四季之中莎拉就最鐘意夏天, 因為夏天呢個季節充滿活力及陽光氣息, 因此連帶陶寶B都十分享受夏天, 因為唔怕熱既莎拉一見好天有太陽出嚟就會帶佢去沙灘玩. 住市區既莎拉因為好多時都係起身後覺得天氣好就即慶決定去沙灘, 所以都會去啲地點方便既沙灘, 而近期就愛上了淺水灣 Repluse Bay.
論地點交通真係好方便, 係中環搭架Express巴士260, 唔駛30分鐘就到達淺水灣了, 相比起石澳真係車程短好多.
另外一個淺水灣既好處就係搵食容易, 因為正正有一排餐廳對住沙灘, 西式中式日式齊集, 一定有一間啱食.
不過如果想食啲平啲既, 呢度又有一間pizza hut及好大間既7-eleven, 莎拉就試過係7仔買了一些叮叮意粉拎去沙灘當picnic食, 都唔錯架.
至於論到沙質及水質方面, 沙就一定唔夠石澳那些咁幼咁棉, 至於水質都可以架.
不過淺水灣有好嘢當然有衰嘢, 因為淺水灣係一個遊客景點, 所以會有好多強國旅客一身與沙灘格格不入既裝束不斷地係岸邊度selfie, 解決方法就係去遠少少就可以避開佢地, 因為佢地大部份都係集中係停車場對正既沙灘位置.
雖然有強國客但避得開佢地就無所謂啦, 因為整個淺水灣都好大, 但係泳客就唔會太多, 絕對唔似石澳咁人山人海呢, 因為人少既關係所以沖身既設施洗手間相對好乾淨.
烈日當空就當然想租把太陽傘架啦, 不過淺水灣租太陽傘真係有啲貴, 但係唔緊要, 淺水灣另一好處就係種了好多樹係沙灘, 所以都好容易搵到樹蔭位架.
玩飽沙灘後, 好多時小朋友玩完水都可能未夠喉, 所以沙灘有個公園仔, 小朋友可以玩個痛快放埋緊餘既電, 回程時上到巴士包佢100%會瞓覺呀.
No comments:
Post a Comment