證婚埸地-帝京酒店 地中海花園

A) 關島行禮

自從幾年前同謝菲去關島旅行後, 我就一直同自己講第時結婚一定要要去關島行禮, 因為可以係藍天白雲, 白色水晶教堂下成婚, 一定好romantic. 但係好可惜, 關島行禮的計劃不能成行, 因為我曾經試探屋企人既口風, 媽咪話咁麻煩, 要啲親戚飛去觀禮, 最好唔好去關島結婚啦! 另外再加上近一兩年, 爸爸身體唔係太好, 唔係太過適合搭飛機, 所以關島結婚既idea一早已經放棄!

B) 酒店夜晚證婚

有啲朋友問我點解唔係酒店夜晚個場證婚, 因為個人真係覺得係酒店夜晚證婚個感覺唔係太好, 因為好怕到時俾我見到有啲賓客唔係太respect個證婚儀式, 我都明白如果夜晚先證婚, 有啲好似強迫啲人睇你地證婚, 所以酒店夜晚證婚一早俾我OUT咗.  

C) 婚姻註冊處

之後諗不如去紅棉道婚姻註冊處啦, 個環境都幾靚呀, 但係婚姻註冊處原來星期六下午係唔開(除咗大會堂個間), 所以時間上配合唔到, 又OUT埋! 疊埋心水出去搵其他證婚埸地啦!

D) 伯大尼教堂

伯大尼教堂其實都係心水選擇, 但係發現佢個地點幾唔就腳, 加上價錢都唔平, 所以要OUT!

E) 伊x園, 奇妙恩典, 緣美傳說

因為出門地點係尖沙咀既酒店, 所以最好證婚埸地係附近. 而伊x園早期有啲戶外既證婚場地係尖沙咀及中環, 但係伊x園個口碑真係唔掂, 太多bad comment, 分分鐘你而家book一年後既場, 到時個場都搬走咗. 加上我曾經參加過一次係伊x園既證婚, 個律師完全唔合格, 勁求其, 好似有指槍係佢背脊指住佢迫佢做咁, 所以伊x園OUT埋!

而其他證婚場地例如奇妙恩典及緣美傳說, 因為唔係太鍾意係啲商業大廈, 加上附近無乜地方影相, 所以OUT!

F) 皇家太平洋酒店-薰衣草証婚

之後去過尖沙咀間皇家太平洋酒店(Royal Pacific hotel)睇, 因為佢有個薰衣草証婚套餐, 個場地佈置theme係lavender, 又包每位一杯(最多50位)薰衣草特飲, 好似幾吸引, 但係去到睇個場, 因為係indoor既關係, 個樓底好矮(仲矮過我wedding banquet個場), 場內有柱, 最大問題係個埸實在太細(好似大約可以容納50-60人), 萬一多咗人, 真係無地方企, 加上如果到時多過50人, 酒店係會charge番每位人頭費, 所以我諗諗吓唔得, 分分鐘有機會多過50人, 所以呢個場OUT!

G) 帝京酒店-地中海花園

之後見到帝京酒店八樓有個室外地中海花園, 雖然不能夠去關島結婚, 但係我目標依然想要一個戶外既婚禮, 既然係咁就叫謝菲同我去睇睇啦(因為之前個啲一早已經諗到有可能有問題, 所以都無謂叫佢去). 去到個場, 雖然個景唔係維港海景, 又無poolside, 但周圍都幾空曠, 可以望到獅子山,  個view都唔錯. 雖然佢到時會set 50張椅, 就算真係多於50人都可以有位企. 同埋佢有個地中海theme既小花園, 到時都有位影吓相. 當然美中不足係佢有少少建築物係後面, 有可能行禮影相時會影到, 同埋因為空曠, 所以如果好大風時, 都幾"當"風, 但係以佢個價錢及環境來計, 都可以. 但decoration就唔係包晒, 佢只係包證婚檯既decoration, 所以好可能要啲朋友們幫幫手, 要自己DIY個場. 終於決定咗證婚埸地就係帝京酒店八樓既室外地中海花園. 希望我個選擇無錯啦!!!