2012/03/30

與陶寶B一起的日子- WK23

到咗WK23啦, 基本上所以重要既檢查(唐氏綜合, 驗血及BB結構)都已經做咗, so far全部都合格啦, 而懷孕既過程都已經行咗一半啦, 所以而家呢個時期可以輕輕鬆鬆enjoy陶寶B係莎拉肚內既一舉一動. 除咗莎拉會同陶寶B唱歌之前, 謝菲都開始同陶寶B溝通啦, 佢既大會指定歌曲就係"London Bridge Is Falling Down", 每次謝菲同陶寶B講嘢, 陶寶B好多時都會即時踼踼架(反而莎拉唱歌時就無嘢反應呢), 之前睇過啲育嬰書, 原來BB對沉實既聲音係會有較大既反應架, 所以聽到男性既聲音係會較大反應架. 而家個肚越嚟越大, 哈哈哈, 都有成34"啦, 有時夜晚沖完涼好無聊既時候, 莎拉會望住個肚, 等陶寶B踢踢郁郁時, 就會見到個肚皮郁一郁架啦, 真係好得意呢.

因為都接近6個月啦, 而廣華個邊既產前講座最快都要排到6月先有得上堂(仲要如果好彩book到), 所以謝菲就話不如出去上啲俾錢既產前班啦, 因為去到6月先上的話, 我個肚到時都已經好大, 又辛苦又唔方便架!

最後就搵到以下呢幾間有產前班:

(A) 循道衛理楊震社會服務處 (http://fhe.yang.org.hk/course.php?nid=4)
Course: 嬰兒護理課程 (廣東話授課)
堂數: 3堂, 每堂2小時30分鐘
收費: 好似約~$720(夫婦二人)

(B) BB Care (http://www.bbcare.hk/)
Course:準爸媽產前產後工作坊
堂數: 4堂, 每堂2小時15分鐘
收費: $1080 (夫婦二人)


(C) Baby Planner (http://www.babyplanner.hk/chi/index.html)
Course:新手爸媽育兒實習課程
堂數: 4堂, 每堂2小時
收費: $980 (夫婦二人)

(D) HKMDC 香港人才培訓中心  ( http://www.hkmdc.org/index.html )
Course:"自己做陪月"產前工作坊
堂數: 4堂, 每堂2小時
收費: $980 (夫婦二人)

(E) Union Hospital 仁安醫院 ( http://www.unionwomancare.org/od02.php )
Course:產前講座
堂數: 6堂, 每堂1小時30分鐘
收費: $950 (夫婦二人)

首選係循道衛理楊震社會服務處. 點知5月份既course已經full晒啦, 哎哎哎, 我以為結婚既planning就要早, 點知原來BB嘢都要早啲Book呢, 莎拉真係想像得到第時陶寶B上Playgroup, 上nursing school, 上幼稚園全部都要爭呀!!!!
 
好多course 4月份都full咗呢, 而個個選擇好似都差唔多, 所以就最後揀上堂地點及時間啦,最終莎拉就報咗BB Care既準爸媽產前產後工作坊, 報名既時候先知原來仲另送"健康媽寶篇之優「生」養胎大全"呢一個course, 唔好理啦, 有course就上啦, 加上見到佢好似有好多free gift呢, wakaka, 到時點都要攞多啲samples呀!!!


2012/03/28

升級享受 - 燕窩薑汁鮮奶燉蛋白 (附有食譜)

之一排天氣涷涷地, 最啱就係整番碗熱辣辣既"薑汁鮮奶燉蛋白", 對孕婦嚟講, 鮮奶真係好有益, 而加入薑汁, 對懷孕初期出現既作嘔作悶, 都可以舒緩一吓呢.

呢款甜品簡單又快捷, 想食既真係話咁快就有得食啦. 之前姑仔送咗盒低糖即食燕窩, wakaka, 所以莎拉就將呢個甜品升"呢", 變成燕窩薑汁鮮奶燉蛋白, 好好味呀, 而家諗起都想今晚整嚟食呢.


材料(二人份量):

鮮奶 250ml

蛋白 2隻

薑汁 1.5-2湯匙
砂糖  2湯匙

做法:

(1) 鮮奶微微加熱, 下砂糖待王完全溶解, 熄火備用
(2) 蛋白拌勻, 將薑汁及蛋白加入鮮奶中拌勻
(3) 用篩過濾一次, 之後倒入碗中
(4) 用保鮮紙蓋好碗面, 之後用中火隔水蒸12分鐘
(5) 食時在蛋白面放上即食燕窩即成


2012/03/26

BB嘢-百貨公司篇(一)

上星期Piago(UNY)既嬰兒部做緊特價, discount由八折至九折不等呢. 係德福既Piago唔多人, 好好行呢, 見好多BB用品都有Discount, 所以又開始掃貨行動呀.

第一件戰利品: 最抵就係買咗一套Winnie the pooh既BB床單套裝(一共有12件), 由原價$1200減至$599, 跟住仲要再有八折, 埋單都係$480咋.

2012/03/24

與陶寶B一起的日子- W22 (照結構)

到咗wk22, 係時候照結構啦, 睇開產檢既陳麗燕醫生, 佢沒有做結構檢查, 所以佢refer咗另外兩個醫生俾我, 最後book咗謝喜兒醫生做結構檢查, 佢既收費係$1500(包1隻vcd).

當日Book咗10:30am, 睇嚟我都係第一個patient, 所以10:40am就已經可以開始檢查啦, 整個檢查過程大約用咗25分鐘, 醫生會睇吓BB既結構(包括內及外)正唔正常, 有無缺憾. 謝醫生相比起陳醫生,  謝醫生就比較COOL, 不過佢都有問必答既.

檢查頭10分鐘既檢查, 陶寶B係都唔俾個正面我地睇, 成日拎轉面, 真係俾佢激C啦, 所以搞到我要轉一轉位置, 後期10分鐘檢查我要打側瞓先睇得到佢正面呢.

不過陶寶B都有好鬼馬既一面呢, 佢係我肚入面做咗個好rock and roll既手勢, hahaha, 就係"Love and peace"啦, 真係好鬼C得意, 唔通我成日聽Pop song, 所以影響到佢咁rock and roll. 到咗檢查後期, 陶寶B就周身郁無時停, 隻手仲好似係度玩緊"十五二十"咁呢.

2012/03/21

愛心甜品 - 鮮奶紅棗燉雪耳 (附有食譜)

莎拉係一個一向唔多鐘意飲鮮奶既人, 就算而家有咗BB都唔係太接受得到鮮奶呢. 而前兩日謝菲就好鬼馬咁send個message俾我, 話整個好正既甜品俾我呢, 哈哈哈, 原來佢睇咗蘋果日報介紹咗啲好口啱孕婦食既食譜, 所以就整咗呢個"鮮奶紅棗燉雪耳"俾我食啦. 雖然唔係一啲好難整既嘢食, 但係佢咁有心去整啲我容易接受既鮮奶食品, 食既時候真係好窩心呢.

2012/03/19

陶寶B係B囝定B囡?!!

都成5個幾月啦, 好似仲未話俾大家知究竟陶寶B係囝囝定囡囡呢.

Heehee, 開估啦, 陶寶B係囝囝嚟架!!!!

一開始有咗之後, 謝菲都有問莎拉想係囝囝定囡囡呢, 不過大家都知道如果心中有一個Preference的話, 萬一到時既結果唔係, 咁就會失望呢, 所以莎拉同謝菲口講都係抱住"囝囡都無所謂"既態度. Hahaha, 但係當一知道係囝囝後, 大家不約而同都爆番自己係心中所想, 其實原來大家都係想陶寶B係囝囝呢, 謝菲話囝囝好似無咁多Worry, 加上仲可以同佢玩呢. 

其實係大約3個幾月既時候, 係私家做產檢時, 陳醫生已經話陶寶B好大可能係囝囝呢, 不過因為仲未係太明顯, 所以都唔係百分百限定. 到咗上次係廣華照超聲波時, 個"山"型已經好明顯啦, 連莎拉自己都睇得出呢. 所以係上個星期照結構時, 就睇得清清楚楚, 仲cap咗呢張相出嚟呀, 有"古古"架!!!wakaka!!!


2012/03/18

BB嘢-淘寶篇(一)

之前為結婚而淘寶, 而家有咗陶寶B當然又要淘吓寶啦. 今次分別係2間不同既商店淘咗啲BB嘢.

A) 幸福時光母嬰坊: http://ilovebb999.taobao.com/

我一見到呢啲出口美國Carter's既口水肩(8.5¥-9.5¥)就忍唔住手買咗3條啦, heehee, 其中2條係專for節日, 一條係christmas, 另一條係valentine's day用既, 真係好得意呢, 而質地都幾厚身, 所以莎拉應該會再買多幾條俾陶寶B mix&match呀!!!!

2012/03/15

與陶寶B一起的日子- W21 (廣華產檢)

第一次正正式式去廣華做產前檢查, 經過上次係廣華得咗個半鐘既經驗, 所以今次有晒心理準備, 起碼都要搞成2-3個鐘啦.

Appointment係10:15am, 去到真係人山人海, 我諗都有成30-40位孕婦, 但係估唔到又好快喎, 10:20已經叫名磅重, 度高及驗小便(記住要自己留起早上既小便之後帶埋嚟呀). 之後姑娘仲俾咗本"產科護理手冊"(我諗因為產前講座好難book, 所以先會有呢啲書仔派呢)

2012/03/11

陶寶B的第一件玩具

莎拉而家每個Weekend行街, 都一定會買嘢俾陶寶B架, 好彩自己有個Rules就係每次唔可以買多過兩樣嘢, 如果唔係一次過買晒又點可以滿足到莎拉既shopping欲望呢.

2012/03/07

與陶寶B一起的日子- W18-W20

Week 18
呢個星期終於都第一次去廣華醫院做產檢啦, 不過今次都係做中期唐氏咋. 下午appointment, 去到見到其實只得4個孕婦(包括自己), 座咗成粒半鐘先到自己呀, 期間電視機不斷重覆播放有關唐氏綜合症既有關資料呀, 真係睇到由尾背番上頭都識呀! 終於都到自己啦, 姑娘就問我有否係出面做咗早期唐氏檢查, 有的話佢就唔做今次既中期唐氏檢查, 因為早期既準確度較高. 所以當日姑娘只係幫我照超聲波睇吓陶寶B, 一切正常呀, 今次仲睇得好清楚陶寶B係囝囝定囡囡. 前前後後等就等咗1hr45min, 檢查就用咗10分鐘呢. 莎拉都係第一次去政府醫院檢查, 體會到慢長既等呀!!!! 去完第一次既檢查, 終於都有檔案編號可以上網book產前講座啦. 一返到屋企就九秒九log-in, OMG, 2月份, 3月份及4月份既所有Course都已經full晒, 有無搞錯呀!!!

Week 19
好多時孕婦係中期都會出現抽筋, 有一晚同謝菲講開抽筋呢個問題, 佢話如果莎拉半夜瞓瞓吓抽筋, 千期唔好大力大聲叫醒佢, 因為會嚇到佢呢. 真係呢頭講完, 第二晚莎拉就瞓瞓吓隻腳抽筋啦, 細細聲叫醒謝菲幫我按摩, 一陣就無事啦!!! 呢個星期開始, 每晚都會同陶寶B唱兒歌, 莎拉獨姑一味, 只係會唱"Twinkle twinkle little star"同"Row Row Row the boat", 希望第時陶寶B出世後, 如果扭計時聽到莎拉唱呢兩首歌就會變乖乖啦.

Week 20
呢個星期莎拉個胃好唔舒服, 個胃頂住頂住, 啲食物好似唔落格, 消化唔到, 死頂返工咗成日, 一放工就拿拿林返屋企啦, 搭地鐵搭咗幾個站就覺得自己唔對路啦, 立即落車轉的士, 一落車, 莎拉就嘔啦, 一入到屋企就再嘔到九彩, 瞓咗一晚之後, 都見唔多舒服, 所以就Sick leave咗一day, 睇睇醫生穩陣啲. 因為唔係太想食藥, 所以消化系統疲弱問題都係唔多改善, 雖然已經食得好清及份量少, 但都係唔多舒服呢. 第二日返工後, 同事提議我可以係食飯前飲一小湯匙醋可以改善胃氣脹問題, 不論白醋浙醋都可以. 當晚莎拉試咗一試, 又好似好好多, 成晚個胃無再頂住, 無晒胃氣呢, 仲居然有胃口食咗個椰青焗鮮奶蛋白添. 呢個飲醋既方法so far都幾有效, 橫豎醋都唔係啲咩有害物質, 所以一見個胃好腸頂住時, 莎拉都會用呢個方法呢.

終於都Feel到陶寶B踢我啦, 個感覺真係好奇妙呢, 好似係個肚皮入面輕輕"姑LU姑LU"咁, 第一次有呢種感覺時, 莎拉仲同謝菲講唔知係自己條腸既郁動定係陶寶B踢我呢. 陶寶B暫時都係踢我既右面肚皮, 佢好似唔多識轉身呀, 唔知係唔係游水游得唔夠Feel呢?! 胎動既力唔係太大力, 而次數(莎拉數到既計)平均每日都有10多次, 自從feel到胎動後, 感覺實在好多, 因為真係可以感受到有一個小生命係自己肚入面呢.

2012/03/06

早餐定午餐 - Flying Pan

星期六去BB展之前, 當然要食飽飽, 有氣有力先可以去沖入會場呢! 對於莎拉呢個九龍人, 每次去灣仔都心郁郁想去食all day breakfast.

2012/03/03

人山人海BB展2012

莎拉婚宴展就去得多啦, BB展就真係第一次去呢. 星期六同老公食完個靚Brunch都已經3pm啦, 去到會場, 真係人山人海, 相比起以往去過既婚宴展真係墟撼好多呢. 係入口位就已經見到有好多BB車泊咗係度, 入到會場, 真係人車(BB車)爭路都唔只, 最慘就係見到有啲已經好大肚既孕婦或者手抱住得2-3個月既BB, 因為實在太多人啦, 一下唔覺意真係好容易撞到佢地或自己呢. 去完呢一次BB展都唔會去下次啦, 因為真係唔多啱大肚婆及BB去啦, 整親就唔好啦.
今次去BB展既Target就係買摺得埋既BB沖涼浴盆, 所以都主要係向住目標進發, 而其間都買咗一套5件既BB衫俾陶寶B, 啲BB衫真係好鬼C得意呢, 忍唔住手呀!