從前作為一個學生, 最開心就莫過於一年一度放暑假了. 而陶寶B開始了佢既學生生涯後, 今年係第一次放暑假, 而佢間幼稚園既暑假差不多有8個星期, 莎拉又不是FTM, 所以唔想見到佢放假時無無聊聊無嘢玩, 因此就安排咗一啲暑期活動俾佢參加.
莎拉所安排既暑期活動大前題一定係以”陶寶B有興趣為先”, 而另外就係地點要近屋企, 方便家傭姐姐接送. 所以呢個暑假, 首先陶寶B就上了籃球班, 佢係之前試玩籃球時玩得興高彩烈, 所以籃球呢個活動佢一定好鍾意, 雖然只係暑期班, 但都係有晒制服架, 著起立即形晒!!!
有動既就當然要有靜啦, 所以就安排了英文唱遊班, 平時陶寶B都會係屋企唱吓歌, 所以唱歌班就啱晒, 雖然佢係班內最細個位, 有時要寫吓字都未必應付到, 不過佢都好Enjoy!
最後接近暑假尾聲就安排咗學溜冰, 點解會揀溜冰?! 因為莎拉及謝菲都唔識溜冰(shuuuuu,,,唔會話俾人知呀!!!), 所以唯有要佢出去學, 加上學習溜冰既過程係會趺倒既, 愈大個學就會愈怕趺, 所以都係早啲學好啲.
不過起初都會擔心唔知佢鐘唔鐘意玩, 因為曾經聽講有啲小朋友臨場時唔肯玩, 但最後莎拉既擔心真係多餘既, 因為陶寶B係第一堂都玩得不知幾Enjoy, 短短學咗4堂就已經唔需要附作物就已經可以溜到短短距離, 不如陶寶B你快啲學識, 咁就可以教番莎拉啦!!!
No comments:
Post a Comment