Cheers~德國啤酒節

剛剛既星期六, 莎拉與謝菲約咗幾個好朋友去咗Marco Polo Hong Kong Hotel搞既德國啤酒節, 呢個德國啤酒節今年已經係第20週年, 每年10月尾開始, 為期3星期架. 以前莎拉係加拿大都曾經去過呢啲啤酒節, 但係香港今次都係第一次呢.

德國啤酒節星期五及六既入場費係$200 (包一杯啤酒及一隻beer mug), 而星期日至四既入場費$100(包一杯啤酒) http://www.gbfhk.com場地正正就係酒店6樓既室外停車場, 所以對住個維港夜景真係好鬼正呀!
因為係free seating既關係, 所以如果想座靚位就要早啲入場. 因此我地6pm就已經去到, 攞咗張係帳篷內既位置, 可以睇到台上既表演. 朋友仔仲帶咗鬆弛熊嚟, 佢仲專登自己織咗件德國傳統服飾及一頂帽仔俾佢, 好鬼得意呀!!!! 個個都爭住要同佢影相呀!
  


係7pm前仲有happy hour既special, 買一杯啤送一杯($80 for 2), 所以我地就係7pm前就已經每人KO咗一大杯啤酒啦. 除咗有啤酒飲, 仲有好多德國美食, 例如德國豬手, 不同種類既腸仔, Bake baby ribs, Pretzel, 飲住啤酒嚟食真係好鬼正呀!

除咗有得食, 有得飲, 有歌聽之外, 場內仲有得玩呢, 咪就係呢啲專俾自名"大隻"既男仔玩既game, 鬥大力!

到咗7pm, 台上開始就有一隊德國既country music live band開始表演啦!
大肥佬扮女人呀!! 好嚇人呢!
起初場內既人都好似未係好warm-up, 所以氣氛都未係好high. 但係越夜就越high, 或者大家都已經飲到進入狀態啦, 全場既人係8pm就已經開始企係地上又跳舞又一齊拍手. 
而去到9pm, 就全場人已經企上凳及檯上dance跳舞及唱歌,  更係啦, 隊Band唱好多pop song, 又YMCA, 又I will survive, 最正係佢地唱咗首"上海灘", 氣氛真係無得頂呀!!!
全晚我地成班人, 每人都已經飲咗3大杯啤酒, 所以到咗後期影出嚟既相就已經開始有明顯既分別啦, 大家都真係影出真我呀, 又跳又唱又攬又錫!!!






平時我就真係唔會攬住呢啲"人扮公仔"影相傻笑, 而我當時就已經係"貓貓"地啦, 所以就先會影到呢張相呢! 

飲到好肚餓呀, 莎拉要將鬆弛熊食咗嚟做snack呀!

而謝菲就係一飲酒就會面紅既人, 成晚都好似關公上身一樣, 而莎拉就係飲多多都係面青既人, 所以謝菲一同我拍埋影相, 真係好似紅白大賽(一紅一白)咁款呀!

玩到11:30, 人地都打烊要走啦! 呢一晚過得好開心呀真係好好玩呢! 呢個啤酒節真係值得一去, 因為氣氛真係very good呀!!!