終於有offer啦

Yeah yeah yeah!!!!齊鼓掌!!!

經過整個11月密集式既幼稚園面試後, 踏入12月就係等消息既階段了. 每一晚回家腦海中都係響起"打開信箱"呢首歌"打開信箱, 內裡得一片迷茫". 無信會失望, 有信就有希望. 不過就算有信都係失望既多, 因為內容唔係Reject就係waiting list. 

面試時表現麻麻地既都預咗reject, 不過無諗過表現ok既都係waiting list呀, 真係希望愈大失望就愈大. 前前後後都已經收到十多封信啦, 所以就算再有學校信都已經抱住無望既心態了. 

點知到了2014/12/18 (剛好就係莎拉同謝菲既結婚4週年既日子)信箱內再度有學校信, 莎拉再度如常地拆開信封, 點知surprise來了, 係一封學校取錄信, 陶寶B終於有Offer了, 仲要係本區上午校呢. 唔係講笑, 莎拉真係開心到跳起呀!!!! 

雖然呢間幼稚園不是什麼出名既學校, 但係莎拉不是怪獸家長, 自己既底線都好低, 但願有學校收陶寶B已經好開心了, 而家仲要係本區加埋係上午校, 所以已經好心滿意足了. 感恩係2014年既結束前陶寶B有學校收, 信相呢份係莎拉最好既結婚4週年禮物及聖誕禮物喔.