2015/10/7
莎拉還記得細個時幼稚園既旅行居然係由學校既後門行去前門入返學校, 之後就全部同學仔坐係操場度野餐, 呢個記憶真係記憶猶新. 今時今日既幼稚園就唔同啦, 有真正既旅行之餘家長仲可以一齊去.
今次學校安排咗去大棠有機生態園玩, 早上9am就係學校集合出發, 係旅遊巴坐定定就出發啦!
陶寶B興奮就一定, 不過其實莎拉都同樣期待今天既學校旅行, 因為可以從中觀察及認識陶寶B既同學仔喔.
等我介紹吓, 呢個就係我既朋友仔1號.
每一位入場人士都已經包了4張coupon, 而coupon係可以用嚟玩園內既活動或者買食物/飲品.
陶寶B見到呢架牛牛車就衝上去, 車上有咩玩, 咪就係有個丁丁可以玩囉.
另外園內最受歡迎既活動就係滑梯及秋千, 小朋友眼中既至愛之一呀.
滑梯係我既至愛呀!!!!
仲有繩索陣玩呀, 不過陶寶b爬了一兩步就唔玩啦, 因為好難爬, 面上出現少少驚既表情, 之後就唔再玩要落番嚟啦.
呢個生態園既遊人主要都係幼稚園或社福機構既旅行團, 所以人不會太多. 話明生態園當然有動物啦, 小朋友仲可以用Coupon換一些紅蘿蔔餵羊仔及兔仔. 起初陶寶B都唔夠膽餵羊仔, 因為啲羊仔實在太熱情嚟搶食紅蘿蔔啦, 所以佢就轉移去餵兔仔, 因為兔仔細細隻呀嗎.
不過一輪熱身之後, 最後陶寶B都無咁驚啦, 餵羊仔成功.
園內好多設施都係特別為小朋友而設既, 例如呢個”搵笨”魚魚遊戲, 點樣搵笨?! 咪就係你用佢個紙網係永遠都無法捉到魚仔既, 不過無所謂啦, 玩吓姐.
捉唔到魚仔就轉去餵魚仔啦, 幾個小朋友圍埋一齊去餵魚都好開心.
全個生態園最想玩既就係騎馬啦, 因為騎馬唔係度度都有得玩. 起先都膽心陶寶b會驚唔敢玩, 但係原來小朋友係會互相影響架, 陶寶B見到排隊既同學仔好定咁騎馬,所以佢都好定定咁去玩. 戴咗頂騎師帽先, 準備好未呀?!
雖然只係騎咗一圈, 但係2張Coupon就可以有個騎馬初體驗真係唔錯呀.
騎完馬就諗住去馬房俾陶寶B試吓餵馬仔啦, 點知佢驚到要出番去呀, 咁就唯有莎拉自己去餵馬啦.
叫陶寶B再入去馬房就點都唔肯, 係馬房出面影吓相就可以.
全日都玩咗幾個鍾其實大人早早就已經無晒電啦, 不過小朋友就仲係精力旺盛呀. 難得係親子旅行, 不如同班主任影張相啦, 不過陶寶B呢個影相既表情係想話俾莎拉知佢係十萬個不願意影啦!!!
開心既時光過得特別快呀, 唔知下學期仲有無呢類活動呢?! 因為莎拉真係好鐘意參加呢. 其實幼稚園既旅行意義對小朋友嚟講, 可能就係可以圍埋一齊玩, 玩咩都無所謂呀.
No comments:
Post a Comment