17th month成長之路

體重及身高 

自己係屋企用磅度過, 陶寶B而家重約25磅啦, 近來同陶寶B出街, 謝菲用Hipseat孭佢時, 連佢都話好重, 孭完佢好似散咗咁, 鬼咩, 出街時嗲嗲孭住陶寶B, 仲要孭埋個奶粉袋, 加加埋埋差不多孭咗成40磅嘢上身, 唔散就奇啦. 所以睇嚟好快就要出動用較為輕便既士的stroller出街啦. 

食量 

今個月既情況同上一個月差不多, 食飯唔係佢既強項, 食水果才係呢. 每一餐都可以食到大半碗至一碗飯仔, 莎拉試過俾大人飯加少少餸汁, 但都係唔肯食, 點解呢?!!! 有啲BB反而唔鐘意食BB飯仔, 偏偏陶寶B就剛好相反呢!!! 不過如果唔係大人餵, 就咁放係佢隻碗度, 俾隻匙羹佢試自己食, 佢完全唔用, 佢就會用手自己放入口, 想點呢?!!!成個外族人咁吓吓用手食嘢. 不過都有一樣嘢係乖既, 就係陶寶B真係會乖乖食水果, 希望佢呢樣乖乖食水果既HABIT可以Keep住啦. 

活動能力 

-今個月既新玩意係"數人仔", 點玩呢?!其實係同佢一齊睇書, 之後同佢數呢一頁有幾多個人, 愈多人佢就愈開心(呢個咩遊戲嚟架?!!!) 

-係家中不停地原地跳跳跳, 好似裝咗彈弓一樣可能non-stop咁跳5min, 跳到出汗, 如果大人跟住佢咁跳, 真係一定會瘦, 鄭多燕都唔使跳, 一定可以減肥成功呀! 

-玩Robert遊戲, 點玩呢, 又係莎拉既自創遊戲, 玩法係陶寶B企係大人腳上, 之後行, 行既時候仲要加埋配音"銀牙...銀牙"咁呢, 相信呢啲咁無聊既遊戲係莎拉先諗.

-學識飛吻, 不過唔會係人都飛, 暫時都係只會對屋企人先會. 

-除咗飛吻, 仲會錫錫, 不過又係要心情靚先會呢. 

作息時間

無咩改變, 同之前差不多, 9點半瞓, 約7點半起床, 莎拉都知道已經係不錯架啦, No Complaint. 

健康

唔知係咪可能"牛牙仔", 所以簡唔時一次便便會偏水啲, 之後就正常翻呢.