體重及身高
18個月時返健康院打針時磅過有11.15kg(約24.5lbs), 介乎在75%的生長線, 滿意滿意!!! 前一排大減價時, 莎拉瘋狂咁買定好多衫俾陶寶B, 估唔到佢實際現時18個, 但莎拉就已經買3T Size啦, 因為而家陶寶B已經著緊2T, 唔買大啲點得呀.
食量
之前一直都已經食飯食都好扭扭拎拎架啦, 自從流感病一病之後, 情況更加嚴重, 用匙羹餵佢食BB飯, 陶寶B一見到隻匙羹就左閃右避, 點逗都唔掂, 諗住俾隻羹佢自己食, 佢一啲都唔想食, 餵飯餵都個人都灰晒. 最後發現, 佢唔係唔食, 不過係現自己食, 飯都唔使諗啦, 所以近來改食通心粉. 不過呢位大少食都食都好麻煩, 因為點都係用手攞嚟食, 俾隻羹或叉佢, 佢一啲都唔想用, 唉~~~真係唔知幾時先可以戒唔用手食. 除咗呢樣麻煩嘢, 仲有就係揀嘢食. 如果一碗粉內有肉, 菜及粉的話, 陶寶B係會揀晒啲菜嚟食, 盛番啲肉及粉. 所以佢開餐都有個攻略(唔知以為打機呀!!!), 就係先俾少量粉佢食, 之後就加啲肉俾佢, 當見佢食到差不多7成飽時, 就再俾埋啲菜佢, 未食菜之前係唔能夠俾佢見到啲菜, 因為佢係會係咁扭計問你攞菜食, 呢位朋友真係好得好麻煩呢. 雖然佢係食得麻煩, 不過佢唔係完全唔肯食嘢, 只係有所要求(唯有阿Q啲咁諗啦!). 不過佢都有抵讚之處, 就係食水果呢方面真係一啲都唔需要粗心. 另外, 試過俾雞翼及雞槌, 陶寶B都可以自己撕啲雞肉出嚟食, 仲食得好乾淨呢. 仲有就係試過同陶寶B一齊Share食蛋糕/雪糕, 佢食都不知幾滋味呀, 有時仲唔肯收口添呀.
活動能力
18個月時係健康院做既評估, 結果係fail唔合格. 點解呢?!!咪就係衰咗係講嘢呢方面(其實莎拉一早已經預咗). 陶寶B講到最清晰及清楚既字句: "嗲嗲", "Bye bye"(陶寶B發音係"Dye dye"), "奶奶" (間唔時講), 仲有一句莎拉聽唔明同估唔到既係"得既得既". 好明顯啦, 陶寶B識講既相比起同年齡既小BB真係實在太少啦. 另外就係陶寶B想要大人幫佢拎埋啲嘢時, 佢唔會講, 只係會"拉"我地去, 用身體動作去表達, 所以咁樣係唔合格既!!! 雖然健康院既姑娘都安慰莎拉, 好多小朋友都會係18個月評估Fail, 所以有個buffer俾佢地, 到2歲時再返去評估, 不過如果到咗2歲都fail, 就有需要轉介去醫生度(唉~~~~驚驚呀!!!!)希望嚟緊既5個月可以大大進步啦!
陶寶B係音樂方面係比較敏感, 同佢唱歌係好開心, 最近新歌係"London Bridge is Falling Down", 陶寶B識得係條橋下走來走去, 到首歌最尾個句會知我地會捉住佢. 呢外"Head should knee and toe", 會跟住我地做動作呢.
另外仲有就係主動畫畫啦, 之前買咗啲顏色筆俾佢, 不過當時唔多識玩, 近排就會識得畫吓線.
最後就係識玩拋波遊戲, 佢會主動取個波之後就向上拋既動作.
作息時間
呢排都係無咩改變, 都係9點半倒就會上床瞓, 不過係間唔時會醒瞓, 會"er"兩"er", 不過俾番個奶咀佢食兩食就會瞓番. 早上就約8點-9點才醒, 可能天氣近排凍, 所以都晏咗起身.
健康
好多牙仔係呢個月明顯地爆緊出嚟! 1月頭感染咗流感住咗幾日醫院, 感恩而家已經好翻啦, 可以繼續搗蛋了!!!
新年快樂呀莎拉 =) 好彩Ethan係鍾意食菜多過肉呀, 唔係第時大個左, 逼佢食肉應該會易過菜好多呢!
ReplyDelete