繁華小島@長洲

2015/11/1

每逢到假日, 莎拉都會盡量帶陶寶B離開市區, 遊走離島係首選, 眾多個小島之中, 長洲可以算係最熱鬧既一個. 莎拉都有好幾年沒有去長洲了, 而今次都係陶寶B第一次去長洲添. 一出到長洲碼頭真係人來人往, 岸邊都泊滿了好多小船, 與其他離島既寧靜風情真係好大分別呢.

每次出發前一晚都打算早些出發, 但係次次入到去都差不多食午飯時間了, 大人唔餓陶寶B都餓啦, 所以都係食個午飯先啦. 沿碼頭海旁有好多間中式酒家, 主要都係叫餸形式, 相信呢一排既酒家競爭應該好大, 因為餐單既價錢真係好抵食呀. $188任選4個海鮮小菜. 

雖然我們得2大1小但都叫咗4個小菜($188)加個豉油皇炒麵($40). 唔好以為$188就平嘢無好嘢呀, 4個小菜包括椒鹽鮮魷, 豉椒炒聖子, 羌蔥炒蟹及菜遠牛肉, 真係味味都好好食, 埋單$228免加一真係去邊度搵呢, 係市區或者南丫島都未見過呢個價錢. 

長洲出名小食多, 食飽路過見到長洲平記糯米糍無理由唔試吓, 排隊時諗緊叫兩個(芒果及榴槤)會唔會好飽呢?! 

不過原來個糯米糍真係皮薄料多架, 糯米糍包住好多生果肉, 真係食完都唔會太飽呢, 連平時唔多好糯米糍既謝菲都話正嘢.

陶寶B都食到Lam Lam脷呀.

學生時期既你有無嚟過長洲玩宿營呢? 到了今天, 長洲渡假屋依然非常多人嚟租呢, 因為碼頭對開既渡假屋攤檔真係好多, 仲有唔少係賣"長洲平安包"既記念品呢.

每個離島都一定會見到既海味乾貨.     通往長洲東灣既內街相信係長洲最熱鬧既街道, 因為呢條街就有如小食木人巷. 有長洲大魚蛋, 串燒, 芒果糯米糍, 棒棒薯片, 款式多不勝數. 

N年前嚟長洲時, 當年就只得一間B&B(Bed and Breakfast), 今時今日就在一條短短既內街就已經發展到有好幾間了. 最驚喜就係見到呢幅情人鎖牆, 似乎每個地方都要有一幅情人鎖牆喔. 

除了有小食之外, 仲有好多既小店位處於古老既屋內,主要買既都係本地DIY小物. 

食飽飽後就當然係飯氣攻心, 所以係呢個Moment陶寶就已經瞓咗了. 所以就唯有抱住佢係沙灘度坐吓啦, 吹住海風真係特別爽呀. 

既然陶寶B瞓咗, 我地就食番串長洲大魚蛋先, 大大粒好爽口! 

陶寶B瞓咗差不多45分鐘就瞓醒啦, 瞓醒就精神爽利喔. 

東灣旁邊有個公園仔無咩人, 陶寶B玩得好盡慶呢. 

雖然長洲既遊人都好多, 但係起碼呢度空氣都清新啲, 下次再嚟時要行遠一些先得, 唔好次次去到東灣就掉頭.