[瘋狂波波池]朝聖大樹先生的家

大樹先生的家，相信一眾父母一早都已有聽聞呢間由台灣吹到嚟香港既親子餐廳有幾咁難訂位了，開業初期只有電話訂位，所以電話長期處於帶唔通既狀況，好彩後期有得上網訂位，但係星期六日都係成日full booking, 莎拉當然想帶陶寶B去玩啦，可惜真係好難book呢，終於莎拉年廿九就收爐，所以終於可以係平日book位，本來打算食lunch, 但係原來平日既lunch都係好難book,咁最後就唯有book 下午茶時段啦！一去到門口就已經俾佢個波波池吸引了!

大樹先生的家設有4個時段訂位分別係早餐/午餐/下午茶/晚餐，而價錢係每位6歲以上既設minimum charge, 而0-6歳小朋友就設有清潔費，但係清潔費就不可用作抵消叫嘢食既消費呢！好似今日只有莎拉同陶寶B兩個人，埋單就至少要$128+$58（清潔費），所以今日就order最少$120既食物，大家請放心，要order$120既食物係非常容易，俾大家睇吓個menu就知道了！

老實講，食物及飲品既價錢明顯係overpriced, 所以如果只係下午茶叫少少食物就唔容易超過那最低消費，但係如果係食午餐或晚餐就真係太貴了，所以今天誤打誤撞，訂了下午餐時段嚟玩反而慳咗添！

場內一排排的餐桌排列整齊，但好多都係見唔到人既，因為大部份家長們都第一時間被係小朋友拉了去玩波波池喔！

雖然係Open kitchen, 但係一啲油煙味都無架.

陶寶B都急不及待, 問幾時可以開始玩啦.

Yeah, 終於有得玩啦!!!!

因為場地一早已限制了人數，所以波波池其實唔會覺得擠迫.

不過因為場內小朋友由手抱到6歳都有，所以年紀較細既小朋友玩既時候要小心一點，因為年紀大既小朋友真係玩得比較癲. 

查實呢個波波池莫講話小朋友啦，連大朋友既莎拉係咁多波波內浮游都覺得無比興奮，好似做翻小朋友咁.

陶寶B不斷地係波波池游水, 開心到極點. 

呢條滑梯, 陶寶B都唔知玩咗幾多次了, 無限Loop!

場內既波波比起平時既波波有啲唔同，因為佢地點踩都唔會凹，而每個波波都係印晒「大樹」呢兩個字，鐘意既仲可以買返屋企添！

場內有一個小區域係專們俾BB玩既，所以bb都可以玩得安心啲. 

至於另一邊就有大量既路軌及火車俾小朋友發揮佢地既創意. 

屋企既路軌無呢度咁多, 所以呢度好好玩呀!

而女孩子就一定會好鐘意呢度，因為有好多好靚既煮飯仔遊戲設施及公主屋玩.

陶寶B未玩過都唔執輸試玩埋一份！

大樹先生之家又點可以沒有大樹呢?!

玩咗咁耐啲嘢食都到咗啦，洗洗食先食嘢，場內設有兩個不同高度既洗手盆方便小朋友唔使去商場內既洗手間去洗！

莎拉就只係叫了一杯茘枝蔬打及黑松露薯條，兩樣加埋就已經超出最低消費了，飲品都好大杯吓，小朋友飲晒都幾多.

而黑松露薯條就都好食，薯條係厚切點黑松露醬好好味！

兩母子都係第一次賣甩爸爸去下午茶喔.

食過嘢充了電後，陶寶B又再急不及待要繼續玩.

場內個沙池雖然細細地但係都夠晒小朋友玩，沙池內有不同既工具，小朋友可以隨便玩. 

玩完後成腳沙點算好？！唔使擔心，餐廳放了幾個風筒放便小朋友整走啲沙，好讚既安排呢.

 老實講，3.5小時既時光，小朋友絕對無冷場，臨走時陶寶B仲唔捨得走，仲話要下次再嚟過呢！其實下次要嚟唔係問題，最麻煩就係好難訂位呢，唔通下次莎拉要訂早餐時段？！埋單多謝$231.

至於價錢方面，就當去遊樂園玩吧，見到陶寶B玩到咁開心, 咁樣諗好咩都抵呢！

陶寶b與莎拉媽