Day 2 : Khao Kheow Open zoo (綠山野生動物園) ->Mercure Pattaya Ocean Resort -> Beach Road
晨早起床清新開朗, 一覺醒嚟係雀仔聲下食個早餐(酒店包)為今日既行程作準備.
司機準時9AM到達酒店接我地, 今次莎拉BOOK既包車係搵Tim Leung (討論區人稱Tim哥) (timbobbyleung@yahoo.com.hk), 車程係曼谷機場附近酒店->Khao Kheow Open zoo (KK open zoo) -> 芭提雅酒店, 車種係Van仔, 價錢2600Baht (business licensed with
insurance), 莎拉只係找過wendy及香港炳嫂格價, 但wendy既價錢較貴, 而香港炳嫂就遲遲沒有回覆, 所以最後都係book了Tim哥. 由曼谷機場去芭提雅會經過一個叫Khao Kheow Open zoo (大約係90分鐘車程), 所以如果同行有小朋友, 可以將呢個動物園編入行程.
動物園入場費大人300Baht, 小童150Baht, 而係園內可以選擇揸自己既私家車或租園內既golf car或乘搭auto tram.
既然我地有司機就當然座自己車入動物園啦. 動物園入口處有一排既攤檔賣餵動物既蔬果, 100Baht就有一大袋, 真係有排餵呢.
動物園內既第一區域就係”小鹿區”, 陶寶B一見到小鹿就急不及待拎住啲蔬果去餵佢地.
小鹿們都好溫馴, 隻隻都好乖, 不過唔知係咪食得飽得滯, 有啲鹿好似唔多肚餓, 但陶寶B仲不斷講”鹿仔食啦食啦!”.
今日天氣真係好熱, 飲番個冰凍椰青就最解渴了.
睇完小鹿就去搵馬騮及河馬啦!
馬騮真係好聰明, 將啲蕉掟俾佢地時, 佢地會自己”Meat”蕉皮, 好鬼C醒.
至於啲河馬就真係好懶, 佢地只會掹大個口等你掟食物俾佢.
行吓行吓就去咗非洲園野區, 第一眼就係見到好多隻斑馬係園內喔!!!
之後就係大人同小朋友見都好興奮既長頸鹿呀, 佢地一隻隻申個頭出嚟食你手上既豆豆, 真係好可愛喔.
園內仲有鴕鳥, 佢地真係好大隻呀. 另一種可以餵食既動物就係犀牛, 佢地個口好大個, 陶寶B都唔係好夠膽企近去餵佢地呀.
行完呢個非洲園野區後, 司機就車我地去鳥類園, 其實係一個好大既溫室雀竉, 啲雀仔好自由咁周圍飛, 有少少好似Jurassic park既感覺呢.
唔好以為溫室就好熱, 入面有瀑布河流, 所以都好涼爽.
下一站就係去見”大笨象”, 兩隻大笨象係圍欄內等人餵香蕉.
期間有個象伕就叫大象表演, 例如雙腳企之類, 有啲遊人打賞俾錢, 隻大象仲識得用個鼻去攞錢添, 不過其實莎拉唔多鍾意咁, 因為要佢去表演既背後一定有好多訓練, 所以我令願見到一隻只係識食既大笨象呢.
中午既泰國真係好熱, 所以水係一定要飲多啲, 園內買既水有晒動物園既名架.
園內有一個好大既草地內有羊咩咩, 餵佢地時啲羊係好瘋狂, 好似好耐未食過嘢咁.
買20Baht既草, 唔夠一陣就食晒啦.
買20Baht既草, 唔夠一陣就食晒啦.
之後就去到”cat zone”, 唔好以為係普通既貓咪, 而係貓科類既動物, 咁即係豹, 老虎之類既動物啦.
莎拉都係第一次咁近距離見佢地, Puma就成日著, 真正既Puma都係第一次見呀, 行近啲個心都離一離呀.
不過好彩陶寶B都唔多驚佢地.
不經不覺就係呢個KK open zoo玩咗3小時了, 之後就齊齊上車向芭提雅出發啦.
No comments:
Post a Comment