甩了很多個月既陶寶B發展回顧點都要寫吓, 因為怕自己再唔寫就會忘記了呀.
身高及體重
小朋友真係大得好快呀, 而家陶寶B已經大約35磅, 而高度就93cm, 30個月返健康院跟進時, 生長線已經爬升到50%以上了. 回想出世時, 生長線只有20%, 到而家已經追到50%以上, 真係叻叻豬呀!!!! 所以就算BB出世時比較輕都不要太擔心, 因為日後仲有時間可以俾小朋友追番架. 而家出街時, 陶寶B都會扭抱, 不過因為佢都大過啦, 唔可以成日話抱就要抱, 但如果有時行得太耐, 都會抱一陣, 不過抱抱呢個任務就交俾謝菲嗲嗲啦, 因為莎拉自問開始抱唔掂啦, 都係唔好勉強.
食量
而家已經介了臨瞓前既夜奶了,所以就只係每日飲2次奶(早上及午睡前), 而中午及晚餐都可以正常食一大碗(連飯加餸), 而茶點都會食吓香蕉/Yogurt/蛋糕等等, 其實陶寶B都好食得吓架. 當然每個小朋友都會鐘意食甜點, 每次見到有Cake都會好鐘意食, 仲要分一件俾佢時, 陶寶B會將佢分開細細件, 慢慢食之如仲要好似唔捨得食添. 而每一餐都會自己自動波去食, 不過當食到飽時就會開始懶去用工具食, 成日就用手放食物入口, 呢一個問題莎拉仲努力緊去修正. 而家陶寶B都仲係用匙及叉, 之前試過俾筷子佢試, 但係唔成功, 所以要遲少少再試過.
活動能力
-陶寶B係好動型既小朋友, 跑跑跳跳係佢既強項. 返過來想佢文靜地填吓顏色, 就次次都係得個3分鐘. 至於音樂感呢方面, 陶寶B都唔錯架, 近來都會跟住唱吓歌仔(ABC, 太陽伯伯, 排排座都係佢既飲歌), 有時見到電視既小朋友跳舞, 佢都會跟住跳. 而陶寶B最愛既TV Show就有Hi-5/Wiggly Wiggly songs/巧虎, 每晚都會睇一集Hi-5先得, 不過佢都好自覺既, 睇完一集就會自動自覺講Bye bye(間唔時都會扭計要睇多一集), 之後就會入房玩玩具.
-咁多種類型既玩具, 玩木板puzzle及認Flash card係陶寶B既至愛, 每晚都要玩幾次先會去瞓覺, 而車車都會係佢另一至愛, 當然啦, 無男仔係唔鐘意車既.
-而如廁訓練呢一PART就係原地踏步呀, 無論大或小都係唔肯座係廁所度去呢, 可能陶寶B表達都仲未係好得, 所以仲未可以同大人講想去大或小呢, 而家又係冬天, 所以又唔可以由得佢不用片片, 唯有等回暖後就開始戒片啦.
-致於說話方面, 由28個月開始時就有明顯既進步, 由以前唔跟唔學我地說話, 到而家會模仿大人說話, 而家講單字已經問題唔大, 不過覆合字句就剛剛開始講, 可能說十次才會有兩次莎拉聽得明係覆合字句, 而有時陶寶B仲會講一大段既BB說話. 雖然陶寶B與同齡小朋友語言發展明顯Delay, 但係佢由半年前不會用說話表達連識講既單字10個都無到而家已經會用說話表達, 真係有好大既進步了, 莎拉已經好開心了, 慢唔緊要最緊要有持續既進步. 所以如果有媽媽既小朋友語言發展明顯Delay的話, 千萬不要灰心, 同埋最好去做一做評估及找專業人仕幫助, 因為影響語言發展既因素真係有好多架, 最緊要對正下藥咁先幫到小朋友!!!
作息時間
每晚大約10點就會瞓覺, 一覺就瞓天光, 大既8-9點就會醒, 呢個時間無論Weekdays定weekend都會一樣, 所以莎拉想瞓到自然醒都已經無機會了. 而由27個月開始就已經不再瞓bb床了, 因為張bb床已經不是太夠長了, 所以陶寶b好多時瞓到半夜會整醒自己, 跟住就要同大人一齊瞓了. 因此慢慢地而家已經全程同大人同床瞓了, 仲要媽咪嗲哋一齊陪瞓覺, 好多時莎拉陪陪吓運自己都瞓埋呢, 所以近來莎拉都好夠瞓架.(鬼咩, 由10pm瞓到7am)
健康
感恩沒有什麼問題, 希望陶寶B繼續keep it up!!!!
No comments:
Post a Comment