迪欣湖野餐記

2013/10/13

踏入10月份, 聞到秋天既氣息啦, 戶外活動又可以開始啦. 諗起秋天, 莎拉就諗起野餐. 其實一直都好想試吓野餐, 因為總係覺得會好好玩既一個戶外活動. 重陽節既Long weekend難得有三日假期, 就不如一家三口嚟個野餐. 我們的第一次野餐就揀咗去迪欣湖, 莎拉係5年前都去過迪欣湖, 當時對佢印象係又熱又無嘢玩. 但係今次就唔同啦, 雖然有好多人嚟玩, 但係地方夠晒大, 一啲都唔覺得擠迫, 加上係呢度唔多見有B6人, 真係唔錯呀. 

入到迪欣湖首先揀個好位唔曬既, 之後就Set好位準備開餐啦!

雖然人少少得三個人, 但係莎拉都自己準備食物, 咁先係真正既野餐呢. 是日野餐Menu有: 蜜瓜配風乾火腿, sweet sweet雞翼, 生果拼盤, 壽司(呢個買既), 最後就係poppy seed cookie做甜品. 

而陶寶B既Menu就係有包包及yogurt. 今日晏咗食Lunch, 所以陶寶B都唔理三七二十一自己食先啦. 

Set好個位, 莎拉都唔客氣食嘢啦!!! Um,,,,,好味道呢, 唔知係咪因為係咁舒服既環境底下食, 所以好似特別好味道呢. 雖然話就話開始秋涼, 但係下午陽光譜照時都有熱架, 所以食啲冰凍既水果真係特別正呀. 

陶寶B食完包包都食生果呀, 佢本來食緊楊桃既見到咁Colorful既士多啤梨都想試吓. 正呢, 好味呢!!! 食完一粒之後仲追住莎拉攞呢. 

食飽就係時候玩吓啦. 迪欣湖地方真係好大, 如果俾陶寶B 係度Free run, 佢應該走唔晒啦. 

呢位小朋友有得跑跑跳跳就成個生猛晒, 莎拉想拖住佢慢慢行都唔得, 陶寶B一手"Fing"走我隻手呀, ai~~~而家大個啦, 有毛有翼啦. 

陶寶B實在跑得好快, 莎拉終於明白啲防走甩帶既用處啦. 莎拉本來買咗支吹泡泡水, 但係因為太原始口吹泡泡, 所以啲泡泡唔夠多, 唔夠好玩呢, UM....下次要買支泡泡槍先得!!! 玩咗一陣都夠晒皮, 陶寶B面仔都紅晒出晒汗啦. 座低逗吓好唔好?!

迪欣湖出口度仲有一個公園仔, 埋面啲設施都好啱小朋友玩架, 所以臨走前都入去玩設一陣先.

今日成功放電, 去到MTR位時陶寶B又已經瞓咗啦!!! 好嘢!!!!