摘士多啤梨之初體驗

2015/1/11 

踏入1月份就係士多啤莉開季既時候啦, 上年一直沒有關會帶陶寶B去摘士多啤梨, 所以今年一開季莎拉就嘈住要去了. 參考了各blogger既意見後, 今次就揀了去"錦田鄉村俱樂部", 因為貪佢除咗有士多啤梨摘之外仲有其他嘢玩. 星期日去到錦田鄉村俱樂部差不多11am, 見到一架架既旅遊大巴士落人, 睇嚟呢度都好多本地團及學校親子旅行團嚟呢度玩. 不過好彩呢個錦田鄉村俱樂部都好大, 只係BBQ及食檔位人山人海, 其他位置都還可接受. 

士多啤梨園是不設入場費, 摘幾多就俾幾多, 佢地有3個品嚐, 分別係韓國($100/lbs), 法國($80/lbs)及日本($120/lbs)品種, 不過當日就只有韓國及法國品種, 未有幾會食到日本品種. 

韓國同法國品種相比, 韓國既真係好香甜, 大大粒好吸引.

今次係陶寶B第一次摘士多啤梨, 之前都擔心佢會唔會不受控制, 亂踏人地啲植物, 不過陶寶B又出奇地乖巧, 自己拎住個籃.

我地教佢拎住粒士多啤梨, 之後我地就剪, 跟住佢就擺落個籃度. 所有係士多啤莉田度, 陶寶B就不斷講"拎住......剪......我擺.....", 笑C莎拉呀. 

媽咪媽咪, 好大粒士多啤梨呀!!!

不過小朋友始終係小朋友呀, 起初陶寶B都會乖乖咁拎住個籃.

 不過到了後期佢已經按捺不住了, 成日想偷食啲士多啤梨, 一俾我地發現, 陶寶B就扮晒"我無食呀, 我只係放係咀邊咋". 

一俾咗錢洗一洗啲士多啤梨座係涼亭下就起勢食呀, UM,,,,,,好好味, 好香甜呀, 真係勢估唔到仲甜過平時係超市買既. 

呢度仲有個大草地, 好合適野餐架, 不過可惜今天沒有準備野餐食物啦, 所以下次嚟既時候一定要帶埋食物嚟哦. 草地度仲有個好大既吹氣巧虎, 陶寶B一見到就起勢衝過去.

錦田鄉村俱樂部除了有士多啤梨園外, 仲有好多其他設施, 例如BBQ場, 吹氣跳彈床, 餵小動物, 撈金魚等, 不過最叫莎拉興奮既就係見到有碰碰車啦, 嘩,,,呢個絕對係莎拉既兒時回憶呀, 碰碰車係香港真係少之有少啦, 印象中上一次係香港仲見到碰碰車就係已經拆咗既青龍樂園了. 所以莎拉一見到碰碰車就立即舉手要玩, 俾咗錢($60/10min)排隊下一輪就到我地啦, 嘩,,,一到我們就衝到自己心儀顏色既碰碰車. 

Yeah, 莎拉負責揸車當然係不斷地撞人地架車啦, 咁先至係碰碰車架嗎!!! 每撞一吓碰碰車, 陶寶B就會"卡卡"大笑, 非常Evil(似足莎拉!) 十分鐘既碰碰車時間好快就過啦, 莎拉同陶寶B都玩得好開心呀, 下次要再嚟玩過先得!