陶媽媽生日-Sorriso

2013/11/4 

又一年啦, 又大一歲了, 以前細過既時候, 每年對自己既生日係好重視同埋好快就答到人地自己幾多歲, 但而家就唔同啦, 每年生日真係要計一計數先知自己幾多歲呢. 今年正日生日係星期一, 所以都係諗住放底陶寶B, 同謝菲二人世界食個晚飯呢.

早上時已問謝菲會去邊度食, 佢就固作神秘, 只係話係I-Square. Um,,,好啦, 等到放工啦, 相約好就一齊向尖沙咀出發哦! 差不多去到I-Square, 問謝菲食邊間, 佢就話食"上海婆婆", 莎拉就答"好呀, 我今日下午去咗飲茶仲有啲飽, 食中國嘢好過食西餐, 無咁heavy呢".

點知去到I-Square既水牌位, 莎拉仲懶醒咁話"咦, 上海婆婆係6樓呀", 點知謝菲話"係29樓唔係6樓呀!!!" 莎拉就快速咁望到29樓得兩間餐廳: 一間係"阿一鮑魚", 另一間係"Sorriso Italian Restaurant". Um,,,,心諗唔係會係中菜"阿一鮑魚"咁驚喜呀, 應該係另一間西餐廳似樣啲.

電梯門打開, 答案問估啦, 無錯係"Sorriso"!!! 謝菲一早已book定window seat, 29樓望住咁靚既維港夜景加上有live music, 真係perfect, 不過可惜今晚有少少雨, 影響咗少少.

兩個人就點一人一個5-course既set dinner, $560/person (有20%off), 咁即係約$450. 以呢個價錢, 有靚景, 有music, 以fine dine嚟講真係唔算貴呀!

雖然話就話唔係好肚餓, 但係一座低就好期待今晚既birthday dinner. 

Order咗之後, waiter就送上意式麵包配上house blend既蕃茄醬. 個麵包暖暖的, 加少少蕃茄醬好好味呀, 近排成日食自家製既麵包, 所以對麵包既要求都高咗呀, 呢個麵包絕對係好味之選, 因為食得出好香既麵粉香味同果種home made麵包有既咬勁感呢. 

好啦, 第一度就係新鮮生蠔2隻, 今次食既來知美國既生蠔(侍應沒有介紹生蠔既名, 只知係美國嚟既). 雖然生蠔細細隻, 但都好新鮮呢. 

之後就係頭盤啦, 莎拉就揀咗個"雞肝焦糖布丁", 而謝菲就係"鱄魚他他配蕃茄清湯".

雞肝焦糖布丁其實係雞肝醬上面有一層既焦糖, 配上裸麥多士(rye bread)一齊食, 聽個名就好似麻麻地, 但係點知食落就好好名呀, 雞肝醬無鵝肝醬咁rich咁滯, 連謝菲都話好味呀, 仲叫莎拉試吓整呢個雞肝醬呢!!! 

相反謝菲既"鱄魚他他配蕃茄清湯"聽個名就以為好掂當, 一定好食, 但係點知食落就好普通, 謝菲仲話莎拉之前整既三文魚他他仲好味啲呢. (wakaka!!!) 

跟住就係海鮮湯啦,  蝦, 青口及蜆配上蕃茄湯底, 但幾好味, 飲完沒有口乾既感覺呀. 

接住就係Main course啦, 莎拉就點咗"波士頓龍蝦配扁意大利粉", 而謝菲就選"炸牛仔扒配火箭菜". 三個main course既選擇裡面, 本身對個炸牛仔扒有啲期待, 但係點知味道真係好一般, 可能因為係炸既關係, 真係唔多似有食緊牛仔扒既味道. 

反之而個波士頓龍蝦配扁意大利真係有驚喜, 莎拉第一啖食啲意大利粉時係用"好好味"嚟形容, 因為啲意粉用蟹膏汁煮, 所以食落有好濃郁既蟹膏味道, 就好似啲意粉沾上龍蝦既膏一樣, 而龍蝦都好彈牙, 食完整碟意粉後有"唔夠喉"既感覺呢. 

食完main course後, 一定要付飲翻杯coffee, 再加個dessert, 咁先可能叫做一個perfect dinner!!

莎拉正係度嘆緊杯咖啡之時, 失驚無神餐廳既註場樂手走來我們張檯旁之後唱起"happy birthday及中文版既生日歌!

而侍應就俸上寫有"Sarah Happy birthday"既甜品. 

吹過生日蠟燭後, 謝菲就遞上一個紙袋, 內裡係一個有"Log-on"字樣既花紙, 莎拉就豪不客氣拆禮物啦, 拆呀...拆呀...依,,裡面又再係另一層"Log-on"字樣既花紙既嘢, 搞咩呢?!!好啦, 繼續拆呀...拆呀....omg, 內裡係一個Tiffany既禮物盒呢, 

原來前一排莎拉行街時講過一句"um,,,好想買件Tiffany既飾物呢!", 而謝菲就靜雞雞買咗條Tiffany既頸鍊, 估唔到佢會記住咗呀!

真係好開心呢, 與謝菲一起渡過十五個生日, 今次都係第一次謝菲一早book位時就安排晒呢啲音樂及speical dessert再加上咁神秘既禮物, 真係好感動呢, 因為謝菲一直都唔係啲好浪漫既人, 記憶中對上一次有呢個感動既feel好似係求婚既時候呢, 不過真係勢估唔到結埋婚生埋囝之後, 仲會突然嚟個浪漫, 真係反高潮呢, 多謝老公為莎拉帶來呢個快樂及浪漫既晚上.