莎拉慶生日上下篇(上)

2012/11/4係莎拉既生日, 今年既身份已經再由人地太太升級到人地媽媽啦. 因為有陶寶B既關係, 所以慶祝活動都要就一就陶寶B呢. 所以謝菲就安排將啲慶祝分幾日去做呢.

第一擊就係睇Lisa Ono(小野麗莎) Concert, 莎拉同謝雖然唔係啲有音樂文化氣息既人, 但係對Lisa Ono呢位唱Bossa Nova好出名既女爵士樂歌手就有一個特別既情意結, 因為當日婚禮, 莎拉就係選用咗佢其一隻CD作為晚宴既Background music, 所以每次聽到佢既歌, 都會不其然諗起當日既婚禮 (雖然已係2年前既事, 但莎拉依然回味當日既片段).


難得小野麗莎嚟香港開concert, 所以謝菲就靜雞雞買咗佢既concert飛俾個surprise莎拉. Concert雖然只得2小時, 但係小野麗莎既歌聲真係好好聽呢, 多謝老公呢個安排呀!
第二擊就係預早食呢個二人世界生日飯, 因為陶寶B仲細, 帶佢出街食飯暫時都唔係太方便, 所以生日飯就又唔預佢啦!

今次莎拉就揀咗係尖沙咀既The Roundhouse, 揀呢間餐廳既原因全因為被佢既Corona Cocktail及啤酒焗雞吸引, 淨係個做型都已經夠晒勁!!!

兩個人難得出嚟撐檯腳, 樣樣嘢都想食想試, 最後就order咗德國香腸拼盤, Buffalo wing 同焗啤酒雞.

除咗有corona cocktail, 呢度仲有來自世界不同既啤酒, 最得別係用ipad去order啤酒, 因為可以分門別類search. 最後謝菲就揀咗支加拿大既南瓜啤酒. 味道如何?!

莎拉支corona cocktail賣相就100分啦, 不過味道就麻麻地, 原支既corona就咁飲好味啲呢.

而南瓜啤酒就只有overtaste有少少南瓜味道. (唔好期望真係好重南瓜味呀!!!) 食啲咁meaty既食物, 用啤酒襯真係perfect match.

Buffalo Wings好味, 其實係莎拉眼中, 任何既雞翼都係好味道呢.
 
德國香腸拼盤就沒有驚喜, standard之作.

到咗重點就係焗啤酒雞, 呢個真係有驚喜呀, 啲雞肉點啲gravy真係好香好滑, 唔錯唔錯!!!

食咗咁多嘢真係好飽呀(再一次眼闊肚窄既效果) 要郁動吓先得, 剛好呢度有得掟飛標, 就掟翻幾鋪啦. 莎拉都好耐無掟標啦, 自己套標都封晒塵呢,
 
對上一次掟標都好似係2年前既事啦, 咁耐無玩都仲掟得中個把呀!!!(莎拉唔係高手, 只係人玩我又玩咋)

食飽玩飽就返去接番陶寶B啦. 雖然呢餐生日飯只係短短3小時, 但對於莎拉同謝菲已經係好滿足啦! 返到婆婆度就一齊切生日蛋糕啦, 陶寶B全程望住個蛋糕, 最可愛就係莎拉媽媽合埋眼許願時, 陶寶B都一齊合埋眼, 超鬼馬,氹到莎拉好開心呢. 有了陶寶B就係莎拉既最好生日禮物. (而家真係知道咩叫做有仔萬事足!!!)