23th成長之路

2歲前最後一個成長之路既記錄了, 真係好唔捨得陶寶B咁快就進2歲呢. 

身高及體重 

呢位小朋友Keep住都係長高既, 試過只係著住片片在家同佢影相, 但係影到佢好瘦呢, 所以影完都唔夠膽post出嚟呀, 因為陶寶B其實係鋼條既身型, 身上既係muscle呢.(唔通佢為第時練人魚線作準備?!!哈哈哈)

食量

之前早餐好like既提子包, 今期完全唔like了, 換上既新歡係蛋糕仔,但因為唔想佢食啲太甜及太油既蛋糕, 所以唯有自己整少糖少油既雪芳蛋糕啦, 真係仲麻煩過整麵包呀. 而每次同檯食晚, 佢都會指住佢想食既個碟餸叫係夾俾佢呢, 不過呢位小朋友都好健康, 佢指出想食既嘢好多時都係蔬菜類呢, 分分鐘健康過你同我呀 如果當日有米粉或麵, 陶寶B就會更加瘋狂, 完全係追住嚟食呀 (呢一點似足莎拉呀) 另外呢位小朋友有一晚食飯時俾咗個surprise俾莎拉, 就係居然識"lur"骨, 仲要係魚骨, 真係估佢唔到!

活動能力

同佢講"hug hug"時, 佢會好sweet咁攬住你, 跟住隻手就會輕輕拍拍你膊頭, 真係好鬼sweet架. 而家玩完玩具會要佢自己執好啲玩具, 每一晚都會乖乖照做. 另一進步就係每晚食完晚飯由婆婆家回自己家時, 佢終於都乖乖自己行足全程呀, 路程都有10分鐘架, 所以呢個都係一個大進步呢. 不過說話方面都係沒有太大進步, 希望經過言語治療後會快啲改善啦, 因為有時見到其他小朋友已經可以用簡單既對話溝通, 但陶寶B都仲未係可以用言語同我溝通, 對佢其他學習既發展都會有好大影響呢, 莎拉不是需要佢好叻, 只係希望一切發展與同年既小朋友相若就好了. 

作息時間 

今個月晚上已經不需要用奶咀先瞓到啦, 不過午睡就暫時未能戒奶咀 , 所以還需努力. 

健康 

感恩陶寶B一切安好.