AIA又嚟啦

我知我知, AIA昨日已經係最後一日, 而家先出Post係遲咗啲呢, 不過唔緊要, 遲到好過無.

2016/1/2

年尾時知道係聖誕期間又會再有AIA就不知幾咁期待, 因為大時大節去玩呢啲嘉年華係得特別開心架. 上年去AIA時就係日間, 所以今次就決定傍晚時份就入場玩到夜晚. 

上次嚟AIA時, 陶寶B都係得2歲半, 所以未係好去揀機動遊戲, 但今次就唔同了, 一入到場, 見到呢個就指住要玩, 見到另一款又話要玩, 多多意見. 

今年多了好多小朋友啱玩既機動遊戲, 不過有好多遊戲高度如果介乎於90-110CM就需要一位成人陪同先可以玩, 所以其實1大1細就要6個Tokens啦. 而有部份望落比較刺激既小朋友機動遊戲就要每人5個Tokens, 如果1大1細就足足10個tokens($100), 真係好貴, 所以陶寶B都沒有玩到呢種機動遊戲. 場內有幾款車車主題既遊戲, 呢款反斗車王既車車又點可以唔玩呢?!!! 

而呢款不同機動遊戲車型既機動遊戲, 每架車既外型都唔同, 架架都咁靚, 陶寶B揀車時都出現選擇困難症喔.

夜晚既嘉年華真係好氣氛過日間, 晚上既燈光感覺特別浪漫. 

場內既夾公仔機真係好多, 謝菲一見到呢個South Park夾公仔機就立時兩眼發光, 點都唔死心係要夾個South Park公仔走, 最後用了好多token都係夾唔到公仔. 

好啦, 等我出手啦, 睇我表演, 我只係用咗2個token就夾到個minions啦, yeah!!!! 平時唔玩攤位遊戲既我, 一見到有個game既獎品係peppa pig公仔就發咗癲啦, 因為啲公仔真係好得意呀. 

係場內見到好多人都拎住啲戰利品, 我地都唔差, 話晒都贏咗3隻細公仔呀!

場內今次食嘢既地方集中了好多, 唔似上年咁, 呢度一檔果度一檔咁分散. 呢個西班牙大鑊飯及燒雞真係好吸引, 所以我地今晚就試呢兩樣, 味道都唔錯呀, 以遊樂場既質素而言都幾好了.

今期AIA唔知係咪因為有對手(東華嘉年華), 所以現場登記後就可以係1月份既Weekdays免費入場(唔包token), 所以睇嚟1月份我地又會再嚟玩多次, 嚟個happy Friday了!