莎拉既C9仔旅行概念就係”平住豪食”或者掉轉”豪住平食”, 所以今次澳門就豪住了, 所以食就會食平DD, 咁先可以平衡吓. 雖然係平食, 不過澳門通街都係又平又好美既美食, 所以一樣可以食得開心.
世記咖啡外賣店 (氹仔店及新馬路店)
每次嚟澳門都要飲過世記炭煲既咖啡先至覺得嚟過澳門.
其實除咗佢既咖啡出名, 世記既炭燒包都好出名, 可惜每次嚟既時候唔係太多人就係店鋪就快關門無得食, 所以今次就一次過試咗好多款. 首先就叫了個咸牛肉蛋多士及辣魚豬仔包先. OMG, 咸牛肉蛋多士啲蛋真係成寸咁厚, 一啖咬落去真係好滿足好幸福呀.
至於個辣魚豬仔包啲料就少咗啲, 不過味道就係莎拉細個時好鐘意食那種咖哩洋蔥包餡料的味道, 如果餡料多啲就會更加好.
之後見到有人叫了個撈丁又忍唔住叫了一個, 香噴噴既豬扒撈丁, 豬扒真係大大件又Juicy, 而當日相信係老板娘既人見我地有小朋友, 仲主動問使唔使幫手剪一剪啲麵, 好好人, 因為老實購澳門有好多出了名既食店, 佢地好多時待客都係黑晒口面, 估都估唔到呢間咁出名既世記咖啡仲會咁nice, 仲要好好禮貌.
之後第二日再幫襯新馬路的分店, 今次就試試豬扒包, 其實世記既豬扒包都好好味, 不過同大利來相比, 塊豬扒就好似薄身一些(當然價錢都平過大利來), 但如果係新馬路呢個位置, 就一定會好食過出面大街那間”大聖”多多聲.
Feast 盛宴
好多人都話嚟澳門都要食buffet, 所以其實好多時嚟澳門, 莎拉查實都真係會食, 價錢其實真係平過香港, 不過小童既收費都間間不同, 因為陶寶b只得4歲, 如果佢要俾$200又好似唔係太抵, 所以Sheraton酒店既Feast就最啱莎拉, 因為小童係由6歲起計, 所以成日為番每位$350+10% (原價$438, 但係如果是SPG member就有20%off, 呢個SPG membership可以即場申請的).
雖然整體既食物選擇唔係非常多, 但係凍海鮮類真係好豐富, 即開生蠔, 龍蝦, 長腳蟹, 麵包蟹, 青口, 蝦通通有齊, 一家3口都係$800真係好化算.
陶寶B自己就整了碗麵麵加蜆, 食得不知幾知味.
至於甜品就中規中距呢, 最正就係有haagen dazs雪糕了.
瑪嘉烈葡撻
瑪嘉烈葡撻位處於橫巷之內, 雖然位置十分隱匿, 但幫襯既人真係多到離晒譜, 十個排隊既十個都係遊客, 當日去到掛了差不多30分鐘先買到2個葡撻, 因為佢每次一出爐就會賣晒, 所有基本上排隊係等買下一爐, 真係要有時間有耐性先好排呢, 當日我都係俾晒錢等攞先知要排咁耐呢.
不過講真, 瑪嘉烈葡撻真係好食, 甜度適中又香又熱辣辣, 同平時係鉅記那類鋪頭買既真係差天共地呀.
大利來記豬扒包
從前既大利來記豬扒包只有係氹仔先有得食, 但而家大利來記豬扒包開了好多分店, 而當日排隊等攞瑪嘉烈葡撻時, 就見到附近開了間大利來記豬扒包,既然肚餓不如食番個大利來記豬扒包先!
其實大利來記豬扒包真係一啲都唔平(好似$4X), 不過佢塊豬扒又真係大塊啲厚身啲, 一啖咬落去真係好Juicy, 一家3口分享一個豬扒包真係唔夠喉呢.
度小月(百老滙大街)
住係銀河酒店 其實基本上唔使點出外都一定有好多食店選擇,
而附近既百老滙大街更加係其中一個搵食地點, 莎拉都係第一次去百老滙大街, 成條街除了有好多食店之外, 仲有好多小食攤檔, 不過就好唔吸引, 而另外街上有人唱歌表演, 個氣氛都唔錯.
睇資料知道百老滙大街引入了好多澳門出名既食店, 行了一圈後, 最後決定要食度小月, 因為上一次係台北食過佢既肉燥飯就念念不忘了.
嚟得度小月一定要食肉燥飯($18)及加大擔仔麵($28)之外, 仲試了蚵仔酥($50). 肉燥飯及擔仔麵真係無得輸, 早知就叫多兩碗啦.
而個蚵仔酥都好好味, 啲蚵仔好鮮甜肥美.
三樣埋單$100唔駛, 仲要用中銀信用卡有10%Off添. 點解會食咁少嘢, 因為諗住試吓其他所謂出名食店, 點知就中晒伏呢. 首先去了一間食緬甸粉麵既”牛牛小吃”, 因為聽聞澳門既緬甸粉麵好好食, 之從來都試過, 今次有機會就試一試啦, 點知牛牛小吃無位, 咁店員就安排了我地坐隔離鋪米芝連地道煲仔菜”李家菜”, 點知就出晒事了.
叫了兩碗緬甸粉麵, “牛牛招牌魚湯粉”($38)及” 牛牛招牌魚椰汁雞麵” ($33) , 之後見到” 米芝連地道煲仔菜”呢串字就叫了個推介”啫啫雞煲” ($88). 三樣都伏中之伏. 首先, 個牛牛招牌魚湯粉啲粉淋到不能再淋既地步, 而成碗魚湯粉得一粒魚蛋咁大把.
之後碗” 牛牛招牌魚椰汁雞麵”, 好Rich既椰汁, 唔係想像中咁好食, 個人覺得Laksa好食好多.
至於個” 啫啫雞煲”真係好普通, 同米芝連地道煲仔菜真係一啲都連繫唔到, 當時決定叫啫啫雞煲都係因為想食吓豬潤, 點知成煲啫啫雞一件豬潤都無呀, 無豬潤既就唔係啫啫雞煲啦.
食完呢兩間伏店後真係好後悔, 早知剛才係度小月食多啲啦. 食完一啲咁伏既, 要食個椰皇雪糕平衡一吓, $25一杯真係唔平, 不過好彩味道都唔錯.
檸檬車路Lemon Cello
每之嚟澳門一定要食檸檬車路, 呢個已經係莎拉既指定動作, 無論夏天定冬天都要食.
仲要一定揀” 檸檬車路”及”蕃石榴”呢兩款味道, 行到攰攰地, 食番一杯酸酸甜甜好醒神.
小上海鍋貼
位處於賣草地街內的橫巷既小上海鍋貼其實係極之唔起眼, 不過每次經過都一定要買幾件鍋貼先安樂, 佢未必係最好味道, 但係每隻鍋貼都煎到脆卜卜, 熱辣辣好好食.
No comments:
Post a Comment