身高及體重
好快就會天夏天了, 出街時都會留意下夏季衫, 每次想買衫時考慮究竟買咩size時都好苦惱, 因為陶寶b真的高得好快, 與同齡小朋友泊埋, 真係高人地成半個頭架. 而家2T都是剛剛好, 如果買3T而家著又會大了唔夠Fit, 所以真係好似人生交叉點咁, 不過莎拉有慳家C9仔既本色, 當然最後會3T啦, 著多一年抵啲呀!
食量
發現陶寶B其實都係胃食豬嚟架, 好多時午餐佢已食飽了, 但當見到大人開餐時佢又會想食埋一份. 今舍月仲發現陶寶B對粉麵類既食物係有特別偏好(呢一樣就似晒莎拉), 煮個白烚米粉, 陶寶B都可以食得津津有味, 真係估佢唔到. 今個月開始俾佢試自己用餐具食, 食到3-4啖後就開始好心急唔耐煩, 又用手攞嚟食, 所以下個月要加倍努力, 再接再厲.
活動能力
-說話能力進步極度緩慢, 今個月對水果講會講"Banana", 有一兩次聽到佢講類似"dog"及"車車". 好多人都話小朋友學講嘢會係到了某一天"叮"一聲咁, 之後就講得進步神速, 莎拉都知道急都急不嚟, 迫又迫唔嚟, 唯有keep住同佢講多啲.
-今個月既扮嘢技能特飛猛進, 因為發現佢會重復扮"插水"嚟表達不滿, 模求令大人屈服, 不過你精我唔笨, 呢啲奸計已被莎拉識穿, 所以佢呢招"插水"對我係唔Work架.
-近來好鍾意玩cheers, 每次食早餐, 午餐或晚餐, 佢一攞起自己隻飲水杯, 佢就會要同檯既人cheers, 試過飲茶時, 你得一個人同佢cheers係唔夠, 陶寶b要成檯人一齊cheers, 真係俾佢笑C.
-好鐘意扮大人講電話, 一有電話响, 陶寶B就自己係度"Gee lee goo lu"咁扮講電話, 每次都係咁好笑.
-有一兩本書會主動要求同佢一齊睇, 同佢講故仔, 不過講唔夠3頁就無心機, 自己要去下一頁了.
作息時間
唔知係咪天氣唔好, 有啲濕濕up up, 所以陶寶B瞓得唔好, 好多時半夜會醒, 之後唯有上大人張床一齊瞓. 為了佢瞓得"林"啲,唯有開泠氣啦. 另外而家瞓覺時要攬住Teddy Bear一齊瞓, 好sweet架. 健康
大至上身體一切正常(感恩呀!). 另外陶寶B啲牙仔自1歲後就唔知點解愈來愈黑, 就算有刷牙仔, 啲漬都好嚴重, 有時啲人都會問點解佢啲牙咁黑, 莎拉都唔知點答. 終於今個月同佢去睇牙醫, 牙醫就話有啲小朋友牙齒比較粗糙, 所以好容易上漬, 暫時都沒有辦法, 唯有等佢大啲洗牙, 不過不用擔心, 唔會對健康有問題, 只是外觀問題. 其實牙醫所講既嘢, 莎拉之前已經知道, 不過為了安心就想親自俾牙醫睇一睇呀. 近日, 陶寶b啲牙潰好似有所淺色了, 晚上除了刷牙, 莎拉仲會幫佢抺牙仔, 希望呢兩個動作真係有幫助啦.
No comments:
Post a Comment