走遍商場 - 又一城Xmas外影

農曆新年都嚟緊頭, 莎拉而家仲Post緊一個月前既嘢, 真係要努力加油post多啲先得呀!
2012/12/9
仲係放大假, 當然係行街行盡佢啦. 莎拉細個既時候覺得可以同聖誕老人影相就好啦, 以前香港就唔係好流行, 但係在加拿大一到聖誕節, 好多shopping mall都有聖誕老人同小朋友影相, 可惜莎拉都超晒齡都唔好意思搵聖誕老人影相啦. 所以到咗有陶寶B, 莎拉都好想係BB既第一個聖誕節, 可以一齊同聖誕老人影相呢. 莎拉一直記得又一城每一年都有棵好大既聖誕樹同有個外國人扮既聖誕老人, 所以今年一定要去又一城啦.

係又一城俾$60就可以同聖誕老人影相, 仲有個相架連一張即場打印既相添, 而呢$60係做慈善架, 係幫"高錕慈善基金"籌款架, 所以都幾好呀, 可以順便做善事.

哈哈哈, 呢個聖誕老人都好正宗呀, 始終都係外國人扮既似好多, 加上佢有個大肚腩, 像真度都好高呀! 陶寶B見到聖誕老人好彩無喊, 仲好叻叻影到張靚相呢.

因為時間仲早, 人又少, 所以可以係聖誕樹附近慢慢影, 附近又唔多人, 所以真係唔錯.


影完相就到大人搵嘢食啦, 今次就食Habitu因為謝菲好想食佢既Fish&Chips, 等咗20分鐘就有位啦.
莎拉: 陶寶B, 你又識睇Menu?!
陶寶B: 我想睇吓有咩啱我食呀!!!

而陶寶B俾我地舞咗一輪之後, 好眼瞓啦, 唔夠5分鐘就已經瞓咗, 就咁放係張長椅度都可以瞓著, 叻仔呀, 遺傳咗莎拉媽媽既真傳, 同莎拉一樣無論咩環境都可以瞓得到!!!

哈哈哈, 陶寶B真係識做, 等莎拉同謝菲可以撐吓檯腳, 噗個Fish&Chips 同個Pizza, 加個fresh limonade, 正呀!
到差唔多食完時, 陶寶B就好準時自己自然醒, 真係鬧鍾都無佢咁準呀!