2012/05/31

大肚婆奇想之生B後十件想做事情(下)

繼續莎拉既十大奇想下半part!!!

6) 一家三口返加拿大, 重遊與謝菲拍拖時去過既地方

呢個wish期望下年既夏天, 當陶寶B一歲時應該可以實現, 因為謝菲既表弟(當年我地結婚時佢專登飛番嚟做Best Man)下年8月結婚, 而我地一早已答應會出席, 所以如無意外, 到時會帶埋陶寶B一齊番去加拿大呢, 咁就可以一家三口去番當年莎拉同謝菲留下不少腳毛既地方. (莎拉一定要係Downtown食Hot dog!!!!!)

7) 幫陶寶B係麥當當及戶外搞生日會

細個既時候, 莎拉好羨慕啲小朋友可以係麥當當開生日會, 所以幫陶寶B係麥當當搞生日會, 其實只係補償莎拉童年未能達成既願望呢! Heeheehee! 而另外點解想幫陶寶B係戶外搞生日會呢, 因為莎拉可以預備個Pinata俾陶寶B玩呢! 咩嘢係Pinata, 其實係外國既小朋友生日會係好popular. Pinata係一個紙造既公仔, 內裡有好多玩具或糖果, 而玩法係壽星囝/壽星囡先遮住對眼, 然後就好似玩仆傻瓜咁仆爛個Pinata, 咁所有裡面既玩具或糖果就會掉晒出嚟, 而參加生日會既小朋友就會好開心咁去攞啲玩具或糖果呢. 不過我諗玩呢個Pinata, 都要等陶寶B起碼3歲先可以呢, 因為佢都唔夠大力仆爛個Pinata!

8) 食番餐好正既泰國餐(要有生蝦, 蝦餅同咖哩炒蟹)
好耐都無食過啲咁熱毒又辣既嘢啦, 特別係炒蟹呀, 過去既8個月真係一次都無食過呢, 所以而家諗起都口水流呀!!!! 仲有芒果呀!!! I miss you all!!!

9) 與陶寶B一齊整甜品俾謝菲食
好多父母都唔會俾小朋友整嘢食, 因為驚佢地會整親, 不過莎拉覺得係安全既情況下俾小朋友參與整嘢食係一件好事, 當係一件親子活動都好好架. 所以莎拉已經幻想緊當陶寶B有番3-4歲既時候, 同佢一齊整Cookie或蛋糕, 無論個成品好唔好食, 食既人(謝菲)一定好開心呢. 

10) 一家三口去郊外PICNIC及去沙灘同陶寶B玩沙
平時去沙灘, 見到啲肥嘟嘟既小朋友係海邊玩沙玩水, 個情景真係好得意呢, 所以莎拉都對呢個畫面充滿期待呢. 夏天就去沙灘, 咁冬天就去郊外Picnic啦, 莎拉可以準備好晒謝菲同陶寶B鐘意食既嘢, 一家三口應該會好好玩呢.


2012/05/30

大肚婆奇想之生B後十件想做事情(上)

仲有2人個月倒, 陶寶B就會出世, 所以莎拉呢位大肚婆就整咗個Wish List, 希望陶寶B出世後, 可以一一實現呢十件事情!!!!呢十件事未必件件都係奇想, 不過好可能未必可以一下只實現!

1) 一早起床後可以嘆番一杯"兜把星"咖啡
莎拉係咖啡精, 之前每日都一定要飲一杯咖啡, 但係自從知道有咗陶寶B之後, 就真係一滴都無飲呢, 每次行街經過任何一間既coffee shop, 莎拉就會係咁"索", 真係唔飲得都想聞吓呀!!! 不過因為plan咗頭2個月餵人奶, 所以想嘆咖啡呢個wish都要等多4個月先可以啦.

2) 同謝菲出海玩wakeboard
呢幾年既夏天, 莎拉同謝菲都會約朋友仔出海玩wakeboard, 不過睇怕今年都應該玩唔到啦, 唯有寄望下年啦.

3) 同謝菲開咗雪櫃支Moet香檳慶祝結婚2週年

本來支香檳係預備咗係結婚一週年既時候開嚟慶祝飲, 但係一週年已經有咗陶寶B係肚入面, 所以就唯有留係兩週年(綿婚)既時候飲啦.

4) 同謝菲在陽光與海灘下過二人世界嚟個Vacation
係上年年尾既時候, 本來莎拉plan咗今年9月份既時候同謝菲去泰國/馬來西亞嚟一個陽光與海灘既short trip (真係好彩莎拉無玩surprise之前買定啲平價機票咋, 如果唔係真係平買貴用呀). 唔知可唔可以係今年年尾11/12月去到呢?!! 不過又驚到時會唔捨得陶竇B呢, 不過點都要製造番啲二人世界既時候呢.

5) 一家三口一齊去high tea


莎拉好想食甜品呢, 因為懷孕期間都唔太敢食咁多甜嘢, 所以好想high tea呀! 所以呢個wish應該唔難做到!


2012/05/29

BB用品 - 護協朝聖

好多準媽咪/媽咪都會去護協買BB/孕婦用品, 所以莎拉都唔執輸, 點都要申請到張惠氏媽媽會/雀巢媽媽會既membership, 因為如果唔係護協會員, 咁就只好有呢兩個媽媽會既membership先可以買到嘢.

今次主要係買埋啲濕濕碎碎既BB日用品及走佬袋用品. 的而且確, 護協既價錢真係比起出面既鋪頭平好多, 就算上樓鋪都未必夠佢平呀. 不過缺點就係有可能會出現缺貨問題, 咁就可能要行多幾轉. 莎拉個日上去係星期五下午, 所以都唔算多人, 不過聽聞Weekend就好多人呢, 所以盡量都係平日去好啲啦, 因為護協個度就地方唔係太大, 人多起上嚟都好迫人.

等我節錄一下今次護協既收護先:


孕婦走佬用品套裝 - $132
3層奶粉格 - $35及$25
500個棉花球 - $32
思詩樂140片清潔綿 - $25
Chu Chu 850ml奶樽蔬洗潔液 - $74
Tommee Tippee嬰幼兒剪刀連蓋 - $19
細軸棉棒260支 - $19
嬰兒安全棉花棒56支 - $7.5
元氣媽咪內衣 - $159
Amor防水尿墊 - $124

2012/05/27

懶人晚餐 - 雜菜焗蜜糖芥末雞

好耐都無post整嘢食既相啦, 原因當然係而家係自己整少咗啦, 就算整都係整啲簡單啲呢, 因為廢事琴高又琴低啦! 之前見陳太,早安! 整咗個蜜糖芥末籽烤春雞, 個賣相好吸引, 又容易整, 所以莎拉又做copycat, 自己都試一試整.

其實真係好方便好容易, 預先前一晚用蜜糖芥末醬及鹽醃定隻雞, 第二日焗之前加埋啲雜菜係底一齊焗(啲雜菜加少少鹽, 香草及橄欖油撈一撈)就可以, 真係乾手淨腳呀!
 最鍾意係鑊都唔駛洗啦!!! 今次就雜菜就同咗紅蘿蔔, 南瓜, 洋蔥及椰菜, 呢啲雜菜吸收晒啲精華, 所以係好好味架. 連謝菲都大讚, 仲問下個星期日可唔可以ENCORE整多次呢?! HAHAHA!!!

2012/05/26

與陶寶B一起的日子- WK30

又到咗每個月最期待既時候啦, 因為今個星期會返私家及政府覆診, 所以又可以見到陶寶B啦.

星期三先返廣華, appointment 11:30am, 最後去到12:30先到自己, 跟住仲要排隊抽血, 搞掂晒既時候已經係1:00pm, 自己已經係成個hall最後一個patient啦, 下次可唔可以啲appointment早少少啦, 搞到我餐餐都趕頭趕命返公司!!!!

今次幫我檢查既係男醫生, 莎拉都係第一次睇婦產科男醫生咋, 不過佢都好細心, 仲remind我一定要食啲鐵丸呢, 其實so far睇咗4次, 廣華既啲姑娘及助理抽血嬸嬸都好nice, 絕對沒有出現惡死"能"登既情況, 有時仲有講有笑呢. 希望到時入院生陶寶B既時候, 啲醫護人員都係咁nice就好啦!!!

又到咗星期五下午, 謝菲就陪莎拉去陳醫生做產檢, 每次我地都好期待, 因為可以見到陶寶B呀. 每次去陳醫生都係咁多人, 次次都要等成粒鐘呢, 有時真係好難頂架, 因為座得耐又會好辛苦呢. 不過無辦法呢, 陳醫生真係好好生意. 等咗成個鍾有多終於都到莎拉.

今次我比起一個月前重咗約3磅呀, 而陶寶B現在大約就1.7KG(~3.7磅), 哎呀, 佢由上次既中碼B跳至今次既中碼偏大既BB呀!!!! 醫生量度佢個頭仔Size, 話陶寶B個頭仔比較大呢(Oh No!!!!!), 醫生望一望謝菲就話, 唔怪之得啦, 似爸爸呀, 因為謝菲都係大頭仔一名, 佢出世既時候8.5磅仲要係大頭仔呀, 陶寶B你千其唔好似足爸爸呀, 你要錫住媽咪, 唔好太重磅呀, 因為大頭仔已經生得辛苦啲架啦!!!

今次陶寶B唔多俾面, 唔多合作, 成日拎歪面, 又搵嘢擋住自己個樣, 所以照3D時唔多清楚呢. 不過好明顯陶寶B個鼻仔就似莎拉呢, wakaka!!!

2012/05/21

肥糖糖被整蠱

好耐都無update吓貓貓既近況啦, 雖然肥糖糖唔係莎拉自己屋企養, 但係基本上每次返娘家食飯既時候都絛見到肥糖糖呢!!!

2012/05/19

BB嘢 - 花園街尋寶

莎拉又嚟買BB衫啦, 今次就去花園街尋寶啦!!!

花園街沿途都有好多檔係賣出口BB衫, 但係質素都幾參"痴"呀, 而莎拉就覺得有一檔係花園街夾弼街(生果汁鋪頭前面)呢一檔有比較多質素好及多款式既BB衫.

除咗有平時買開既Carter's外, 仲有另一美國品牌Hartstrings, 質地都係非常好, 全Cotton, 好柔軟呢.

老闆仲不停好好心機咁教我地點樣揀BB衫呢. 價錢大約分3種, 夾衣$55, 過頭笠既BB衫$50, 過頭笠既BB衫連套住腳仔$45.

今次最開心就買咗個件Football BB衫, 好得意呀!!!
陶寶B GoGoGo!!!


2012/05/18

與陶寶B一起的日子- WK29

之前買買埋埋俾陶寶B既衫仔同褲仔, 係時候襯天氣好就要洗定晒佢地啦, 所以呢個星期就叫工人姐姐洗乾淨佢地啦!!!
哈哈哈, 啲衫仔, 褲仔同口水肩, 件件都細細件, 飄飄吓真係好鬼C得意呢.

2012/05/14

BB會 / 媽媽會大雜會 (一)

而家啲BB會同媽媽會真係多到你都數唔晒, 初頭諗住慢慢join唔駛緊, 但係點知好多BB會send咗application form之後, 要補番個懷孕証明, 所以來來回回有啲BB會要成差唔多個半月先會Confirm你既申請, 之後先會寄出迎新禮物呀!

莎拉都唔係好記得自己申請咗幾多個BB會及媽媽會啦, 因為好多都係application form send咗出去, 而家先開始慢慢收到迎新禮物呢. 而有啲會既迎新禮物好實用, 不過有啲就真係好"流"啦, 不過咁, 唔駛錢既free gift 都唔可以期望太多啦.

好啦, 睇一睇莎拉呢位C9仔究竟Join咗幾多BB會同媽媽會先.

(1) 美贊臣BB會收到個媽媽袋同一本會員優惠書仔連同會員Card, 不過本來仲應該會收到BB手襪仔及嬰兒紗巾, 但係唔知點解到今日都收唔到呢?!!!(唔通佢執漏咗?!!)

2012/05/12

陶寶B既圖書閣

而家行街, 真係差唔多有8成機會都係買嘢俾陶寶B呢, 不論衫仔, 日用品都好, 都係陶寶B架呢.
昨晚行過德褔廣場, 剛剛有兒童書展, 莎拉諗住行個圈咋, 點知就買咗多本BB書及幼兒書俾陶寶B啦, 價錢都係$10-$30, 真係唔貴呢. (莎拉絕對唔係啲"怪獸父母"或"直昇機父母"呀, 啲書仔都係諗住等陶寶B大過啲既時候同佢一齊睇架)

2012/05/10

外傭姐姐既嬰兒護理工作坊

暫時Plan咗陶寶B出世後, 媽咪會幫手湊BB一段時間, 而本身家中一早已經有個菲傭姐姐, 但係當初請佢都係為咗照顧當時身體不適既爸爸, 所以呢位菲傭姐姐主要既工作經驗都係照顧老人家呢.

雖然有自己媽咪照顧BB, 但係菲傭姐姐相信到時都要幫手洗吓奶樽或換吓片之類, 所以佢點都需要有啲照顧BB既知識. 所以莎拉就報咗個係循道衛理楊震社會服務處既"嬰兒護理工作坊(英文授課)"Course俾菲傭姐姐讀(2堂, 共4小時) (http://fhe.yang.org.hk/course_details.php?id=50), 費用都係$200, 唔係好貴, 真係平過莎拉自己讀既course.

雖然唔知個course教得全唔全面, 但係俾佢上呢類既course, 起碼都有個basic knowledge既, 到時就算自己要佢幫一幫手都放心啲呀.

2012/05/06

BB嘢 - 赤柱Shopping

呢一排少咗上淘寶買BB嘢呢, 因為一直想去赤柱睇睇先呢, 因為好多媽媽都話赤柱有多又平又靚既出口BB衫呢.

哈哈哈, 的而且確係赤柱市場道有好幾間(Boathouse餐廳旁邊條街)專賣BB出口衫既鋪頭, 另外係赤柱大街內都有一間賣BB衫. 呢啲鋪頭有好多Carter's及Gap既BB衫, 價錢由來已$3X-$7X不等呀. 價錢可能比淘寶貴少少, 不過相差唔太多, 起碼買既時候可以摸上手, Feel到個質地呢.

個日賣咗好多衫仔俾陶寶B呢, 好難忍手呢, 今次連謝菲都忍唔住出手揀咗好多俾陶寶B呢.  

2012/05/04

與陶寶B一起的日子- WK28 (大肚look)

已懷孕至WK28, 即係話莎拉呢個奇妙之旅開始踏入後期階段啦! 睇住個肚一日大過一日, 而陶寶B踢踢既力度都越嚟越大啦, 所以好多媽咪形容懷孕既過程係奇妙之旅真係一啲都無錯呀!
又到每個月為自己留下大肚Look既時候, 今次就襯天氣好, 去咗赤柱影相 (仲襯自己未口腫面腫呀), 上次去赤柱影相都已經係2009年, 當時仲係Miss Li仲有條腰架!

2012/05/03

與陶寶B一起的日子- WK27(產前講座)

呢個星期開始, 每個星期二開始上BB Care既產前講座啦, 一連4堂, 每次差唔多2.5hr, 所以一放工就要雞咁腳拿拿聲走啦, 因為都要食咗嘢先上堂呢.

入到課室, 就首先收到一份禮物包, 都幾大份呀, 有2包初生既pampers尿片, huggies尿片及濕紙巾samples, 產後衛生巾, 防妊娠紋cream, BB shower gel, 哈哈哈, 而家屋企都收埋唔少samples.  

2012/05/01

陽光下之赤柱行 - Cafe Grouchos

近排啲天氣真係時好時壞, 一落起雨上嚟真係唔野小, 有"姐"都濕身呀. 而剛剛過去既Weekend彿誕假期, 同謝菲Plan好晒要去赤柱影相同賣BB衫,本來係屋企出發既時候, 天文台都仲係預告有雷雨, 但係我地望到個天又唔似會落雨呢, 所以決定照樣出發去赤柱呀!!!

入到赤柱, 真係天氣好到不得了, 好彩有帶太陽眼鏡咋!!! 行咗一陣, 係時候座低食嘢啦(陶寶B肚餓啦!!!)

天氣咁好, 當然係座Outdoor啦! 海濱旁邊有好多餐廳選擇, 有平又有貴, 我地最後揀咗呢間食專食hot dog及burger既Cafe Grouchos

莎拉就要咗個cheese burger而謝菲就Order咗隻Chilli Billie hot dog.

 另加兩個side order, French Fries with sour creamFish finger!

好食呀, 個burger好鬼C juicy呢, 而hot dog就少少辣辣地, 好知味呀! French Fried加上sour cream真係一絕呀! 莎拉食得咁知味就知啦!
價錢就真係一啲都唔貴呢, 4樣嘢食加一支coke及一杯strawberry smootie都係$180有找呢!
陽光下食嘢真係特別好味呢, 下次嚟赤柱都要再食先得呀!!!