Sarah Cake's Blog: 生日衝出去@新加坡4日3夜親子遊-Day 3 (上)

Day 3 : Singapore Zoo @ Ah Meng Restaurant 早餐-> Singapore Zoo -> Rainforest Kidzworld-> Raffles Quay MTR -> Merlion Park -> 老百剎 Lau Pa Sat

今日既重點節目就係新加坡動物園Singapore Zoo, 雖然聽聞佢個夜間動物園都係好出名, 但擔心晚間動物園黑嗎嗎既情況下, 陶寶B未必能夠睇得清楚啲動物而失去睇動物既樂趣, 所以最後都係決定日間去動物園. 當然話晒今次都係陶寶B既生日之旅, 點都要攪攪新意思, 呢個活動就係同紅毛猩猩食早餐喔.

早餐時間雖然係9am才開始, 但餐廳都建議客人早少少到達以便安排入座, 所以今日就晨早起身搭的士去動物園(由酒店到動物園大約S$20). 準時8:30am就到達動物園了, 買好入場門票後就朝住Ah Meng Restaurant既方向進發, 沿路都見到有唔少既小動物周圍走, .咁近距離見孔雀都係第一次咋.

所以陶寶B都化身成攝影師係咁影相.

去到門口就已經有一條小小既人龍了, 因為安排入座既同時要收埋錢, 所以其實都幾慢, 所以好彩真係早少少嚟.

早餐Buffet價錢成人S$35一位, 而小朋友6歲以下就免費, 所以2大1小其實拉上補下就價錢還可以接受. 呢隻就係一陣會見到既新加坡動物園既明星-紅毛猩猩. 真係查字典先知道紅毛猩猩既英文係Orang Utan.

莎拉早係3星期前就已經訂位, 而訂位時同餐廳說明今次係小朋友生日之旅, 所以特別要求希望餐廳可以安排一張比較接近紅毛猩猩既檯呢, 而餐廳真的安排了一張非常接近一陣紅毛猩猩會出現既檯, 可以話等同於演唱會既握手位咁正.

襯紅毛猩猩未出場就先食嘢先啦, Buffet早餐既選擇都算多, 與一般酒店早餐Buffet差不多. 起初以為唔會太多人嚟食早餐, 點知到了9am時就差不多已full house, 好彩一早book了位.

到了9:30am了, 紅毛猩猩出場啦, 工作人員慢慢將降下一條長樹幹去另一棵樹, 之後就有幾隻紅毛猩猩慢慢爬落嚟, 同大家見面. 嘩啲紅毛猩猩真係好近, 就係面前咋.

呢幾隻紅毛猩猩其實係一家人, 佢地一排坐定定咁不停食嘢, 真係你有你食佢有佢食呀. 之後食客們就可以排隊(不限次數)近距離同紅毛猩猩影大合照.

到了大約10am, 紅毛猩猩就返去佢地既樹林同大家bye bye啦. 所以其實個selling point話就話同紅毛猩猩食早餐, 實際見到佢地既時間就只有短短既30分鐘, 不過可以咁近距離接觸又真係好少有, 所以如果係一啲特別既occasion都值得既. 仲正想繼續食個早餐時, 莎拉安排俾陶寶B既小驚喜就到了, 餐廳侍應就唱住Happy Birthday送上了一個插了蠟燭既小小蛋糕來. 呢個小朋友見到個生日蛋糕就不知幾咁開心, 露出不知幾咁得戚既表情呢. 洗唔洗咁情深咁望住個蛋糕呀?!

莎拉用email contact餐廳希望可以安排一個小型蛋糕, 而餐廳就好快就回覆沒有問題, service真係好好呀. 一早安排咁多嘢, 為既就係呢張生日蛋糕相喔.

食飽就終於可以開始遊覽動物園啦, 唔知係咪因為身處熱帶樹林既關係, 所以濕度好似較高因而覺得特別熱呢, 未真正開始行都已經好熱了, 所以第一站就入了去有冷氣既北極館睇polar bear.

出面真係好熱呀, 不如留係度嘆吓冷氣啦!

本來諗住用腳去行動物園, 但個動物園真係好大, 所以最後都係每人俾了S$3搭園內既tram(無限次上落), 可以由一個園區去另一個園區, 慳番少少體力.

動物園內係指定既時間是有餵動物的, 不過一來係有配額(避免過度餵食)二來係要另外俾錢, 所以今天莎拉沒有指定那個時間去邊個園區, 行到那一園區就去睇動物吧.

陶寶B好似對斑馬及長頸鹿係特別情有獨中, 仲一臉認真去睇個動物簡介牌.

見到犀牛唔知點解特別開心興奮的, 唔通你同佢好Friend?!

去到貓科園就見到各種老虎獅子, 雖然隔住塊玻璃, 但都feel到隻豹好惡喔.

今次係動物園仲見到好少見到既動物, 例如巨型蜥蜴, 唔知點解陶寶B好似對佢好有興趣.

另外有啲好大隻既龜, 都係第一次見咋.

行行去就突然之間行雷落大雨(新加坡特色吧!!!), 剛好我地係架tram, 不如就坐多個圈當遊車河啦, 點知陶寶B坐坐吓就瞓著咗, 唯有去Food court坐一坐啦. 今朝個早餐都仲頂住, 所以都無打算買嘢食, 不過都可以睇一睇個款式及價錢, 款式真係照顧到各民族既口味, 而價錢就由S$8-S$13不等.