀! 早上10點去到中環碼頭, OMG, 真係從來都未見過咁多人呀!

 相信大部份既香港人都好似莎拉咁諗, 而家啲油尖旺銅鑼灣地區真係無咩嘢都唔好去啦, 因為呢啲旺區入到去真係以為自己返了大陸啦, 所以香港人都會選啲少自由行既地方呀! 去南丫島條隊, 唔係講少, 真係見唔到個龍頭係邊呀, 粗略估計都有成千人係度排緊"榕樹灣"既船, 咁板排唔係辦法呀, 於是就轉去"索罟灣"個邊啦, 因為真係少人好多, 起碼可以即刻入到閘呀. 

去到索罟灣剛好正午了, 是但揀了一間海邊既餐廳食咗個lunch先開始行山呀, 唔係邊有力呀. 

帶陶寶B外出用膳一直係莎拉既一個苦惱問題, 因為佢一直都唔俾人餵食, 俾佢自己食得話就吓吓用手食, 所以今天出來南丫島行山, 莎拉都只係準備了麵包水果給陶寶B咋, 我們大人開餐時, 陶寶B就唯有食自己啲乾糧(好慘咁呢!!!)

 不過好可能佢食麵包食到好無癮, 見到我們食得咁滋味, 陶寶B眼甘甘望住碟炒麵及炒河粉, 於是莎拉就大膽咁夾咗條麵俾佢, 陶寶B居然會擘大口給我餵, 不得了不得了呀, 真係有如奇蹟一樣呀, 之後仲不斷要求仲想食呀, 就係咁樣, 陶寶B就乖乖咁食咗半碗粉呀. (莎拉呢一刻真係好感動, 佢終於有改善了) 

食飽飽就開始出發了, 陶寶B真係好開心, 一路行就一路開心笑呀, 真係傻瓜到爆. 

謝菲嗲嗲揹住成廿十多磅既陶寶B行足全日, 真係佩服佩服!!!

行到去半山位呢, 影番張索罟灣全景相一定唔可以少呀!

今日天氣真係熱到爆呀, 莎拉既裝束係背心, 2月份著背心真係未試過呢, 不過好彩真係著背心咋, 因為真係熱得好緊要呢, 見到沿途既人著住長就衫都登佢地辛苦呀. 

上到最高點山頂就有一檔賣雪糕雪條, 差不多人人經過都會賣條雪條食抖一抖, 陶寶B都有份食呀, 阿波蘿既雪條真係好經典呢. 

由索罟灣行去榕樹灣呢個決定是正確的, 因為榕樹灣那一邊有相對都多的斜坡, 所以如果由榕樹灣開始行會辛苦好多呢. 最後我們用咗1.5hrs就行完啦, 謝菲嗲嗲勁呀, 真係好過去做Gym呀!

年初五 

今日近近地搵個地方Hea吓食lunch, 目標就係馬灣呀, 今天已經唔係公眾假期了, 所以估計應該係會得小貓三四隻呢. 由青衣MTR站轉搭巴士, 不用15分鐘就到達馬灣了.

 不出莎拉所料, 真係好少人呀, 好清靜哦. 沙灘商場有間泰國餐廳, 今日就選了呢間食個午餐, 哈哈, 真係好呀, 仲有window seat座, 開大個窗吹住微風嘆泰菜, 真係無得頂呢. 

莎拉係一個泰菜lover, 唔知點解咁鍾意呢?!

繼作天陶寶B奇蹟地食大人食物之後, 今天莎拉都只係準備了麵包, Yogurt給他作為午餐, 哈哈哈, 可能有了昨日食過大人食物既經驗, 陶寶B見到我地Order了的炒飯, 主動指住要求食, 今日再出現奇蹟了, 陶寶B食了大碗飯呀(係呢個Moment, 莎拉真係好感動, 因為如果你試過之前佢餐餐都用手食麵/食飯, 唔俾人餵飯既日子, 今日簡直係my lucky day!) 

食飽飽就行下沙灘先, 好想放陶寶B落沙灘自己行了兩步, 不過諗諗吓都係唔好啦, 到時對鞋入晒沙就煩啦. 

影過相就向馬灣公園進發吧!

公園內既遊人真係極少, 選擇今天來馬灣既決定係正確架. 陶寶B見到條樓梯就好開心, 佢自己好叻咁由地面行樓梯上去山頂觀鳥台. 

今日天氣都仲係有少少熱, 上到觀鳥台就已經好熱了. 

上次莎拉來馬灣時已經係好幾年前, 仲係呢度影了不少相, 今次來沒有帶單反相機, 唯有用手提電話影啦. 

行完玩完成個鍾後, 陶寶B放電成功, 已經係回程時乖乖瞓了. 一連玩咗5日, 接下來的幾天就要乖乖留在家中Hea吓啦, 因為莎拉與謝菲都要心拾心情準備返工啦.