恭喜姨姨新婚快樂

2013/10/19 今日係莎拉既細妹大婚之日, 所以真係天都未光莎拉就到達出門酒店W Hotel準備化妝啦. 當然陶寶B就唔會跟住莎拉咁早起身啦, 留番佢同謝菲及工人姐姐遲少少才到.

話晒都係半個主人家, 陶寶B當然要著得隆重啲啦, 早上就著件Sharp醒紅色格仔恤衫加黑色煲呔, 咁樣先可以match番架啦, 不過可能始終都係太早啦, 所以陶寶B個樣有啲未瞓醒.

因為要幫手打點婚禮, 所以接新娘遊戲都睇唔到呀, 呢位靚靚新娘子, 就係莎拉既細妹Sabrina.

接新娘及敬茶儀式過後, 陶寶B都頂唔住瞓咗.

今次抵晒啦, 係W Hotel既suite度瞓覺, 連姨姨都話多個人瞓間房就抵晒!

陶寶B一瞓就瞓咗2小時, 瞓醒叉足電就精神晒, 開開心心又可以搗蛋一番.

大家著得咁靚仔靚女影番張全家幅先得.謝菲今日都要著番件西裝啦, 莎拉記得上次佢著到咁formal好似係結婚時喎, 哈哈哈, 真係limited edition呀, 影多幾張相先得!

差唔多10:30啦, 係時候要趕下一Part戶外証婚+lunch buffet. 細妹揀咗係又一村俱樂部行禮, 呢度有一幅大草地, 真係好靚有啲外國feel呀.

呢個係真既wedding cake, 絕對唔係dummy cake, 又靚又好味呀(莎拉當日食咗2件呀!)

陶寶B見到咁靚既草地, 一定要落地玩吓啦. 呢位小朋友仲走去幫姨姨檢查吓啲Decoration得唔得!!!

跑跑跑, 好似放羊一樣咁自由活動!

哈哈哈, 呢個盒係咪有啲熟口熟面呢?!!

如果大家係幾年前已開始睇莎拉Blog的話, 或者會認得呢!!! Heehee, 呢個就係2年前莎拉結婚時其中一位姊妹為莎拉整既handmade人情盒呀!!! 今日細妹惜咗嚟用, 呢個人情盒又再一次重見天日啦.
婆婆今日著得咁靚靚, 陶寶B都要同婆婆影多啲相先.

莎拉三弟妹, 係咪唔係好似樣呢?!

今日天氣真係非常好, 雖然12:30pm証婚時有少少曬, 不過陽光譜照時影既相特別靚呀. 

祝Sabrina姨姨及Tony姨丈新婚快樂, sweet sweet forever!!!!
食過buffet lunch之後, 陶寶B就先行回家休息吓瞓個靚午睡, 莎拉就繼續留低幫手轉地方迎接晚宴.

其實今早4:30AM起身, 到咗下午時候, 莎拉都已經好攰, 特別係雙腳, 因為平時唔著開高踭鞋呀, 今日著翻夠本啦. 晚上就係山光道賽馬會會所擺酒,

陶寶B同莎拉都要轉一轉Look啦. 一家人真係好少可著得咁隆重咁"行"呀, 唔知真係以為星光熠熠耀保良, hahaha!!!影多幾張相留念吓先得.

今日陶寶B好叻仔超額完成, 平時9:30PM就瞓覺, 今晚去到11pm都仲頂得住未瞓, 乖乖咁得埋莎拉幫姨姨執嘢, 不過一返到屋企12am就即瞓啦, 抵錫!!!