8th month成長之路

體重及身高:
終於呢個月發現陶寶B出牙仔啦, 2隻都係下門牙, 陶寶B唔洗再做無牙仔啦. 陶寶B連埋片片及衫一齊磅大約係9kg, 咁即係話陶寶B又大隻咗啦, 相信約今個月都重咗1磅倒啦, 陶寶B Keep住go go go呀!!!! 陶寶B係啲SIZE中碼既BB, 身上唔會太好肉地, 不過大家都話佢既SIZE好好呀, 唔太肥又唔太瘦, 好似靚叉燒一樣呀!!! 

食量:
依然都係keep住5餐奶, 一餐粥仔及一餐水果蓉. 不過唔知係咪出牙仔既原因定係因為有少少傷風咳咳, 呢個月尾唔太鍾意食奶, 有時食得2-3oz, 一餐奶係度又玩又食, 自己拍走個奶樽, 有時餵奶餵到好似打仗咁呢, 真係比佢激C呀!
而粥仔都會主要係魚加蔬菜, 不過下個月就會試吓俾陶寶B食雞肉. 而水果蓉呢方面, 牛油果及香蕉係陶寶B既至愛, 每次餵佢都食得好快呢, 睇嚟陶寶B都係鍾意食啲杰身既食物.

活動能力:
- 識得"Bu"口水及"Bu"食物, 呢個唔要得呀!
- 超級電視精, 當你阻礙佢視線, 佢會撥開你隻手.
- 繼續好鍾意玩躲貓貓.
- 扶住佢時, 可以自己扶住企一陣
- 座都可以, 不過座座吓就烏向前之後扒底.
- 發出既聲音多咗, 比較多既音調係"dada"及"jaijai".
- 非常識定如何扭計及詐喊嚟表達唔鐘意及不滿.

作息時間:
可能因為有少少傷風咳咳, 所以有個星期瞓得太好. 再加上出牙仔, 所以有啲煩躁不安, 試過有幾晚因為最尾餐奶食得少, 所以半夜就醒咗要食夜奶先瞓得翻. 另外, 陶寶B日頭瞓既午睡都係30-45分鐘, 佢自己好快就會自然醒呢, 莎拉見好多BB既午睡都好長, 唔知有咩辦法可以係日頭瞓得"林"啲呢?!

健康:
因為出牙仔, 所以個人比較"文". 而今個月出現少少傷風同咳, 希望佢快啲好翻啦.

三人情人節

莎拉有兩個情人, 一個係大情人謝菲, 而另一個係小情人陶寶B, 兩個既地位都係咁高, 無可代替, 莎拉兩個都咁愛呢.
今年既情人節, 莎拉同謝菲都係放假中, 但係因為而家小情人陶寶B係話晒事, 所以都要就一就佢. 因為無人湊陶寶B, 所以今年既情人節就要三人行啦. 情人節當然要有莎拉至愛既玫瑰花, 新精頭紅色既玫瑰花就最啱啦.

而好開心既小情人就著到好英咁款同莎拉出街食Lunch.

陶寶B回鄉記

每一年莎拉娘家既傳統都會返大陸過新年, 而今次係陶寶B既第一個農曆新年, 所以就試吓第一次帶佢出門啦. 同BB出門真係好多嘢準備, 雖然只係3日(實情加埋只係48小時)既行程, 但係就足足拖咗個大喼, 因為衫又要帶多啲作後備, 又要帶佢既玩具, 紗巾及口水肩帶咗N條, 仲有重點係帶咗2支水用嚟開奶及整粥仔, 避免出現水土不服.

平時莎拉去番禺都係搭直通巴士, 但係車程都要差唔多3.5HR, 而今次因為帶陶寶B同行, 所以就改搭船, 因為一來行程短啲, 二來萬一陶寶B扭計, 莎拉都可以企起身氹陶吓寶B.

大年初一搭下午16:15船, 所以就之前沖定涼先出發, 而為咗方便上落及減輕行李, 所以今次出門就無用BB車, 反而就同用i-angel 既hipseat carrier. 陶寶B出發啦, 入咗閘等落船中, 陶寶B頭望望四圍look.

恭喜發財賀蛇年

恭喜發財!!!利是逗來!!! 今年係陶寶B第一年過農曆新年, 要著靚仔啲同大家拜個年先!!!!

陶寶B祝各位姨姨及姐姐日日都咁靚, 同Honey日日都咁sweet, 年年搵大錢, 蛇年行大運, 掂過碌蔗!!!

莎拉媽媽就祝所有BB及小朋友身體健康, 聽教聽話, 快高長大, 學業進步!!!  

肥糖糖與陶寶B

大家還記得莎拉娘家有隻貓貓叫肥糖糖嗎?! 陶寶B未出世前, 肥糖糖就係家中既baby, 但當陶寶B出世後, 有咗真係既baby之後, 肥糖糖就成為後備baby啦.

無法啦, 肥糖糖張就張就吓啦. 咁究竟肥糖糖與陶寶B既相處如何呢?! 其實可以講係頭6個月, 佢地係零交流, 河水不犯井水, 肥糖糖又唔會特登跳上去睇陶寶B, 反而每當肥糖糖聽到陶寶B喊時, 仲會走夾唔頭, 掉頭走開啲添. 不過當陶寶B大啲, 當肥糖糖係佢面前行過時, 陶寶B會望實佢, 可能佢諗緊"係我面前行嚟行去, 你邊位呀?!".
所以都係時間俾佢地嚟個交流啦, 抱住陶寶B等佢摸摸肥糖糖先!

陶寶B: "你係咩嚟架?! 點解個身咁多毛既? 點解你咁肥既?!"
肥糖糖: "細路, 咪亂摸呀, 我怕咗你!"