星洲炒米同揚州炒飯有一個共通點, 就係揚州跟本無揚州炒飯, 去到星洲跟本搵唔到星洲炒米. 星洲炒米係茶餐廳及酒樓既午餐餐牌既常客, 不過出街食星洲炒米, 往往都會擔心太辣而小朋友食唔到, 所以自己整星洲炒米就可以控制辛辣程度, 炒定第二日帶飯都好合適, 而材料其實沒有硬性規定用什麼配料, 打開個雪櫃見有咩就用咩, 好隨意的.
材料:
米粉 2人份量 (用凍水浸軟)
叉燒 半碗 (切絲)
韭黃 半碗 (切段)
蝦仁 半碗
蟹柳 3條 (切段)
雞蛋 1隻 (煎蛋皮後切絲)
蒜蓉 1茶匙
咖哩醬 1茶匙
做法:
1) 鑊內加油燒熱後, 加入蝦仁炒至9成煮後裝起備用, 之後再爆炒叉燒及韭黃, 裝起備用.
2) 加油在鑊內中火燒熱, 加入蒜蓉及咖哩醬炒香後, 加入已浸軟的米粉, 用筷子不斷炒鬆米粉
3) 當米粉已炒至完全軟身後, 便加入蝦仁, 叉燒, 韭黃, 蟹柳及雞蛋兜均, 加入少少豉油作調味後即成.
溫馨提示:
a) 米粉有好多款, 而銀絲米粉或番禺排粉就適合炒米粉之用, 如果新手就最好用銀絲米粉, 因為會比較客易炒.
b) 炒米粉想炒得乾身, 秘訣就係所有配料預先炒好, 避免出水問題.
No comments:
Post a Comment