西九龍海濱長廊甩轆遊

話說星期日本來想去沙田同陶寶B踏吓單車, 但因要同家人飲茶, 所以唯有改Plan搵啲近市區既地方玩啦. 之前聽聞西九龍海濱長廊有單車可以租, 咁上網Search過, 間單車鋪係6月份時仲係度, 咁應該沒有問題啦. 飲完茶就搭的士過去西九啦!

點知去到望咗好耐搵咗好耐都唔見間傳說中既單車鋪呢(其實出發前謝菲都懷疑間單車鋪仲係唔係度!!!), 今次真係甩晒轆啦!!!! 

其實間單車鋪執咗一啲都唔出奇, 鬼咩, 星期日都水靜河飛得小貓三四隻, 有鬼生意呀!!! 不過好彩呢度都有啲小朋友玩樂設施, 陶寶B都可以跑吓玩過痛快呀. 

陶寶B一見到其他小朋友玩就會好開心咁笑, 仲想追住人地, 好似想同人地玩, 不過佢見到既小朋友, 全部都大過佢好多, 玩唔埋呢, 陶寶B今日你自己玩住先啦. 

雖然呢度無咗單車租, 但係佢有條木材做既長廊, 係度慢慢行散步望住整個維港景, 真係唔錯呀! 

行到中段, 見到有小朋友既swing, 陶寶B又可以玩番餐啦! 

行完玩完放完電, 再行番去圓方商場, 入到去無耐陶寶B就瞓咗啦, 真係1分鐘都唔駛呀!!! 莎拉同謝菲可以慢慢拍吓拖shopping啦.