走遍商場 - 海港城Xmas外影

2012/12/07

仲有幾日大假, 但公司唔可以carry over去下一年(過份!!!), 一定要放咗佢, 所以莎拉就放咗幾日假.
難得weekday放假, 可以帶吓陶寶B去尖沙咀啦. 因為假期星期六日, 尖沙咀實在太多人啦, 唔好話帶住陶寶B, 就算自己大人行街都怕怕呀, 加上如果推BB車實在係太唔方便啦. 今次去尖沙咀既目標係影海港城既聖誕裝飾及去玩具反斗城.
今次係陶寶B第二次搭地鐵呀, 仲要係多人既旺角站搭到尖沙咀站呢, 陶寶B全程都好似好緊張, 唔敢周圍郁, 雙手捉實, 眼仔碌碌.


好啦, 終於都到海港城啦. 平時唔會推住BB車都唔會留意升降機既位置, 但而家上上落落都想盡量搭升降機, 先發現好多商場都好唔方便, 升降機既位置及數量都不足呢. 到咗中午時份啦, 搵間餐廳醫肚先, 見呢間"吉列派"平時星期六日好多人等, 反而平日又唔駛等, 一於就試一試啦. 同謝菲一人一個吉列豬扒便當, 唔知係咪肚餓既關係, 覺得都幾好味, 唔係好似Openrice啲comment講到咁差.

陶寶B都好合作, 我地食緊時, 佢就小睡片刻, 到我地差唔多食完時, 陶寶B就時間啱啱好瞓醒啦. (乖囝呀!!) 食飽飽就去影相啦. 因為平日既關係, 所以都唔係太多人, 可以慢慢影呀.

今年海港城既聖誕主題係Alice in Wonderland, 紅色既佈置好靚呢. 陶寶B都要笠番頂帽仔, 扮吓cutie先.

呢個傻豬仔, 一照鏡見到自己個樣就奸奸笑.

影相全程都抱住陶寶B, 真係手都有啲軟啦.

附近既保安好好人呀, 主動問駛唔駛幫我地影相呢.

影完相就去玩具反斗城啦, 陶寶B仲細, 未識得扭玩玩具, 反而係莎拉媽媽主動屈陶寶B去玩. 之前見到呢類型既Jumper椅已經好想俾陶寶B試玩, 呢間玩具反斗城又唔多人, 就俾陶寶B試玩啦, 哈哈哈, 陶寶B玩得好開心呀, 笑得咁開心好似同媽媽講"買啦買啦!!!"

不過莎拉好冷靜既, 唔會係又買唔係又買, 因為價錢唔平($14XX), 二來專家話學行車唔好俾BB用, 而呢啲Jumper又有少少似學行車, 唔知對BB腳仔有無影響, 所以都係諗諗先. 好彩抱起佢時, 陶寶B唔會發爛渣唔肯走呢. 不過最後都買咗啲玩具俾陶寶B, 睇吓佢, 佢對呢隻象仔好鐘意, 未俾錢已經拎住唔放.

走既時候, 海港城門口影相位多咗好多人呢, 所以都係中午時份平日影相好好多.