單拖復活去石澳

當人人期待復活節4日長假期之時, 莎拉就係另一群沒有復活假放既人(真係唔知點解政府會分公眾假期及法定假期), 仲要撞啱星期六長週, 所以莎拉只得星期日一天咁大把咋. 咁啱得咁蹺星期日謝菲爸爸回鄉拜山, 所以今次就唯有一個人孭住陶寶B入石澳參加好朋友Wendy姐姐既surprise beach+BBQ party. 下午等陶寶B瞓醒個晏覺後, 就向石澳出發啦. 大家都知同小朋友去得沙灘需要帶幾多嘢架啦, 所以莎拉孭住重磅既陶寶B之外, 仲孭咗一大袋衫, 食物, 玩具, 真係不能夠不給自己一啲掌聲呀, 因為呢一刻覺得自己係Iron Mama!!!!

由旺角出發搭地鐵去筲箕灣, 再轉小巴入石澳, 展轉1.5hr終於都到石澳啦. 點知呢個小朋友唔知係咪拍生保, 或者因為除了媽媽既面孔, 其他人既面孔都好陌生呢, 所以一見到其他人就喊爆, 只肯給莎拉抱住, 放底都不能, 哈哈哈, 平時好得戚既陶寶B去了邊度呀?!!!!機會難得, 要影你呢個樣先得! 

終於Warm up了一陣就唔再驚啦, 我地去玩衝浪啦!!!!! 

還記得上兩個月去華欣時, 陶寶B怕啲浪, 但係今天就又唔再驚啦, 仲玩得好開心呢. 

今天除了有陶寶B呢位小朋友一仲有呢外一位細過陶寶B既Curtis BB啦. 今天莎拉沒有買玩沙玩具, 所以同Curtis BB一起玩啦, 今次都係陶寶B第一次玩沙啦, 上年同佢去沙灘時佢都仲未識玩, 今日佢仲好得好開心呀, 睇嚟今個夏天都要準備堆沙玩具, 做個Beach boy啦. 

玩了一陣就沖身換衫, 因為要開始今日第二part活動-BBQ! 莎拉今天都帶了蕃茄牛肉飯俾陶寶B, 之前都好擔心, 在沒有High chair及沒有謝菲爸爸在場幫手的情況下, 究竟自己一個人可否成功餵到呢餐飯呢?! 答案係YES, 仲要係大成功呀! 莎拉襯個BBQ爐未Set好, 就快快手同陶寶B開飯先, 免得人多時會分散佢注意力. 陶寶B自己乖乖座係張櫈度, 等莎拉大啖大啖餵佢, 唔駛30分鍾就消滅晒啲蕃茄牛肉飯, 仲好似有啲唔夠喉添, 所以到咗大人BBQ時, 陶寶B就同莎拉一齊Share食呀!!!玩到9pm陶寶B已無咩電啦, 回家途中就已經瞓了. 

今天呢次單拖歷險記係成功既, 不過都好感謝陶寶B既合作, 唔扭計又乖乖食飯先令到莎拉有啖好食, 否則就真係長途跋涉自己攞嚟.