陶寶B病了

莎拉放完產假返工唔夠2星期, 陶寶B就病咗啦!
事原上星期三下午, 婆婆打電話嚟話陶寶B有啲發燒, 用耳探38.5C, 所以就拿拿聲去屋企附近既診所, 去到診所醫生用紅外線探就成39.5C, 而因為陶寶B未夠3個月就發高燒, 所以要轉介去醫院!
婆婆打嚟俾莎拉時, 真係嚇c媽咪同嗲哋, 所以莎拉同謝菲一放工就立即去廣華醫院滙合婆婆同陶寶B.
去到醫院用肛探都有成39c, 所以要入院留醫. 見到陶寶B眼仔同dup晒, 眼腫腫, 連喊都無力, 真係好心痛!
上到病房見醫生, 因為陶寶B係發高燒, 驚佢係腦膜炎, 所以要做脊椎穿刺以便取得腦脊髓液既物質作化驗, 除此之外仲要肺部照x光, 抽血, 驗小便, n咁多個test! 而期間會打對付腦膜炎既抗生素先!
搞完一大輪, 陶寶B就安排瞓在育嬰箱(保溫箱),  陰公豬, 一隻手就種豆豆, 另一隻手就抽血, 一隻脚就駁住儀器監測佢既心跳及血氧量, 媽媽見到都忍唔住喊!!



醫院可以俾一位家長留守24小時, 所以晚莎拉就留係度陪住陶寶B, 成晚都瞓唔到, 因為好擔心陶寶B有事!!! 而家就真係知道做咗人父母之後, 個種擔心真係無辨法形容, 不過好彩當晚已退燒!

不過第二日早上探熱又燒返38.4C (個一刻真係好驚!!!), 主診醫生巡房睇陶寶B, 啲Report出咗, 好彩唔係腦膜炎, 而照肺及鼻分泌既測試都可格, 沒有肺炎, 但係尿液化驗就唔ok, 好可能係尿道炎, 不過因為要等種菌結果先可以confirm, 但係期間會改用醫治尿道炎既抗生素. 而改用此藥物之後, 陶寶B已沒有再發燒, 總算鬆一口氣.

退燒後既陶寶B都開始精神番啦, 仲開始踢手踢腳, 但因為佢都成2個半月大, 所以瞓係保溫箱內就好似巨人住係小人國咁, 啲手腳撞到個箱"Pan pan"聲, 啲姑娘都笑陶寶B係大BB呢. 所以佢退燒穩定之後就出箱轉瞓床仔呢.

瞓咗3日醫院之後, 醫生就俾陶寶B放假返屋企過weekend, 之後星期一再返醫院睇Report.
陶寶B返到屋企後, 成個醒晒, 當然啦, 屋企係佢主場, 呢度佢話事!!

星期一返晒見醫生睇report, 確認係尿道炎, 而莎拉第一個問題就係女BB有尿道炎就唔出奇呢, 但係男BB有尿道炎就好似好難明白. 醫生就解釋最大擔心就係BB先天結構性問題, 例如尿道短引起尿液倒流或腎部結構問題, 所以陶寶B出院之後就要排期安排做3個不同既測試, 以便睇吓尿道炎會唔會係先天結構性問題, 所以係未有結果之前, 陶寶B都要食住有保護性既抗生素直至下之覆診, 防止再次感染.
不過醫生都安慰我地唔使太擔心, 因為好多尿道炎既成因都係unknown沒有原因!!! 不過點都好啦, 希望陶寶B唔係先天結構性問題就好啦!!!!

陶寶B你要乖乖呀, 要健健康康呀!!