為食豬

好想寫呢個topic好耐架啦, 因為每當小朋友食緊喜愛既食物時個樣真係特別可愛. 感恩陶寶B係食呢方面都唔係太需要莎拉擔心, 不過佢都有喜惡之分既. 

1) 首先陶寶B係一個澱粉王, 飯麵粉通通都鐘意(粥就例外), 特別鐘意食粉麵, 就算佢已經食咗飯, 但每當一見到有人食粉麵, 陶寶B都要食埋一份, 人地唔知飽就追飯食, 佢就追麵食, HAHA! 

2) 另外, 菜與肉相比, 陶寶B係鐘意食菜多於食肉, 所以陶寶B暫時都未可以好似其他小朋友咁, 飯還飯, 餸還餸, 因為陶寶B如果當日既肉唔啱佢口味, 佢係會唔食, 所以好多時都會將啲肉與飯一早撈好先俾佢, 等佢食晒碗飯之後先俾佢食菜(因為試過俾埋菜佢就食晒啲菜唔食飯!) 

3) 講開食菜, 陶寶B都有要求架, 佢最鐘意食爽口既菜, 如果你諗住煮淋啲咁就No Way啦. 佢頭號至愛就係菜芯, 仲要係專揀食菜梗, 白烚都會同你食晒. 

4) 甜食方面相信沒有小朋友唔鍾意, 陶寶B都唔例外, 所有蛋糕雪糕waffle通通都Like, 至於糖水方面就唔係款款食, 因為佢未見過未食過既係唔會輕易同你試, 所以so far食過紅豆沙及西米露都食, 但係木瓜雪耳就一定唔食, 因為所有同木瓜有關既食品都No No No. (唔通你細個食得木瓜太多?!) 

5) 至於出街飲茶一盎兩件佢都好鐘意架, 至愛既點心係"燒賣", 最高記錄係一個人食3粒燒賣, 無錯係3粒, 睇怕你同我都未必可以食到3粒. 其他什麼蝦餃粉果, 佢就掂都唔掂吓, 真係俾佢激C, 係咪個個小朋友都係食得咁固執既呢? 至於甜味既包及腸粉都會食少少. 

6) 生果方面都食得好平均, 首選香蕉, 蘋果, 橙, 藍莓, 莉都鐘意食, 不過一啲淡味水果例如火龍果及天桃就麻麻地.  整體陶寶B食嘢都好平均, 好彩沒有出現偏食既情況, 感恩喔, 起碼莎拉可以煩少一樣嘢.