2015/12/27
一到12月天氣轉涼後就諗起, 又係摘士多啤梨既季節開鑼了! 今日天氣真係麻麻地天陰陰, 唔知係咪呢個原因所以今日場內真係好少, 上次嚟錦田鄉村俱樂部時真係人山人海架, 今日就得小貓三四隻, 初時仲以為俱樂部今天休息添呀.
場內既士多啤梨好多都仲係細細粒, 我地就主要摘韓國種既士多啤梨, 雖然士多啤梨細細粒, 但係都好香甜呢.
今次摘士多啤梨有朋友仔Oswin BB相伴, 陶寶B都不知幾開心呀, 陶寶B仲好似大哥哥不斷教人地點去摘添.
上年嚟摘士多啤梨時, 陶寶B都仲係一舊雲, 未係好識自己主動去摘, 今次就完全唔同啦, 如果唔係叫住佢, 佢會係又摘唔係又摘呀.
不過教咗佢點樣揀後, 起碼唔會摘啲爛既士多啤梨先, 短短半小時都已經摘咗唔少了. 其實今次啲士多啤梨細細粒都有好處架, 因為啲士多啤梨要成$100/LBS, 陶寶B摘咁多, 如果粒粒都大大粒的話, 埋單時就肉都赤埋都似呀.
除了有士多啤梨摘之外, 一片大草地上最好就係由得小朋友Free play架啦, 小朋友見到Bubble就會起勢去跑去追, 呢個應該係小朋友既天性呢.
當然嚟得錦田鄉村俱樂部就當然唔會淨係摘士多啤梨啦, 場內既極度老翻機動遊戲都要玩架. 雖然啲公仔既樣就係樣衰啲同老翻一啲, 但係小朋友都一樣玩得咁開心.
本來今日一心嚟玩碰碰車架, 但係點知開始落雨, 咁就唯有玩砵砵車啦, 陶寶B係場內風馳電掣, 以為自己好快好勁, 查實就係慢速車車一架, 哈哈哈!
唔經唔覺就玩咗幾個鍾啦, 下次2月時要再嚟過, 希望到時啲士多啤梨可以大大粒啦.
No comments:
Post a Comment