DIY手花教室101 (用珠仔手鍊)

之前有JM問點樣可以將條珠仔手鍊黏實個手花, 其實我係主要用熱熔槍, 我試過唔用熱熔槍但hold得唔實同好唔穩固, 同埋我同咗2條珠仔手鍊, 因為個手花唔輕, 同1條就好似單薄咗啲, 2條珠仔手鍊就穩固啲, 靚啲, 同埋in case touch wood, 就算有一條斷咗都仲有另外一條頂住.

希望呢篇DIY手花教室幫到大家!!!

材料: 絲花, 珠仔, 彈性透明魚絲, 花材鐵線(#28號), 花貼, 熱熔槍

Step1) 呢個步驟同整襟花我頭3個step一樣 (可阡參考: DIY襟花教室101), 將絲花駁位接上花材鐵線, 然後用熱熔槍黏實, 之後用花貼包住接駁位.

Step 2) 然後將幾組花束綁在一起之後用花貼包實固定.

Step 3) 因做手花所以花腳不可以太長, 所以要將佢剪短, 之後用花貼包番住個花腳. 然後將條彈性透明魚絲,在花腳打兩個圈之後打結, 因為透明魚絲有彈性, 所以就算打結後佢都會自動鬆番彈開, 所以要利用熱熔槍當膠水咁黏實定型. 注意, 因為熱熔槍個槍口(金屬部份)係極之高溫, 如果金屬部份一掂到魚絲會立刻斷開, 所以要小心點啲熱熔膠落去魚絲.

Step 4) 之後可以串上珠仔, 然後打結收尾, 同樣地因為透明魚絲有彈性, 所以就算打結後佢都會自動鬆番彈開, 所以要利用熱熔槍當膠水咁黏實定型個打結位.

Step 5) 重覆Step3及Step4之串珠仔手鍊部份, 整多條鍊, 咁就大功告成!!!