新一年新開始, “通山跑”作為2017既第一個活動實在是最好不過, 冬日天氣又涼爽, 襯好天氣出戶外玩真係人都精神啲. 今次就約埋家人一齊去清水灣郊野公園大坳門放風箏.
大坳門位置及交通雖然唔方便又無車直接到達, 但係人流一啲都唔少, 去到10:30時差不多所以野餐檯及燒烤爐都已經沒有了, 所以如果打算BBQ既朋友真係要再早啲先可以霸到爐.
其實今次已經係第二次嚟, 不過放風箏都係第一次, 希望挑戰成功啦, 因為查實莎拉謝菲都係第一次放風箏, 今次真係初哥二人組.
放風箏既位置處於山頂, 所以其實都好好風, 先天條件好對初哥嚟講好有利, 見到天空有咁多隻風箏, 心諗應該唔難放既.
第一步首先要將隻風箏綁埋個繩索及個轗先, 呢啲簡單工序就等莎拉做啦.
平時睇電視見啲人放風箏就係一個人將隻風箏向上拋, 另一個人就拉上拉落, 好似好容易.
莎拉謝菲就有樣學樣, 點知幸運地真係一下就成功放到隻風箏上天, 睇吓, 隻紅白色既風箏就係我地架啦.
兩父子"懶"溫馨咁, 唔夠一分鐘, 陶寶B就走咗去啦, 哈哈哈!
點知原來放隻風箏上天空唔難, 要保持隻風箏繼續係天空先至最難呀, 因為玩了一陣, 突然無風, 隻風箏就趺返落嚟了, 之後仲搞到啲線一舊舊, 整咗一輪先解開到.
玩到打晒結, 陶寶B都無晒心機玩了, 好合理呢, 放風箏呢啲要企定定比較靜既活動, 陶寶B會無心機玩太耐. 所以佢已經轉戰去玩飛碟, 不過陶寶B玩飛碟好似玩到轆保齡咁.
婆婆坐係度見陶寶B係度轆飛碟, 笑C喔.
其實如果唔放放風箏, 清水灣郊野公園大坳門既風景都好靚, 一家人行吓山都唔錯架.
No comments:
Post a Comment