上星期六, 見短週唔洗番工, 於是就約咗帝京酒店證婚埸地follow我地既Venus, 去攞埋啲西式請帖, 同埋想去望多一次個證婚埸地, 因為上次睇已經係年頭.
今次去到個地中海花園, 因沒有人用, 所以個場無任何settinng.
呢個就係帝京酒店既Lobby同電梯, 到時酒店會係電梯旁放個welcome board及工作人員去帶啲客人.
面reception desk 就會放係門口對正位置(下圖所示).
呢道就係行禮既地方, 到時會在兩邊放50張椅, 而梯級就會放証婚檯及酒店提供既花壇
!!!
梯級後面就有歐陸式花園可以影相!
我諗需要DIY既地方只係Reception desk 及行禮兩排椅既通道. 希望搞得掂, 我唔想到時失敗
要加$1000俾酒店做decoration!!!
而帝京酒店既西式請柬都幾清雅, 其實我都未確定會唔會用, 攞咗番嚟先慢慢諗!
其實斷斷續續同謝菲都搬咗入去新屋有幾個月啦, 終於係3個星期前有個個朋友仔生日, 於是順手搞個house warming party
.
準備Party前, 第一件事就係諗, 究竟間屋可否容納14人呢, 仲要係有位座?! 因為一直以來都未試過有咁多朋友上嚟, 所以我唯有連自己舊屋個邊啲椅都攞埋過去, 好彩最後, 迫迫地都可以座定定有位食嘢.
至於是日menu, 當然有我之前係blog post 過既嘢食啦,,,而冰凍既凍飲當然要準備充足, 嘩, 個雪櫃都從來未試過咁爆
!
buffalo wings 我都要分3次嚟焗, 好彩有朋友仔幫吓手煎餃子, 因為焗係過廚房真係好熱, 好似高溫瑜珈咁.
登登登, 開餐啦, 有得食!
多謝所有朋友仔既光臨!!!哈哈哈
下次目標係搞Poolside party+BBQ!
海景嘉褔酒店所送既婚紗攝影係現代經典 (現在已經轉咗送羅浮宮啦), 好少酒店送呢間婚紗公司, 但其實都好少人會join佢地個package, 大部份都係影法國婚紗或蒙羅麗莎呢啲大公司. 其實諗落都有好處, 起碼現代經典無乜人影, 咁啲相就會無咁熟口熟面啦!
其實本身都已經join咗出面一間freelance影婚紗相, 所以現代經典既coupon會係extra既婚紗相. 而酒店所送既攝影package只得$2,500, 可想而知佢pacakage包既嘢有幾多(少得可憐, 只有好似得4-5張相既hard copy, indoor studio拍攝), 所以行得入去影都諗住加少少錢upgrade, 起碼攞番本相簿走啦! 最後bargain到牙血都流埋
, 加約$3,680有18張相(include soft copy), 一本8"x10"既相簿(包流璃封面), 2張5"x7"相, 新娘2個image, indoor studio拍攝.
而我就揀咗一件婚紗, 一件晚裝. 因為拍攝全部係indoor studio, 所以攝影時間唔需要太長, 大約半日就可以! 而化妝同Set頭, 就覺得有啲重咗手, 唔知係咪影studio既關係, 所以個妝偏濃, 但化妝姐姐既service幾好. 而攝影師(唔記得佢個名, 好似叫Eric)都好盡力引我們笑同教擺pose, 所以都唔錯. 而我最鍾意就係佢studio既佈景, 有部份都幾型. 好可惜影既時候我扮唔到型, 所以影出嚟麻麻地!
揀相時, 啲sales都唔會看住你揀相, 又唔會焗你買相, 呢樣嘢幾好! 哈哈, 但最後揀相時, 揀多咗10張, 要加錢啦
!! 到攞相時, 本相簿個流璃封面very good!
而啲相個樣都唔算"汁"得太勁, 起碼都仲認得係自己!
今次影相我無特登去買花球, 我只係影相前去花墟買咗一支紫色繡球, 效果都唔錯, 影完相半日, 支繡球已經謝晒!!!!
而咁多張相, 最得意就係呢一張九方格, 係九個方格分開影, 之後合成, 誠惠另加$350!!!
Wedding day 當日我所要求既攝影師, 我希望他能夠photo同video都能同樣出色
. 因為我覺得photo影得好未必難搵, 但耍同時間video都影得好, 就有啲難度. 我特別要求係same day edit 個part, 因為結婚所影的相, 我相信大部份賓客都未必有幾會睇番啲相, 但same day edit就唔同, 你所邀請既所有賓客都會觀看, 所以我想搵一個影video比較impressive既photographer.
其本上我大約interview咗5個攝影師, 有出名, 有唔出名, 有平, 有貴. 其實基本上, wedding day影既相質素, 我所interview的多位攝影師都無乜問題, 但一講到video(same day edit), 佢地好多時都未能夠比到video既sample我睇, 就算有質素都普普通通. 唔知係咪因為大部份都係freelance photographer, 佢地都係專注係影相, 而video個part就佢另外搵人幫你影, 所以質素未必穩定
.
直至我搵到muse muse photography........
佢地所影既相質素完全無問題, 而最impressive係video, 好有MTV feel!!!!!! 加上我其中一個朋友參加個一個婚禮就係用Muse team, 佢都話幾好.
Muse muse photographer 係婚紗攝影呢一行, 越來越出名, 當然佢地個價錢就一年貴過一年
! 我爭鬥咗好耐先決定用muse team, 因為佢地真係一啲都唔平. 哈哈, 貴到我連謝菲都唔咁話佢知幾錢
!!!! 唔緊要啦, 我相信我既選擇無錯, big day當日一切就交給muse team幫我留下一個美好回憶!
Muse muse photography
http://hk.myblog.yahoo.com/musemusephoto
videography sample:
哈哈, 唔知謝菲同班兄弟可唔可以影到咁型呢
?! 我同班姐妹就一定無問題!!!!
望一望個blog頂既countdown, 原來仲有5個月就係大日子, 開始有啲緊張, 因為發現個wedding check list 好多嘢都係開咗個頭, 係時候要開始逐樣嘢finalize la!
從來都估唔到, 一年之內, 金價會由$8,800/兩, 升到現在$12,000/兩, 實在太貴!!!
其實早係個多月前, 都已經開始留意金價, 但發現佢只有不停向上升, 而呢個禮拜, 啲金價有輕微回落, 但其實都係咁上下, 都係時候要買金器啦!!!
同屋企人飲完茶, 就同媽咪出旺角睇金器. 其實都只不過諗住望下啲款式先, 媽咪就越睇越開心, 不如 睇咗周生生, 周大福, 同埋六福. 最後一致決定六福啲款modern啲, 無咁"娘".
由開始時睇中一條花花手鍊, 之後諗住買多對龍鳳鐲咁就ok. 點知媽咪見到絛花花手鍊仲有耳環及頸鍊係一set, 叫我試吓先, 試試吓, 媽咪就話無所謂買埋佢啦, 靚啲呀嗎,,,,靚就真係好靚, 但係
是日金價:$11,950
真係好貴, 我都覺得肉赤, 但你地話無所謂,,,,多謝媽咪同爸爸!!!!
糖糖話: "咩呢架, 擺係地下, 左住晒!"
就係呢套花花金飾, 令到我同媽咪愛不釋手!
一對無龍, 無鳳既新潮對鐲!
"姣"靚呀, 姣"靚呀!!!!多謝我既姊妹朋友仔"咖哩"既新居入伙禮物!!!今次係第二次收到佢既手作禮物, 一次比一次精巧, 細緻!!! 今晚約佢去睇姊妹裙, 收到份禮物時, 忍唔住要即刻攞出嚟睇, 大家都覺得好手工精美. 哈哈, 我仲成機邀請(其實係"屈")"咖哩"幫我到時wedding day整個好靚既盒for收賀禮人情. 一啲都唔客氣!!!
其實成個盒仲細過包tempo, 巧奪天工呀!!!!!
