難得靚景午餐@AVA Restaurant Slash Bar

2015/10/11

係大人既世界內, 想放假就只可以攞AL或者等公眾假期, 但原來幼稚園既假期除了有公眾假期之外, 仲會有一個假期叫”老師發展日”, 因為老師要發展, 所以學生們就放假. 難得陶寶B學校在平日放假, 去旅行當然係最好既選擇, 不過咁遲先知有假期, 平機票就無望啦, 咁不如就改為去迪迪尼啦, 因為平日少人一些呢. 莎拉同謝菲假都請埋, 迪迪尼門票都買埋, 點知就輪到陶寶B有啲感冒唔係太舒服呢, 咁就唯有改變計劃啦, 橫豎張迪迪尼門票幾時用都可以.

難得平日放假, 當然要去食吓平時無咩機會食到既嘢啦, 莎拉首選就係AVA Restaurant Slash Bar 既Semi-lunch buffet呀. 雖然佢都有Weekend brunch, 但係價錢會貴好多呢, 莎拉呢類C9上身既人當然要食啲又平又抵架啦. 

AVA Restaurant slash bar位處於酒店既38樓, 印象中陶寶B都好似係第一次搭呢種望到室外既升降機.

所以叫陶寶B影相嚟個自拍時, 佢完全唔理我地. 

訂位時要求window seat, 估唔到真係有呢, 仲要係corner位既window table, 真係正到暈呀. 

成個尖東及東面維港盡入眼簾, 陶寶B仲講咗句”好高”呀!  上一次嚟AVA Restaurant Slash Bar係食晚餐, 所以日景都係第一次睇得咁清楚呢.

 Semi-lunch buffet就係前菜沙律及甜品all you can eat, 而海鮮頭盤及主菜就每人選一個.

大人細路都肚餓啦, 出去睇吓前菜沙律有咩食先. 前菜有不同既cold cut, smoked salmon, pasta salad, 芝士, 湯等等, 選擇都有差不多10幾款.

雖然係前菜, 但都有好多食物適合陶寶B食架, 又有Pasta, 又有ham, 仲有粟米添. 

至於大人就當然樣樣都試一試啦. 而海鮮頭盤就揀咗生蠔, 長腳蟹及青口呢一set. 生蠔雖然唔係好大隻, 不過就好新鮮呢. 

食完set海鮮頭盤後再食多碟沙律後, 侍應見我地都停手就問我地是否可以上埋個main course. 主菜莎拉就揀了澳洲羊架.

而謝菲就揀澳洲M4神戶牛柳. 

本來想同陶寶B share個main course, 但係佢食前菜都食到飽飽了. 

莎拉原先擔心食buffet時陶寶B食飽後會唔耐煩, 所以都準備咗一大袋玩具及圖書俾佢打發時間. 點知最後一樣玩具一本書都無拎過出嚟, 因為陶寶B全餐飯都已經被個無敵維港景吸引住啦. 

到咗甜品時間啦, 可惜陶寶B有咳, 所以莎拉都唔夠膽攞啲太甜而陶寶B又鍾意食既甜品呢. 

餐廳既侍應好Nice, 仲俾咗一杯apple juice陶寶b呢, 呢位小朋友有juice飲, 真係阿媽叫咩名都唔知呀.

呢個快樂午餐不經不覺都食咗成2小時呢, 坐吓食吓望吓海景真係好relax呀. 今次呢個Semi-lunch buffet都只係$400/2人(用openrice coupon),小朋友4歲以下唔使錢, 加埋個維港海景, 呢個價錢真係好超值. 下次有機會平日放假要再去食過先得!