迷上整麵包(附有湯種法食譜)

自從莎拉用咗一個極大既理由(整健康麵包俾陶寶B食)而成功說服自己及謝菲買部P牌麵包機之後, 莎拉就未試過再買麵包啦. 因為如果食過自家製既麵包之後, 真係食唔返轉頭啦, 鬼咩食過好嘢點可以食番差既呢. 所以自此之後就迷上整麵包啦, 莎拉就差唔多每兩至三日就整一次麵包. 起初跟說明書內既麵團份量, 但係麵包放多二日就會變得好乾, 所以就試加湯種整麵包, 出嚟效果真係鬆軟好多呀. 另外自己整麵包可以加啲小麥粉代替部份高筋麵粉, 咁就可以食得更加健康啦.
平時買麵包時見到不同既麵包造型, 睇就以為好容易, 但原來自己動手整時就先知一啲都唔容易, 真係要練習多啲整多啲先可以呀.

湯種:
20g 高筋麵粉
100g 水

做法: 
1) 在小鍋內加入水及高筋麵粉, 用細火慢慢加熱及搞勻, 當麵粉糊搞至杰身後就離火, 放在一旁待涼備用.

麵團材料: 
180g高筋麵粉
70g小麥麵粉
奶粉 6g
糖 15g
鹽 4g
蛋 35g
牛奶 70g
牛油 20g
酵母 5g

做法: 
1) 將湯種及所有材料(除了酵母)放入麵包鍋內, 酵母放入酵母箱.
2) 選用麵團麵包模式(Panasonic SD-P104型號).
3) 將麵團分割成8份, 之後滾圓排氣, 蓋上濕毛巾待鬆弛15分鐘.
4) 搓揉麵團, 造所需要的造型及放入餡料之後再進行第二次發酵30min
5)完成發酵後在麵團上掃上蛋漿, 180c焗15-18分鐘

Tips: 
1) 本身預定麵團麵包模式大約係1hr, 但莎拉覺得發酵度未足夠, 所以會將麵團留在機內留多20分鐘發酵.
2) 麵團取出時會好粘手, 所以可以用小量高筋麵粉拍在手上, 但不要使用過多麵粉.
3) 麵包發酵既速度極度受室內溫度及濕度影響, 因此當取出麵團出來分割, 排氣作鬆弛時, 莎拉會在廚房內煲一鍋水然後熄火, 以便增加室內的溫度及濕度.
4) 完成搓整造型後, 需作第二次發酵, 可放在微波爐或焗爐內而旁邊放一杯熱水, 可以加強溫度及濕度有利發酵.