親子Hea遊芭提雅+曼谷6日5夜 - Day 1

序: 好嘢, 終於可以去旅行啦, 點解又係泰國, 因為係窮遊呀, 可以用平既價錢去享受陽光海灘, 加上泰菜又啱口味, 所以莎拉係極之鐘情泰國架. 今次我們一家3口再加埋婆婆, 真係有老有嫩, 所以行程上都係要以Hea為主無謂趕頭趕命. 而最近曼谷有陽光與海灘既就有華欣及芭提雅, 因為兩年前才去過華欣, 所以最後決定芭提雅, 雖然莎拉同謝菲都去過芭提雅(不過係6年前), 不過事隔多年新景點及酒店都唔同了, 所以可以當從未去過. 好啦, 行程開始了.

Day 1: 香港->曼谷機場->Thong Ta Resort & Spa Check-In

話明係窮遊當然機票都要平啦, 而平既機票都集中係夜晚時間起飛, 所以最後就揀咗搭香港航空飛曼谷23:55既航班, 當日放咗工仲可以沖埋涼才施施然出發去機場check-in. 陶寶B係出發前兩日就已不斷追問”我個旅行喼呢?”, 因為每次佢見到大人拉住個喼, 陶寶B就會搶住嚟拉, 所以莎拉今次就特別準備咗個旅行喼俾佢自己拉, 入面裝既玩具及書都係佢自己揀架. 陶寶B拉住個旅行喼既樣係勁得戚囉.

好多人都話香港航空成日Delay, 好彩今日我地呢班機就準時登機, 好嘢. 

陶寶B乖乖咁坐定定攬好Seat belt, 準備起飛. 決定搭呢班凌晨機時, 都有擔心過陶寶B會唔會扭眼瞓而係機上發癲, 不過當起飛之後見佢精神奕奕既樣, 我就知我既擔心係多餘. 

起飛無耐就到派餐時間了, 凌晨機加上係香港航空所以都唔會對個餐有期望, 不出我所料派既係包餐-腸仔包一個. 

平時陶寶B係屋企係唔食麵包既, 而今日係飛機度就自動波食了大半個腸仔包, 真係估你唔到呀. 

食飽無耐陶寶B就瞓咗啦, 好快就會降落曼谷機場了.

到達曼谷機場既入境位置時已經係3AM了, 見到條人龍真係當堂呆咗, 因為係打蛇餅到見唔到個龍頭呢, 鬼咩, 原來凌晨時份係有好多大陸旅行團到既, 加上開既Counter唔到, 所以咪打晒蛇餅囉. 

好彩我地有小朋友同行, 啲關員見到我地排人龍時, 就指我地出嚟叫我地去右手邊排(係給泰國居民排既通道), 就係咁我地就避免咗排長龍了, 否則睇嚟起碼要排90-120分鐘先出到去呢.

因為明早就安排了包車去芭提雅, 所以今晚就會係機場附近既酒店”宿一消”. 上各大Forum爬文後, 好多人都推介呢間Thong TaResort & Spa, 因為酒店有shuttle往返機場, 加上車程都只係10分鐘. 攞完行李就可以去入境樓層既exit 4附近找酒店shuttle, 原先以為係一到就有shuttle走人, 但原來係每30分鐘一班shuttle呢, 所以如果知道剛剛走了一班車的話, 不如自己搭的士就不用呆企了. 酒店價錢係$200/晚(包早餐), 所以不要對酒店有太大期望, 只要乾淨就可以了. 

酒店給了我們5樓房間, 以為高樓層就好嘢啦, 點知酒店係無電梯架, 真係,,,,,,所以溫馨提示, check-in時緊記request低樓層呀. 房間好大, 望落都叫做乾淨企理, 呢個價錢瞓一晚算係咁了. 攪掂晒瞓得時都已經係4am了, 明早8am就要起身, 正式開始呢個旅程.

陶寶b與莎拉媽