15th month成長之路

又一個月啦, 睇吓呢個月既成績表先!!!

體重及身高

今個月沒有機會磅重及度高, 不過覺得重量都應該係差唔多. 平時同陶寶B出街時, 好多人都估佢有歲半呢, 因為佢身長呢, 所以錯覺感得佢好大個呢. 

食量 

唔知係咪之前讚陶寶B食嘢食得乖(讚壞咗!!!),之後呢個月就完全好難餵飯啦, 莎拉試過Weekend自己餵飯時, 陶寶B完全閃避隻匙羹, 搞咗成30分鐘都唔掂, 就算可以將匙飯放入佢口, 陶寶B都會吐翻出嚟. 之後心諗唔通開始唔鍾意食無味嘢, 咁好啦, 加少少海鹽啦, 點知都係唔食. 但如果俾麵包佢自己攞住食就自己食喎. 再問番工人姐姐, 原來平時餵飯要俾啲"BB Cereal cookie"佢食, 之後先可以餵到飯呢. 唉!!!!!幾時開始要咁食飯架?!!!! 真係之前讚壞晒呀. 

莎拉都試開始俾隻匙羹得佢自己餵自己, 不過好似仲未得呢, 控制匙羹未係好掌握到, 唯有遲些少再試試啦. 

活動能力

- 行路已經行得好穩定, 仲識走去跑添, 試過帶佢去公園玩時, 佢會追住跑去找其他小朋友呢. 

- 見到其他小朋友會好開心咁"keekee"聲笑, 真係好得意.

- 學識自己好自如上sofa, 之後係上面當彈床跳, 真係激C, 試過趺過落嚟, 睇少一眼都唔掂呀. 

- 學講嘢進度好慢, 同佢講嘢, 佢回敬莎拉既係"得既得既得既", 教佢講byebye, 陶寶B都係回答"得既得既得既", 想點呀?!!所以近來陶寶B既新花名係"乜都得先生"!

- 指令方面進得依然好慢, 正確嚟講, 好似無咩指令做到呀, 但係莎拉直覺覺得陶寶B係識, 不過唔做之嗎! (自我安慰既媽媽) 

- 同佢玩玩具, 學識會捉住媽媽隻手去幫佢整個玩具或按玩具書既發聲按鈕. 

- 學識扭計既指數高企, 一唔鍾意就"咬"腰發爛渣. 

作息時間 

日間小睡時間愈來愈短, 而家上午食飯前會小睡45-60分鐘, 之後4pm就再瞓90-120分鐘, 而晚上9:30pm就會食奶瞓覺, 早睡就當然早醒啦, 7am-7:30am就會醒啦. 有時weekend想瞓多震都唔得呢, 如果可以8am才醒就真係已經好彩啦. 

健康

感恩一切正常沒有什麼大病或小病, 不過佢門牙啲黑漬真係令到莎拉有啲苦惱呢.