2015年回顧

真係眨下眼又到了年尾, 2015年將快完結, 而家終於明白點解人地會話有小朋友既, 時間會過得特別快, 因為而家再睇番年頭影既相, 陶寶B真係大過仔咗好多. 特別係因為今年陶寶B開始佢上學生涯既第一年.

只係短短9月至12月既幾個月, 但係陶寶B學習上明顯有進步, 雖然自我中心及不聽指揮既情況時有發生, 但係好感恩陶寶B係一個鐘意上學及享受學校生活既小朋友, 每次聽到佢不停唱係學校新學既兒歌, 作為父母既就算聽一百次都不會厭.

另外好感恩既一樣嘢就係陶寶B既語言發展了, 自從開始上K1後, 語言發展有明顯既改善了, 雖然可能與一些同齡既小朋友比較, 佢講句子既組織能力可能差少少, 但係作為媽媽既已經好滿足了, 因為回想起佢2歲時唔多識講嘢及不斷流口水而極度擔心既自己, 在過去既18個月不間斷去睇言語治療都係值得既.

希望新的一年, 全家人身體健康, 開開心心就已經足夠了. 

祝各位Blogger新年快樂, 身體健康喔.

2015聖誕夜遊愉景灣

Oh Christmas tree, oh Christmas tree,,,,,莎拉最喜愛既節日聖誕節來臨啦, 今年聖誕節正日選擇了同媽咪一起渡過, 傍晚時份就出發搭船入愉景灣, 去到時天都已經黑齊了, 剛好就可以見到愉景灣今年既浪漫燈飾. 

雖然人都好多, 但係聖誕氣氛都好濃厚呀.

木婚5週年記念

與謝菲一起多年了, 所以其實都好少因為記念日去送禮物了, 但係今年5週年結婚記念喔, 都算係一個里程碑, 所以都想整少少嘢俾個驚喜佢, 莎拉自問DIY手工唔靚, 所以無為獻醜了, 無意中見到呢款係英國做可以Custom made既marshmallow (www.boomf.com), 所以就一於訂佢啦. 由訂貨至到送到嚟香港都只係6天, 真係好快, 而用相編制出嚟既棉花糖效果都好清楚呀.

 

繁華小島@長洲

2015/11/1

每逢到假日, 莎拉都會盡量帶陶寶B離開市區, 遊走離島係首選, 眾多個小島之中, 長洲可以算係最熱鬧既一個. 莎拉都有好幾年沒有去長洲了, 而今次都係陶寶B第一次去長洲添. 一出到長洲碼頭真係人來人往, 岸邊都泊滿了好多小船, 與其他離島既寧靜風情真係好大分別呢.

每次出發前一晚都打算早些出發, 但係次次入到去都差不多食午飯時間了, 大人唔餓陶寶B都餓啦, 所以都係食個午飯先啦. 沿碼頭海旁有好多間中式酒家, 主要都係叫餸形式, 相信呢一排既酒家競爭應該好大, 因為餐單既價錢真係好抵食呀. $188任選4個海鮮小菜. 

17個春夏秋冬

Dearest B,

數數手指又一年了, 感恩有您相伴一起為這17個春夏秋冬填滿了很多美好回憶, 雖然身份上已由女朋友成為陶太再成為陶媽媽, 但係我依然都係會在您面前懶皮同扮嘢, 因為我依舊是當日在Harvey’s初次見面既Sarah.

或者現在的生活與從前拍拖時既生活已有所不同, 現在大家都會因為little dude而每天忙碌, 雖然二人世界既時間買少見少, 但係就算只係靜待Little dude瞓覺後, 晚上二人睇電視既時間都可以係happy moment, 或者呢一些就是能夠細水長流既小確幸吧!

Love you, XOXO

b

渣打藝趣嘉年華2015

2015/11/16 

從前沒有小朋友時, 2個大人既週末活動都唔及現在精采呀, 因為小朋友係不能整天待在家中或常常行商場的, 所以而家都會多了留意多些週末既戶外活動, 而呢個星期就有係維園舉行既渣打藝趣嘉年華, 見個天氣預告星期天會陰陰天, 所以今天就早些出門玩啦. 

幼稚園秋季親子旅行2015

2015/10/7

莎拉還記得細個時幼稚園既旅行居然係由學校既後門行去前門入返學校, 之後就全部同學仔坐係操場度野餐, 呢個記憶真係記憶猶新. 今時今日既幼稚園就唔同啦, 有真正既旅行之餘家長仲可以一齊去. 

今次學校安排咗去大棠有機生態園玩, 早上9am就係學校集合出發, 係旅遊巴坐定定就出發啦! 

陶寶B興奮就一定, 不過其實莎拉都同樣期待今天既學校旅行, 因為可以從中觀察及認識陶寶B既同學仔喔. 

慶生飯@The Captain’s house

又大一歲喔, 從前都會同謝菲食個二人世界慶生飯, 今年都係第一次帶埋陶寶B在正日食生日飯呢. 以前如果二人世界揀選既餐廳主要都係想浪漫一些, 但係2+1既組合都係搵一啲適合小朋友既餐廳會好一些啦. 今年就揀咗係尖沙咀既The Captain’s House, 主打美式New Orleans style海鮮煮法. 餐廳用咗大大隻龍蝦公仔做Logo真係夠晒搶眼. 

親親大自然@南丫島

2015/10/1 

秋天開始一步一步接近啦, 係時候開始由玩水轉為行山啦. 國慶假期雖然天陰陰有可能有陣雨, 但係反而咁既天氣行山仲行得舒服一些呢. 食過早餐就出發去中環碼頭, 剛剛好趕得切去索罟灣既加班船, 雖然船程只係短短30分鐘, 但係架船盪盪吓真係好想瞓一陣呢.  上一次嚟南丫島時都大約2天前了, 當時陶寶B全程由嗲咃揹住行山, 今日陶寶B大個仔啦, 唔知自己可否自己行畢整個行程呢?! Let's go!!!!

夜蒲中環@美酒佳餚節Wine and Dine 2015

2015/10/24

作反啦, 莎拉居然帶埋陶寶B夜蒲中環, 去邊度夜蒲?! 咪就係去咗中環海濱既美酒佳餚節囉! 其實今次都係莎拉第一次去呢個Wine and dine festival, 剛好今個星期六天氣涼爽, 行室外都會好舒服, 加上會場內除了有酒之外, 仲有好多美食, 所以就不如一家人嚟個夜蒲中環啦.

莎拉同謝菲今晚都只會淺嚐美酒, 所以都只係買咗一Set套票加一隻酒杯. 呢個酒杯加個袋既設計真係十個like,要試酒時一手就拎到隻杯出嚟, 飲完就放返落個袋度, 真係好細心既設計呢. 

左撇子的迷思

唔講大家唔知, 其實陶寶B係一個左撇子, 用手做好多嘢時大部份時間都係左手行先. 其實莎拉一直都覺得用左手唔係咩問題, 無咩所謂啦, 但係曾經聽聞過左手最大問題就係教寫字, 而莎拉曾經用左手教陶寶B揸筆寫字後就發現問題啦, 因為莎拉自己係用右手既, 所以教寫ABC時連自己都反轉寫了. 因此就係由呢一次經驗後就想改變陶寶B轉用右手呢.

不過其實莎拉呢個想法真係大錯特錯呀, 因為上了K1後, 開始有啲寫寫畫畫既家課後, 但見陶寶B改用右手後靈活度差咗好多. 同老師傾過之後, 老師都唔建議特登去由左手改右手, 因為小朋友已經習慣了用左手一段時間了. 所以教寫字困難呢個問題, 唯有媽媽辛苦一啲, 自己都學用左手寫埋一份啦. 其實想深一層都係既, 用左手用右手分別都唔大, 最大問題就只係學寫字, 但係學寫字不用學一世的, 最多咪辛苦嚟緊既幾年,之後就無嘢啦, 所以一於就由得陶寶B自由用左手啦. 

難得靚景午餐@AVA Restaurant Slash Bar

2015/10/11

係大人既世界內, 想放假就只可以攞AL或者等公眾假期, 但原來幼稚園既假期除了有公眾假期之外, 仲會有一個假期叫”老師發展日”, 因為老師要發展, 所以學生們就放假. 難得陶寶B學校在平日放假, 去旅行當然係最好既選擇, 不過咁遲先知有假期, 平機票就無望啦, 咁不如就改為去迪迪尼啦, 因為平日少人一些呢. 莎拉同謝菲假都請埋, 迪迪尼門票都買埋, 點知就輪到陶寶B有啲感冒唔係太舒服呢, 咁就唯有改變計劃啦, 橫豎張迪迪尼門票幾時用都可以.

難得平日放假, 當然要去食吓平時無咩機會食到既嘢啦, 莎拉首選就係AVA Restaurant Slash Bar 既Semi-lunch buffet呀. 雖然佢都有Weekend brunch, 但係價錢會貴好多呢, 莎拉呢類C9上身既人當然要食啲又平又抵架啦. 

AVA Restaurant slash bar位處於酒店既38樓, 印象中陶寶B都好似係第一次搭呢種望到室外既升降機.

所以叫陶寶B影相嚟個自拍時, 佢完全唔理我地. 

快閃啟德郵輪碼頭

近日天氣開始有啲秋意啦, 日間已經無之前咁熱之餘仲有風吹吓, 秋天既腳步愈來愈近啦. 一早已經聽聞啟德郵輪碼頭有城市綠洲之稱, 小朋友可以盡情去跑, 相信係一個放電好地方呀. 我們選擇了在九龍灣轉小巴直接到達啟德郵輪碼頭, 真係10分鐘唔駛話咁快就到啦. 去到第一件事當然係上頂樓既平台公園睇一睇啦. 剛好今日有Royal Caribbean既郵輪泊岸呢, 嘩…好大隻船船呀, Ahoya!!!!! 

嗲哋生日飯@Jamie’s Italian

2015/9/2

好似好耐都無寫過餐廳介紹了, 的而且確有了小朋友後, 出街食飯既次數係比以前兩公婆既日子少了的, 無他既因為小朋友出外食飯時既耐性係有限, 所以如果朋友家人既大聚會, 大多都會選擇在家中食飯, 因為會食得比較自在. 不過老公生日就一定要慶祝一下啦, 莎拉一早已經鎖定目標要去Jamie’s Italian食架啦(生日個位都無得揀^o^), 由銅鑼灣開業既第一間都一直未有機會試, 所以當尖沙咀分店開張加上可以online booking就更加方便了.

莎拉book了8pm, 去到就已經立即有位了, 仲要係卡位添, 對於有小朋友既顧客嚟講, 座卡位既安排真係合晒心意喔. 

座低後, serve我們呢一檯客人既侍應就首先自我介紹, Jamie’s Italian既安排侍應形式與外國的一樣, 指定的侍應會被安排招呼指定的區域, 而客人所給予的服務小費就會全數給予那一位招呼他們的侍應, 其實呢個方法莎拉好讚同, 因為有時晚飯所給予的10%服務費係一定要俾, 就算服務差都要俾, 加上所俾小費究竟有無真正入到侍應既袋, 做客人既都未必知道, 但係Jamie’s Italian本身是沒有收取小費既, 客人可以自行因應服務如何而決定給予多少小費.