[市區放電] 踩單車@賈炳達道公園

2016/10/8

作為一個市區人, 每次想同小朋友踩單車都一定只會諗起大埔大美督, 因為一條直路比較適合初學人士. 但如果想係市區內安全既地方踏單車, 除咗西九龍海濱長廊之外, 市區內其實原來有唔少公園都有踩單車既設施, 今次就去了九龍城既賈炳達道公園.  公園內只有一檔鋪頭租單車, 小朋友單車時租$40/1小時, 價錢合理. 

陶寶B揀好車(又係佢至愛既綠色)就玩啦! 公園內既單車徑集合了平路及斜路兩類路徑, 而斜路都有分多種不同既斜度, 對於小朋友真係已經好好玩了. 

陶寶B之前一直都係在平地踩單車, 今次都係第一次踩斜路, 點知上斜時, 呢位懶豬豬話踩唔到, 要落車推上斜路, 哈哈哈, 真係有無搞錯呀?! 

一去到落斜時, 陶寶B又唔識剎制, 落斜時快到無影, 嚇到莎拉拿拿淋跑上前”Dup”停佢. 

知道陶寶B唔識剎制後, 就當然重點訓練佢要學剎制了, 大約學咗15分鐘後都叫做初步掌握到技巧. 整個單車徑上上落落, 對初學踩單車既小朋友真係一個學習好地方. 除咗有個單車徑之前, 呢度仲有個小小的平地圓形練習場, 大人可以企埋一邊等小朋友係個圈度自己踩都可以. 

唔經唔覺踩吓停吓玩咗3個圈, 咁就玩了1小時了. 還咗車, 拍拍手咁就可以走人, 九龍城踩單車既好處就係玩完後, 就可以行去附近食泰國菜又可以, 或者去九龍城街市買靚材料返屋企打邊爐又得, 真係好方便喔.

陶寶b與莎拉媽