2012/01/31

與陶寶B一起的日子- W5-W9

Week 5
自己Period都係好準既人, 但係呢個月足足已經遲咗成個星期啦, 心知有啲唔多陀呢. 雖然同謝菲都有諗住生BB, 但係唔係今年呢, 本來係諗住係下年或後年先開始做人.
不過都要用謝菲講呢 "我Period遲咗1星期呢,,,,,俾多幾日時間我呢, 可能無嘢既". 但其實心裡都知有啲自己呃自己!

Week 6
我地拍拖13週年既前夕, 星期五一放工就去買咗支驗孕棒, 返到屋企自己check. 反覆睇咗好多次個instruction, 清楚明白之後就行動啦. 如果有兩條紅線就代表懷孕, 真係10秒都唔駛就見到出現咗2條紅線啦. 當時個心真係有啲離一離, 好忐忑不安, 雖然明知懷孕既機會好大. 但係總係好似未係好接受到. 當謝菲返到屋企, 佢一入門口, 我就講"我有啲嘢同你講呀"未講完呢句說話, 謝菲就講" 你有咗BB". 我一聽到佢咁講就攬住謝菲喊, 喊到收唔到聲. 謝菲就同我講一定係佢之前俾我既感覺以為佢唔想要BB, 猛咁同我講對唔住, 因為佢俾咗個錯覺我, 佢絕對無諗過唔要BB呢.  (莎拉真係傻到無朋友呀!). 我地倆口子都好似一時間唔係好接受到, 不知所措, 要少少時間去消化呢個Big Surprise.

Week 7
星期一去家庭醫生度confirm pregnancy, 跟手醫生就俾張醫生轉介信我, 等我可以去醫院排期, 過咗幾日我就拎住張轉介信去廣華醫院排期啦, 莎拉有諗過去私院生, 但睇一睇有關價錢, 真係一啲都唔平呢, 都係唔好諗咁多住, 排咗政府醫院先啦, 如果唔係連位都無呀. 我有咗7weeks都已經去登記, 估唔到政府既產檢要排到week 18先有第一次checking, 真係嚇C人啦!!! (深深睇會到雙非內地孕婦對香港既影響呢) 所以都無諗住靠政府做checking, 都係自己搵私家做產檢呢.

Week 8
自從知道有咗之後, 唔知係心裡作用定係真係身體起咗變化, 而家對打邊爐, 牛腩煲既濃味食物氣味好抗拒, 聞到或諗起都想嘔呀! 有時係Office, 有人order下午茶, 聞到啲嘢食味都會嘔呢. 而食嘢就更加無胃口, 明知自己係肚餓, 但係真係食咗嘢就好似頂住頂住, 特別係晚上個餐, 完全唔想食, 就算食都淨係想食菜呢, 好辛苦呀!  而呢個星期, 總共嘔咗4次, 真係前所未有既辛苦呀!!!!
除咗無得好食之前, 仲要戒咖啡呢, 莎拉一向都係咖啡精, 每日一杯咖啡就一定架啦, 所以呢一段無得飲咖啡既日子真係好難過呢, 有時無得飲都好想聞一聞呀!!!!

Week 9
今個星期謝菲陪我去咗睇婦產科醫生陳麗燕, Heehee, 原來BB已經9weeks 5days啦, 身長2.95cm, 第一次聽到"陶寶"既心跳真係好得意好微妙架, 之前聽過有媽咪第一次見到BB時會感動到喊呢, 原來當自己置身其中既時候, 真係會不其然感動到流眼淚呢!! 因"陶寶B"太細呢, 所以陳醫生要用陰道超聲波照BB, 穩約仲見到BB既手仔同腳仔, 好得意呢.
張想影到陶竇B好似小魔怪咁, 好CUTE呀!!!!

 
而醫生另外發現我子宮外面有個纖維瘤大約4cm, 好彩佢生係出面, 而唔係入面, 所以對BB及我沒有太大影響. 不得不讚一讚陳醫生, 對於我地呢啲Mom-to-be, 入到去好多問題問, 但係陳醫生都好有耐性去一一解答, 一啲都無話唔耐煩呀! 讚呀!!!!

  

2012/01/30

遲來既恭喜發財

襯仲係新精頭, 係度要祝大家新年快樂, 身體健康, 事事順利, 恭喜發財, 家庭美滿, 開開心心, 行運一條龍呀!!!!!

今個農曆新年真係好凍呀, 印象中真係好似好耐都無試過又凍又落雨啦, 謝菲仲陪莎拉上咗大陸幾日呢, 所以係大陸個幾日仲凍多一兩度呀!!!!

今年已經係第2年派利是呢, 不過最特別係因為今年有咗"陶寶B", 所以有啲親戚知道既都封多一封利是俾BB呀, Wakaka,,,真係未出世已經收利是啦, 好so呀!!!

"陶寶B"既收穫都唔差架, Heeheee!!!

2012/01/19

莎拉成為龍媽媽啦

終於都過咗3個月啦, 可以大大聱同大家講"莎拉有喜呀!!!!!!!!!!!!"

呢一排莎拉點解咁懶無咩點update個blog, 咪就係因為呢一個原因囉. 因為自從有咗之後, 成個人都變得好容易攰, 每晚唔夠11PM就已經睇睇吓電視瞓著咗. 加上晚上又成日嘔, 攪到個人都無咩心機去開電腦睇Blog, 所以近排都少咗去探其他blog友仔呢.

雖然今次成為龍媽媽對莎拉同謝菲嚟講, 都俾我地預期早咗啲, 由開始時既不知所措到而家已經開心接受呢一份天賜俾我地既禮物!

而莎拉已經開始諗緊係呢個時候點樣叫呢個BB呢, 謝菲姓陶, 不如叫"陶寶"啦, 幾貼切呀, 哈哈哈!!!!
 

2012/01/16

高Go糕 - 蘿蔔糕及馬蹄糕 (附食譜)

農曆新年又好快到啦, 行街時都見到已經有好多賀年食品有得賣, 係時候要整吓應節嘢食啦 (哈哈哈, 盡顯我呢位好新抱及好女兒既身手!!!!1)

蘿蔔糕係謝菲既至愛, 而馬蹄糕就係自己家人都好鍾意食, 所以今年就決定整呢兩款糕啦.

好鍾意刨蘿蔔時, 滿屋都充斥住蘿蔔既香味, 好有新年既氣氛架. 底蘿蔔糕一蒸好, 謝菲就以試味為理由, 立即就熱辣辣當消夜食啦, 真係好棒場呢!!!

其實蘿蔔糕及馬蹄糕既食譜, 我都係網上左搵右搵, heehee1, 但係為咗方便自己下年再整既時候唔需要去再搵過食譜, 咁我就不如post係自己個blog度啦!

2012/01/14

咖哩雞肉酥皮角(附食譜)


除夕當日House party, 莎拉就整咗呢個"咖哩雞肉酥皮角", finger food 一件件容易食, 乾手淨腳, 最啱係party度食呢.

之前以為好難整, 但係其實好容易, 只係要花啲時間去包啲咖哩角, 不過真係大人細路都咁鍾意呢.

個酥皮當然唔需要自己去整啦, 去買現成就得啦, 我今次就係用一隻Pampas牌子既Fillo Pastry, 一包有20張薄酥皮, 好大張架, 一盒都可以分幾次用呢, 可以係大型超市或賣蛋糕材料既shop都有.

2012/01/12

窩心午餐-第一腸粉專賣店

星期五下午, 莎拉同謝菲都off, 唔駛返工, 就當然搵啲好嘢食啦. 呢一排天氣凍得要命, 最好莫過於食啲暖笠笠既嘢食. 諗起之前啱啱被"米芝蓮"推介係太子既"第一腸粉專賣店", 不如就會一會佢啦.

星期五1PM時候, 沒有長長既人龍, 我地只係等一張檯, 等10分鐘就有檯啦.
店內好細, 我諗最多都係可以座30人, 所以大家都要座得比較親蜜呢.
之前已經聽聞過佢個粥同腸粉係最出色, 所以我地就已經一早決定食咩啦!

我地兩個人, 一人一碗"菜乾鴨腎豬骨粥", 天寒地凍食番碗熱辣辣既粥真係好鬼窩心架. 個粥好綿, 啲鴨腎切成一絲絲, 一啲都唔會覺得難食呢. 最正係舊豬骨呀, 因為啲豬骨係醃咸過架, 成碗粥好有home feel呢, 就有如兒時婆婆煲既粥一樣!

我地仲叫咗3碟腸粉, 分別係"薑汁豬潤拉腸", "招牌第一拉腸"及"牛肉拉腸拼叉燒拉腸". 所有腸粉都係$19, 如果雙拼就$24. 價錢嚟講就真係唔算平, 未加價前, 腸粉都係$15咋, 不過名氣效應, 紅咗就自然會加貴呢!
講番啲腸粉先, "薑汁豬潤拉腸"真係做得唔錯, 啲豬潤切成薄薄既, 所以啲豬潤熟得呢又唔會好"鞋"呀! 食落啲豬潤仲有薑汁味呢, 咁就可以僻咗啲內臟味呀, 所以怕薑既人都應該食到呢. 至於個腸粉皮其實唔係真係好滑好薄, 食落仲會有少少"張"口, 不過整體嚟講都可以呢.

至於個"招牌第一拉腸"就係呢個鋪獨創, 涵料係"肉燥及菜脯粒", 食落帶偏甜, 都幾好味, 同幾有特色. 係一個唔錯既選擇呀!

最後就係"牛肉拉腸拼叉燒拉腸"啦, 叉燒腸就真係一般啦, 可能因為涵料係叉燒, 真係無咩特別可言, 至於個牛肉腸就有啲特別, 出面食開既牛肉腸好多時都係啲碎牛肉帶陳皮味, 而呢度既牛肉腸係用手切牛肉呢, 食落唔會好似出面個啲有陣梳打醃過既味道, 讚呀!!!!!
如果大定行過呢間鋪頭, 又唔駛等太耐位, 可以不防一試呀!!!!

2012/01/07

除夕茶點會

呢一排真係懶到無朋友呀, 個blog就嚟發毛啦, 成十幾日都唔update, 莎拉真係懶到出汁啦. 2012年啦, 新一年新開始, 就由除夕個日講番起啦.

除夕當日, 謝菲約咗幾個係Highschool既舊同學上嚟屋企玩"下午茶potluck" ! 真係好耐都無試過玩potluck啦, 每個人都準備一款食物.